Saib Taus Tej Uas Lwm Tus Xav

1-2. Vim li cas peb ib leeg ho xav txawv ntawm ib leeg?

KOJ puas tau raug lwm tus thuam thaum koj txiav txim siab ua ub ua no? Los sis koj puas tau thuam lwm tus kwv tij nkauj muam vim lawv ho ua ub ua no? Tej zaud peb yuav teb hais tias peb twb tau ua dua li ntawd lawm thiab.

² Muaj qee lub sij hawm peb yuav xav txawv dua li cov kwv tij nkauj muam vim peb ib leeg zoo tsis thooj li ib leeg thiab peb nyias muaj nyias kev xav. Tos peb ua li no los twb yog peb ib leeg loj hlob txawv ib leeg thiab vim tej yam uas peb tau raug hauv peb lub neej. Txawm peb nyias xav txawv nyias los nco ntsoov tias peb yuav tau txhawb kom sawv daws sib koom siab thiab nyob sib haum xeeb hauv lub koom txoos.​—Efexaus 4:3.

3. Peb kheev coj li cas xwb thaum peb tsis pom zoo rau tej uas cov kwv tij nkauj muam txiav txim siab ua?

³ Thaum peb cov kwv tij nkauj muam ib tug twg txiav txim siab tau tej yam uas txawv dua li peb xav mas tej zaud peb yuav mus hais li ub li no kom nws hloov siab los sis tej zaud peb yuav mus hais rau tus ub tus no tias nws txiav txim tau yuam kev lawm. Tos peb hais nws los twb yog peb xav kom nws tau qhov zoo thiab peb tsis xav kom nws ho xav txog lig los sis rhuav nws txoj kev sib raug zoo nrog Yehauvas.​—Pajlug 17:17.

4-5. Yog ib tug kwv tij nkauj muam twg ho txiav txim siab txawv dua li peb xav, peb yuav tau coj cwj pwm li cas?

⁴ Puas tsim nyog rau peb mus hais tus kwv tij los sis nkauj muam yog peb xav tias nws tau txiav txim siab yuam kev lawm? Muaj tej zaug kuj zoo rau peb mus hais nws tiam sis muaj tej zaug kuj tsis zoo rau peb mus hais thiab. Xws li peb xam pom tias nws yuav ua tej yam uas hla Vajtswv tej kev cai ces peb yuav tau mus hais nws vim peb hlub nws. (Pajlug 27:5, 6) Tiam sis yog tias tus kwvtij nkauj muam ntawd ho txiav txim siab tau tej yam uas tsis hla Vajtswv tej kev cai tiam sis tsuas txawv ntawm tej uas peb xav xwb ces peb yuav tsum tsis “txhob thuam cov uas tsis xav li [peb].”​—Loos 14:1.

⁵ Txawm li ntawd los tej zaud peb lub siab pheej nkaug peb tias nws txiav txim siab yuam kev lawm. Yog li ntawd, zaj kawm no yuav qhia tias vim li cas zoo rau peb tswj peb tus kheej es cia lwm tus txiav txim siab li lawv pom zoo thiab peb yuav ua li ntawd li cas. Tiam sis ua ntej no cia peb tham txog qho tus yam ntxwv uas ho ua tau rau peb pheej tswj nrees cov kwv tij nkauj muam.

DAB TSI HO UA RAU PEB PHEEJ XAV TSIS ZOO TXOG LWM TUS?

6-7. Piav seb tej yam ntxwv twg ho ua tau rau peb tswj lwm tus.

⁶ Tos peb pheej xav hais lwm tus los, yeeb vim yog tej yam uas peb raug los sis qhov uas peb loj hlob txawv ntawm lwm tus ces tej zaud peb yuav xav tias lwm tus yuav xav ib yam li peb xav thiab. Cia peb muab tham ua ob peb zaj lus piv txwv li no tias 1: Muaj ib tug kwv tij, ua ntej nws los ntseeg Yehauvas, nws txiv yog ib tug neeg uas haus cawv ntau heev. Thaum nws mus nrog cov kwv tij nkauj muam noj mov ua ke, nws pom lawv haus cawv mas ua rau nws ntseeg tsis taus li thiab nws hais rau lawv tias lawv ua tsis yog lawm. 2: Muaj ib tug muam tau muaj ib tug mob hnyav heev tiam sis nws kuj ho zoo lawm. Tom qab no nws ho hnov tias muaj ib tug muam mob ib yam li nws mob thiab. Nws xav pab tus muam uas nyuam qhuav mob, nws thiaj li txhob kom tus muam mus kho ib yam li nws kho thiab noj tej tshuaj uas nws noj. 3: Muaj ib tug kwv tij ua ntej nws los ntseeg Yehauvas, nws mus rau tej tsev teev ntuj. Nws rhuav nws lub neej ntawd kawg li. Thaum nws hnov tias ib kwv tij mus saib ib lub ntees hauv ib lub tsev teev ntuj mas nws chim kawg li.

