Phau Yaxayas Nplig Tau Peb

1-2. Thaum peb ntsib kev tu siab Yehauvas pab peb li cas?

MUAB xav tias muaj ib tug me nyuam quaj tu siab nrho rau qhov nws tsev neeg yuav khiav mus nyob lwm qhov chaw tshiab, nws yuav tau tso nws tej phooj ywg tseg. Los sis tej zaud tus me nyuam tu siab vim nws tau ua ib yam dab tsi yuam kev. Thaum zoo li no ib leej niam yuav ua li cas xwb? Nws yeej yuav muab tus me nyuam puag kiag thiab plhws taub hau, thiab leej niam yuav ua tib zoo mloog tus me nyuam quaj dhuj dheev piav qhia rau nws tias yog vim li cas.

² Phau Vajlugkub muab Yehauvas piv rau ib leej niam uas muaj kev hlub thiab xav nplig nws tus me nyuam. Yehauvas hais li no tias: “Kuv yuav nplig nej . . . ib yam li leej niam nplig nws cov menyuam siab.” (Yaxayas 66:13) Yehauvas txoj kev hlub peb tseem loj tshaj leej niam leej txiv txoj kev hlub. (Yaxayas 49:15) Nyob hauv phau Vajlugkub, Yehauvas muaj tej lus nplig thiab txhawb tau peb thaum peb tu siab los sis nyuaj siab.​—Loos 15:4.

3. Hauv zaj no peb yuav mus tham txog dab tsi?

³ Phau Yaxayas muaj Yehauvas tej lus uas nplig tau peb lub siab. (Yaxayas 40:1) Cov neeg nyob hauv teb chaws Yudas ntsib kev nyuaj siab ntxhov plawv ntau yam. Yog li Yehauvas thiaj tshoov kom Yaxayas sau nws tej lus mus nplig nws haiv neeg. Peb los kuj nyob rau ib lub sij hawm uas “muaj kev kub ntxhov” thiab peb yeej xav tau kev nplig siab. (2 Timautes 3:1) Cia peb mus tham txog tej nqe Vajlugkub nyob hauv phau Yaxayas uas nplig thiab pab tau peb nyob ruaj khov thaum (1) peb lub neej hloov nthawv nthav, (2) pheej tu siab rau tej uas peb ua yav tas los, los sis (3) quaj ntsuag txog cov peb hlub uas tau tas sim neej.

THAUM LUB NEEJ HLOOV NTHAWV NTHAV

4. Thaum peb lub neej hloov nthawv nthav yuav ua rau peb xav li cas?

⁴ Peb lub neej yuav hloov nthawv nthav thaum twg los peb yeej tsis paub. (Tej Lus Qhia 9:11; 1 Kauleethaus 7:31) Tej zaud peb yuav ntsib kev muaj mob muaj nkeeg, txom nyem nyiaj txiag, lub teb chaws nyob tsis tiaj tus, los sis tes hauj lwm peb ua rau Yehauvas hloov. Thaum muaj li no yuav ua rau peb txhawj thiab tsis pom qab ua zaj twg. Yuav ua rau peb xav tias: ‘Kuv yuav ua li cas?’ Muaj ib tug kwv tij hu ua Ntsauxes (Joseph), nws ua hauj lwm nyob hauv Npe-ee tau 17 xyoo, tiam sis lawv muab nws xa rov mus ua ib tug tshaj tawm lawm xwb. Nws hais li no: “Kuv tsis pom qab yuav ua li cas. Rau qhov kuv ua hauj lwm nyob hauv Npe-ee ntev lawm, ces yeej nyuaj rau kuv mus pib ua ib lub neej tshiab. Yog li kuv tsis paub yuav pib tog twg.” Yehauvas tej lus hauv phau Yaxayas yuav nplig tau peb li cas yog peb lub neej hloov nthawv nthav?