⁷ Cia peb muab tham li no ntxiv tias 4: Muaj ib tug kwv tij loj hlob rau lub caij uas tib neeg feem coob ntseeg hais tias txiv neej yuav tsum chais hwj txwv du lug thiab poj niam yuav tsum hnav tiab thaum mus kev sib txoos thiab mus tshaj tawm. Txawm nws paub hais tias tsis ntev tas los no tus qhev ncaj thiab ntse muab hloov lawm los nws pheej yws daws dom rau tus ub tus no tias cov kwv tij yuav tsum tsis txhob tseg hwj txwv thiab cov muam los yuav tsum hnav tiab thaum ua Yehauvas tes hauj lwm. 5: Muaj ib tug txwj laus paub ib tug kwv tij uas mus kawm ntawv qeb siab es tom qab no nws muab Yehauvas tso tseg lawm. Tus txwj laus ho pom dua ib tug kwv tij hluas yuav mus kawm ntawv qeb siab ces nws kuj txhawj thiab hais kom tus hluas ntawd thiab tus hluas ntawd niam thiab txiv tsis txhob cia tus hluas ntawd mus kawm ntawv qeb siab.

8. (1) Muaj dab tsi ho ua tau rau cov niam txiv chim rau lwm tus niam txiv? (2) Qhov uas peb coj nruj nruj ho ua li cas tau rau hauv lub koom txoos?

⁸ Cia peb mus piav txog tej yam uas raug cov niam txiv xws li 6: Koj twb sib zog ntsos cob qhia koj cov me nyuam kom coj “raws li Vajtswv Yehauvas tej lus qhuab ntuas thiab lub tswv yim.” (Efexaus 6:4) Tiam sis lwm cov niam txiv ho cia lawv cov me nyuam ua ywj siab. Xws li lawv cia lawv cov me nyuam mus ub mus no lig lig mam los tsev, tua nkees (games) los sis muaj xov tooj. Thaum koj tus me nyuam pom li hais no ces nws yuav yws tias koj coj nruj dhau rau nws. Tej zaud qhov uas muaj li no yuav ua rau koj chim rau cov niam txiv ntawd. Raws li peb tau tham, tej yam ntxwv no qhia tias thaum ib tug kwv tij nkauj muam twg txiav txim txawv dua li peb ces yuav ua rau peb hais tsis sib haum. Xws li tej thaud peb yuav yws txog tej khoom uas lawv yuav, suav ntshis tias cas lawv pheej mus ntoj ncig rau ub rau no tas zog los sis yws daws dom txog tej uas lawv saib thiab mloog. Cia peb tsis txhob muab tej yam uas peb xav coj los ua kev sib cov nyom rau hauv lub koom txoos.

9. Peb yuav tau nco ntsoov li cas? (Saib daim duab.)

⁹ Tej zaud peb yeej txiav txim siab txawv ntawm cov kwv tij nkauj muam tiam sis qhov no tsis qhia tias ib tug ua yog ib tug ua tsis yog. (Loos 14:5) Thaum hais hauv phau Vajlugkub tias “koom ib lub siab” tsuas yog hais kom sawv daws ua raws li Yehauvas tej kev cai xwb, tsis yog hais kom peb yuav tsum xav tib yam nkaus rau txhua yam. (2 Kauleethaus 13:11) Muab piv txwv tias peb sawv daws yuav mus rau ib qho chaw tiam sis yeej muaj ntau txoj hau kev mus kom txog. Yog li ntawd peb nyias xaiv nyias txoj hau kev uas zoo rau nyias mus. Zoo ib yam li ntawd, cov kwv tij nkauj muam yeej txiav txim siab ua ub ua no hauv lawv lub neej tiam sis peb sawv daws muaj tib lub zeem muag uas yog ua kom haum Yehauvas siab. Yog li ntawd, tej zaud lwm tus yuav txiav txim siab txawv ntawm peb ces peb yuav tsum hwm tej uas lawv xav.​—Mathais 7:1; 1 Thexalaunikas 4:11.