5. Nyob ntawm Yaxayas 42:16, Yehauvas cog lus tias nws yuav pab peb li cas? (Saib daim duab.)

⁵ Nyeem Yaxayas 42:16. Yehauvas cog lus tias nws yuav coj cov uas dig muag kev, thiab nws yuav muab txoj kev uas lawv ib txwm tsis tau taug dua, thiab txoj kev tsaus ntuj ua kev kaj. Cov lus xws li “digmuag,” “txojkev uas lawv ibtxwm tsis tau taug dua,” “txojkev tsaus ntuj,” thiab “tej kev uas tsis xwmyeem,” yog hais txog thaum peb lub neej hloov nthawv nthav, zoo yam li peb taug kev hauv hav zoov, tsis paub yuav mus txoj twg rau yav tom hauv ntej. Thaum zoo li ntawd Yehauvas cog lus tias, nws yuav coj peb txoj hau kev thiab yuav tsis tso peb tseg. Nws yuav tuav peb txhais tes coj peb taug txoj kev tsaus ntuj nti kom dhau mus, nws yuav ua lub teeb ci rau peb pom kev, thiab yuav kho peb txoj kev kom tiaj rau peb taug. Yehauvas ua li no li cas? Nws muab nws Txoj Lus thiab nws lub koom haum los pab peb. (Phau Ntawv Nkauj 119:105; Yaxayas 30:21) Tsis tas li ntawd, nws muab cov kwv tij nkauj muam thiab lwm tus los pab peb thiab. Txawm txoj kev peb taug yav tom ntej yuav nyuaj thiab yuav zoo li cas los, peb yeej tso siab plhuav tias Yehauvas hlub peb thiab yuav saib xyuas peb vim nws to taub peb txoj kev xav.​—Yaxayas 41:10; 1 Petus 5:6, 7.

6. Yog peb lub neej hloov nthawv nthav peb tso siab tau li cas?

⁶ Ntsauxes uas hais tas los no piav tias Yehauvas tau pab nkawd ob niam txiv li cas thaum nkawd rov mus ua cov tshaj tawm. Nws hais li no: “Wb pom tias Yehauvas cev tes pab wb rau lub sij hawm uas wb lub neej hloov. Muaj cov kwv tij nkauj muam pab wb heev. Yehauvas saib xyuas wb kom muaj txhua yam li wb xav tau thiab pab wb muaj lub siab tus. Nws yeej yuav pab wb mus li.” Yog hais tias koj lub neej cia li hloov nthawv nthav thiab txawm yuav nyuaj npaum li cas los, koj yeej tso siab tau tias Yehauvas yuav pub lub dag zog rau koj, thiab nws yuav coj koj txoj hau kev. (Yaxayas 54:10; 58:11) Ntsauxes hais ntxiv tias: “Cov lus hais nyob hauv ib zaj nkauj txhawb siab hais tau zoo heev. Cov lus hais li no, ‘Txawm kuv tsis paub tag kis yuav zoo li cas, muaj Yehauvas nrog kuv, qhov ntawd zoo tshaj.’a Txawm peb lub neej tsis mus raws li lub siab xav los, peb tso siab tau tias Yehauvas yeej yuav nrog nraim peb.”

PHEEJ TU SIAB TXOG TEJ UAS UA YUAM KEV YAV TAS LOS

7. Muaj tej tug xav li cas txog lawv tej kev txhaum yav tas los?

⁷ Thaum peb tau ua ib txoj kev txhaum loj tiam sis twb mus nrog cov txwj laus tham thiab twb lees peb lub txim lawm, peb yeej yuav siv zog ua npaum li peb ua tau kom tsis txhob rov ua txhaum dua. (Pajlug 28:13; Yakaunpaus 5:14-16; 1 Yauhas 1:9) Txawm Yehauvas twb zam txim rau peb lawm los peb pheej tseem tu siab qees ces tej zaum peb yuav xav tias, ‘Yehauvas puas zam txim rau kuv tiag?’ (2 Kauleethaus 2:7) Yeej paub tias tsis yooj yim, rau qhov peb yuav nco ntsuj ntsoov txog qhov uas peb tau ua txhaum. Vaj Ntxwv Daviv tau hais li no: “Muaj kab mob nyob thoob plaws kuv lub cev vim kuv tej kev txhaum xwb. Kuv ibce tsaug zis thiab zuav ua ib pag.” (Phau Ntawv Nkauj 38:3, 8) Yog tej thaum koj xav tib yam li no ces phau Yaxayas yuav nplig tau koj.

8-9. Raws li hais nyob ntawm Yaxayas 1:18, thaum Yehauvas zam peb lub txim nws zam li cas?

⁸ Nyeem Yaxayas 1:18. Yehauvas ua piv txwv qhia rau peb tias thaum nws zam peb lub txim nws yeej zam tiag tiag. Yehauvas thiaj hais tias, txawm peb tej kev txhaum yuav “liab cuag ntshav” los nws yuav ua kom “dawb paug li daus.” Peb paub tias yog ib tee liab ploog tsuas lub tsho dawb, txawm yuav muab ntxhua npaum twg los yeej ploj tsis tas. Tiam sis Yehauvas xav kom peb tso siab plhuav tias thaum nws zam peb lub txim lawd, nws yeej tsis xav txog mus tas peb sim neej li lawm.