SAIB TAUS LWM TUS TEJ KEV TXIAV TXIM SIAB

10. Raws li Yakaunpaus 4:12, peb tsis muaj cai ua dab tsi thiab yog vim li cas?

¹⁰ Nyob hauv phau Vajlugkub qhia meej meej tias vim li cas peb yuav tsum tau saib taus lwm tus tej kev txiav txim siab. Xws li peb tsis muaj cai los mus tswj tej uas lwm tus xav ua. (Nyeem Yakaunpaus 4:12.) Tsuas yog Yehauvas tib leeg xwb thiaj yog tus txiav txim tau rau lwm tus thiab phua cai rau lwm tus coj. Yog li ntawd tej uas cov kwv tij nkauj muam ua, Yehauvas mam ua tus saib xyuas, tsis tas peb yuav txhawj txog. (Loos 14:10) Peb yuav tsum tsis txhob ua nyuaj lwm tus yog lawv tsis ua raws li peb xav.a

11. Peb yuav tau ua dab tsi xwv thiaj txhawb kom sawv daws hauv lub koom txoos sib koom siab? (Saib daim duab.)

¹¹ Yehauvas xav kom nws cov tib neeg sib koom siab dua li coj zoo sib thooj. Tej uas Yehauvas tau tsim qhia tias nws nyiam ntau yam! Xws li ob daim nplooj los yeej zoo tsis sib thooj. Txawm muaj tib neeg coob heev nyob hauv ntiaj teb no los yeej tsis muaj ob tug coj sib thooj nkaus. Yehauvas tau tsim peb nyias txawv nyias. Txawm li ntawd los nws xav kom peb sib koom siab thiab muaj kev sib haum xeeb. Yog li ntawd, muaj kev sib koom siab hauv lub koom txoos tseem ceeb dua li qhov uas peb xav kom sawv daws ua li peb hais.​—Loos 14:19.

SAIB TAUS TEJ UAS LWM TUS XAV

12-13. Peb yuav tau nco ntsoov li cas yog tias peb pheej xav tias ib tug tau ua “yuam kev” lawm? (Kalatias 6:1; saib lub ntsiab “Thaum Koj Tsis Nyiam Lawv Tej Kev Xav.”)

¹² Tej uas lwm tus txiav txim siab ua hauv lawv lub neej. Koj yuav tau zaum tsaws xav li no tias, ‘Puas yog tus tib neeg ntawd ua “yuam kev” los sis puas yog nws ua txawv tej uas kuv ua xwb?’ Yog ib tug ho ua yuam kev lawm tiag tiag, koj yuav tau ua zoo xav li no, ‘Ua li kuv puas muaj cai mus hais nws los sis zoo rau ib tug txwj laus mus nrog nws tham?’ Yog koj pab tau nws, cia li ua tib zoo hais nws. (Nyeem Kalatias 6:1.) Koj yuav tau nco ntsoov tias muaj ntau zaus peb ib leeg yeej xav txawv ib leeg ces tej uas koj ua yuav tsis zoo li tej uas nws ua. Thaum muaj li no tsis txhob hais lus los ntsw nws tej kev xav tiam sis cia li saib taus tej uas nws txiav txim siab ua.​—Loos 14:2-4.

¹³ Cia peb muab ua piv txwv li no tias koj thiab koj ib tug phooj ywg mus noj mov ua ke. Koj puas yuam kom nws noj cov zaub mov ib yam li koj noj? Koj yeej tsis ua li ntawd, koj yeej yuav cia nws xaiv tej zaub mov uas nws xis noj. Txawm koj tsis xis cov zaub mov nws xaiv los tsis ua li cas vim koj tsis yog tus yuav noj. Txawm yog koj los koj yeej tsis cia koj tus phooj ywg xaiv tej zaub mov uas nws xis rau koj noj. Zoo ib yam li ntawd, peb yuav tau cia lwm tus ua li lawv pom zoo es tsis txhob yuam qees tej uas peb xav rau lawv coj.