⁹ Cia peb xav txog Vaj Ntxwv Daviv. Txawm nws tau ua txhaum deev luag poj luag sev thiab tua neeg, los Yehauvas twb zam nws lub txim, thiab tom qab no Yehauvas tseem hais tias Daviv yog ib tug uas muaj lub siab ncaj ncees heev. (2 Xamuyees 11:3, 4, 14, 15; 12:13; 1 Vajntxwv 9:4, 5) Thaum Yehauvas xav txog Daviv, nws tsuas xav txog qhov uas Daviv npuab siab rau nws xwb, tsis yog qhov uas Daviv tau ua txhaum. Tib yam li ntawd, yog peb twb lees peb lub txim lawd Yehauvas yeej zam txim rau peb, thiab nws yuav pab kom peb muaj kev zoo siab teev tiam nws mus rau yav tom ntej. Muaj dab tsi ntxiv hauv phau Yaxayas yuav pab tau peb, yog tias peb pheej tu siab dhau rau tej kev txhaum uas peb tau ua yav tas los?

10. Cov lus uas Yehauvas hais nyob ntawm Yaxayas 38:17 nplig tau peb li cas?

¹⁰ Nyeem Yaxayas 38:17. Thaum phau Vajlugkub hais tias, “koj zam tagnrho kuv tej kev txhaum,” kuj yog txhais li no thiab “koj tau muab tag nrho kuv tej kev txhaum cuam hlo pov tseg tsis pom li lawm.” Nyob ntawm nqe no, Yehauvas qhia tias thaum ib tug twb lees nws lub txim lawd, Yehauvas muab cuam kiag tom qub qab tsis tig mus saib los sis xav txog li lawm. Thiab muaj ib phau ntawv uas qhia txog phau Vajlugkub hais li no, “Koj ua rau kuv lub txim ploj ntais cuag li kuv tsis tau ua txhaum li.” Yog li thaum Yehauvas zam peb lub txim ces cuag li peb yeej tsis tau ua txhaum. Yehauvas yeej tsis rov hais txog dua li lawm thiab nws yeej tsis rau txim rau peb, rau qhov nws twb tsis nco txog lawm. Nws cog lus tias: “Kuv yuav tsis cim ntsoov nej tej kev txhaum cia.” (Yaxayas 43:25) Qhov no nplig tau peb lub siab kawg li! Yog Yehauvas tus uas tsim nyog txiav txim rau txhua leej txhua tus twb tsis nco txog peb lub txim lawm, ua cas peb pheej tu siab txog qhov uas peb tau ua txhaum?

11. Yehauvas xav li cas txog peb tej kev txhaum yav tas los? (Saib daim duab.)

¹¹ Yog thaum twg peb pheej rov tu siab dhau txog tej kev txhaum peb tau ua yav tas los, peb yuav tau nco ntsoov Yehauvas tej lus cog tseg. Thaum Yehauvas zam txim rau peb, nws yeej zam tiag tiag. Nws yeej tsis txaj muag thiab tsis cib nyeej rau peb vim tej kev txhaum peb ua yav tas los. (Yaxayas 57:16) Tej kev txhaum yav tas los tsis tseem ceeb rau Yehauvas lawm, tiam sis tej uas peb ua tam sim no thiab rau yav tom ntej muaj nqis heev rau nws. (Yaxayas 55:7) Peb tus Vajtswv Yehauvas hlub peb heev thiab nws yeej zam peb lub txim! Yog li peb tsis txhob cia tej kev txhaum yav tas los ua rau peb tsis qab siab teev tiam Yehauvas, es thaum kawg yuav ua rau peb plam txoj sia ntev dhawv mus ib txhis.

THAUM PEB QUAJ NTSUAG

12. Peb xav li cas thaum ib tug uas peb hlub tau tas sim neej?

¹² Thaum ib tug uas peb hlub tas sim neej yeej ua rau peb quaj ntsuag thiab ua rau peb mob siab, thiab tshua tus neeg ntawd ntev loo. Tej thaud peb xav tias vim li cas Yehauvas thiaj cia tus neeg peb hlub tshua nruam sim mus. Tus kwv tij hu ua Maikaum (Michael), nws niam thiab nws txiv tau tuag vim nkawd lub tsev kub hnyiab. Nws hais tias: “Kuv siab ntsws ntsoog tag thiab kuv chim rau Yehauvas tias vim li cas nws thiaj cia nkawd tuag. Kuv paub hais tias nws tsis yog tus ua nkawd tuag, tiam sis nws tsis ua dab tsi los pab nkawd.” Tej zaum koj kuj tau xav li no thiab. Thaum peb mob siab tu siab heev, Yehauvas nplig tau peb li cas thiab nws muab tau kev vam kev cia siab li cas rau peb?