14. Yuav ua li cas koj thiaj txhawb tau kom muaj kev sib koom siab? (1 Kauleethaus 8:12, 13)

¹⁴ Tej uas koj txiav txim siab ua hauv koj lub neej. Koj yuav tau txhawb nqa kom lub koom txoos sib koom siab es tsis txhob ua rau lwm tus xav yuam kev. (Nyeem 1 Kauleethaus 8:12, 13.) Tej zaud tej uas koj txiav txim siab ua kuj tsis ua li cas. Tiam sis “tsis yog txhua yam yuav zoo rau peb ua” yog tias yuav ua rau cov kwv tij nkauj muam ib tug twg xav yuam kev. (1 Kauleethaus 10:23, 24) Tsis txhob nias qees ua ywj koj siab tiam sis ua zoo xav txog lwm tus thiab. (Loos 15:1) Raws li peb tau kawm tas los yog peb xav kom lwm tus saib taus peb tej kev txiav txim siab ces peb yuav tau saib taus lwm tus tej kev txiav txim siab tib yam nkaus. Nco ntsoov nyob rau hauv Loos 12:18 hais tias: “Ua txhua yam kom nrog sawv daws nyob sib haum xeeb li koj ua tau.” Cia peb ua txhua yam los pab kom sawv daws nyob sib haum xeeb es tsis txhob ua kom muaj kev tshawj chim.

15. Yuav ua li cas cov txwj laus thiaj pab tau kom lub koom txoos sib koom siab? (1 Kauleethaus 4:6)

¹⁵ Cov txwj laus saib taus lwm tus tej kev xav. Qhov uas cov txwj laus pab tau kom lub koom txoos nyob sib koom siab yog tsis txhob tsa cai rau sawv daws coj thiab “tsis txhob ua dhau tej uas tau muab sau tseg” rau hauv phau Vajlugkub. (Nyeem 1 Kauleethaus 4:6.) Tsis tas li ntawd, lawv tsis hais ntau tshaj li tej ntaub ntawv uas Yehauvas lub koom haum luam tawm. Thaum ib tug kwv tij nkauj muam twg thov kev pab, cov txwj laus yuav tau ua zoo saib kom tsis txhob hais raws li tej uas lawv ib txwm paub tiam sis hais raws li Vajtswv Txoj Lus.​—Yaxayas 48:17, 18.

16. Yog cov txwj laus feem coob pom zoo rau ib yam twg, vim li cas zoo rau ib tug txwj laus saib taus qhov ntawd?

¹⁶ Thaum cov txwj laus sab laj ua ke, yog tias sawv daws pom zoo rau ib yam tiam sis ib tug ho tsis pom zoo los nws yuav tau yoog sawv daws txoj kev txiav txim siab. Nco ntsoov tias cov txwj laus twb thov Yehauvas kom pub nws lub hwj huam dawb huv pab lawv tag lawm, lawv ua tib zoo tshuaj seb phau Vajlugkub hais li cas ces lawv mam li txiav txim siab txog ib yam dab tsi ua ke. Txawm cov txwj laus nyias muaj nyias kev xav los sawv daws yuav tau txhawb nqa qhov kev txiav txim siab uas feem coob pom zoo. (Efexaus 5:17) Tsis tas li ntawd, cov txwj laus yuav tau ua tib zoo tshuaj kom ua raws li tej uas hais tseg nyob hauv phau Vajlugkub thiab tej ntaub ntawv uas Yehauvas lub koom haum luam tawm es tsis txhob muab ua kom haum li lawv lub siab nyiam xwb. Xws li ib tug txwj laus twg yuav tsum tsis txhob muab ib kab lus twg hauv tej ntaub ntawv coj los hais kom haum li nws pom zoo.

17. Yog peb hwm lwm tus tej kev txiav txim siab ces yuav pab tau lub koom txoos li cas?

¹⁷ Raws li peb tau kawm tas los no peb nyias yeej muaj nyias ib tug cwj pwm thiab kev xav. Qhov uas peb muaj li no yeej zoo heev vim yuav txhawb nqa tau lub koom txoos. Nco ntsoov tsis txhob cia qhov uas peb ib leeg coj txawv ntawm ib leeg cais tau peb txoj kev sib haum xeeb. Peb yuav tau ua tib zoo kom tsis txhob ua siab lwm tus thiab saib taus lwm tus tej kev txiav txim siab. Yog peb ua li no ces peb lub koom txoos yuav muaj kev sib koom siab thiab txhua tus yuav muaj kev zoo siab.​—Phau Ntawv Nkauj 133:1; Mathais 5:9.