13. Yehauvas cog lus li cas rau peb nyob ntawm Yaxayas 25:8?

¹³ Nyeem Yaxayas 25:8. Yehauvas cog lus tias nws “yuav rhuav txojkev tuag kom puastsuaj mus ibtxhis.” Thaum tsis muaj txoj kev tuag lawm yuav zoo npaum li cas diam! Peb yeej yuav tsis quaj ntsuag ib zaug ntxiv li lawm. (Yaxayas 35:10) Peb yuav tsis pom tej ntxa uas qhia tias muab cov neeg peb hlub faus rau qhov twg li lawm. Peb yuav nrog cov uas peb hlub nyob ua ke mus li thiab sawv daws yuav noj qab nyob zoo. Lo lus cog tseg no tsis yog lam hais xwb, Vajtswv tus uas muaj hwj chim yeej yuav ua kom muaj tiav xwb xwb li.​—Tshwmsim 21:4, 5.

14. Thaum koj xav txog txoj kev cia siab ciaj sawv rov los koj xav li cas? (Yaxayas 26:19) (Saib daim duab.)

¹⁴ Nyeem Yaxayas 26:19. Yehauvas tsis yog yuav rhuav tshem txoj kev tuag xwb, tiam sis nws yuav tsa cov tuag sawv rov los tau txoj sia. Thaum Yehauvas hais txog cov uas tau tas sim neej lawd, nws hais li no: “Lawv tej cev yuav sawv rov qab los muaj sia.” Los sis nqe no kuj txhais hais tias “Kuv cov tuag yuav sawv rov los.” Qhov nod qhia tias, Yehauvas lees tias lawv yog nws li ntiag tug. Nws yeej cim ntsoov lawv cia nyob hauv nws lub cim xeeb. Thiab thaum txog nws lub sij hawm lawm, nws yuav tsa lawv ciaj sawv rov los. Zoo tib yam li thaum sawv ntxov uas tej lwg dej ua rau tej zaub tuag tshav ciaj zom zaws, Yehauvas yog txoj hauv paus siav, nws yuav tsa cov uas peb hlub uas tas sim neej lawd ciaj sawv rov los. Yuav ua rau peb muaj kev zoo siab xyiv fab tos txais lawv!​—Muab piv rau Malakaus 5:42.

15. Lo lus cog tseg tias cov tuag yuav ciaj sawv rov los tau txoj sia pab peb thev taus txoj kev quaj ntsuag li cas?

¹⁵ Txawm Vajtswv twb cog lus tias nws yuav tsa cov tuag ciaj sawv rov los, los thaum ib tug uas peb hlub tas sim neej yeej ua rau peb tu siab thiab quaj ntsuag. Peb paub tias Yehauvas yeej cim ntsoov lawv cia, qhov uas peb paub li no nplig tau peb lub siab. Txoj kev vam kev cia siab no kuj nplig tau Maikaum uas hais tas los no thiab. Nws hais tias: “Yaxayas 26:19 pab kuv to taub tias Yehauvas hlub kuv niam thiab kuv txiv nkawd heev. Nkawd yeej nyob rawv hauv nws lub cim xeeb kom mus txog thaum lub sij hawm uas nws tsa nkawd ciaj sawv rov los. Qhov uas kuv nco ntsoov li no nplig tau kuv lub siab thiab txhawb tau kuv lub zog.” Cia peb xav ntsoov txog thaum peb rov tau nrog cov uas peb hlub uas tas sim neej lawd nyob ua ke. Yog peb xav li no, yuav pab tau peb thev taus txoj kev quaj ntsuag.

16. Nqe Vajlugkub twg nplig tau koj thaum koj nyuaj siab?

¹⁶ Peb twb tau kawm me ntsis txog tej nqe nyob hauv phau Yaxayas uas nplig tau peb lub siab thaum peb lub neej hloov nthawv nthav, thaum peb pheej tu siab dhau txog tej kev txhaum yav tas los, thiab thaum peb ntsib kev quaj ntsuag. Peb yeej zoo siab kawg li tias Yehauvas muab nws Txoj Lus los nplig peb! (Phau Ntawv Nkauj 94:19) Puas muaj ib nqe Vajlugkub twg uas nplig tau koj thaum koj ntsib kev nyuaj siab? Yog muaj no, muab cim cia, muab sau cia rau ib daim ntawv tso rau ntawm ib qho chaw uas koj pom tau. Thov kom peb Leej Txiv Yehauvas tus uas muaj kev hlub tej lus nplig tau koj lub siab.