Kawm Ntawv Qeb Siab Los Nco Ntsoov Yehauvas

1-2. (1) Yog koj ho txiav txim siab mus kawm ntawv qeb siab, koj yuav tau ua dab tsi kam tiag? (2) Sob lus “peem tiag mus lawm tom ntej” yog li cas tiag? (Filipis 3:16)

YEHAUVAS cov tib neeg ib txhia kuj tau txiav txim siab mus kawm ntawv qeb siab vim lawv xav kom pab tau lawv nrhiav tau tej txoj hauj lwm uas yuav pab tau lawv ua Yehauvas tes hauj lwm ntxiv. Yog koj ho txiav txim siab mus kawm ntawv qeb siab, koj yuav ua li cas xwv koj thiaj li tuav rawv koj txoj kev ntseeg? (Yakaunpaus 4:8) Yav tas los koj mus kawm ntawv los koj yeej raug ntau yam uas sim koj txoj kev ntseeg los koj kuj peem dhau tej ntawd tas. Tam sim no koj ho yuav mus kawm ntawv qeb siab los nco ntsoov “peem tiag mus lawm tom ntej” xwv koj thiaj li teev tiam Yehauvas ruaj khov ruaj nreeg.​—Nyeem Filipis 3:16.

² Sob lus Kilis uas hais tias “peem tiag mus lawm tom ntej” yog hais txog cov tub rog uas taug kev ua tsheej phiaj mus rau tom hauv ntej. Yog koj txiav txim siab mus kawm ntawv qeb siab, koj yuav tau coj ib yam li cov tub rog ntawd. Koj yuav tau taug kev kam tiag nrog cov kwv tij nkauj muam ua tsheej phiaj es ua txhua yam los tsav koj txoj kev sib raug zoo nrog Yehauvas. Nyob rau hauv zaj kawm no yuav tham txog plaub lub hauv paus ntsiab lus hauv phau Vajlugkub uas koj yeej ib txwm paub lawm. Koj yuav tau rau siab ntso siv kam tiag los pab koj thaum mus kawm ntawv qeb siab thiab tom qab koj kawm tiav.

TSAV KOJ TXOJ KEV SIB RAUG ZOO NROG YEHAUVAS

3. Thaum koj mus kawm ntawv qeb siab, tej zaum yuav muaj tshwm sim li cas?

³ Tej zaum yuav muaj li no tshwm sim. Thaum koj mus kawm ntawv qeb siab, koj yuav khwv heev tshaj yav tas los. Vim koj xav mus kawm ntawv qeb siab tsawg tsuag kom tiav ces tej zaum koj yuav ua tej ub tej no tsawg zuj zus rau Yehauvas lawm. Tej zaud tej kev sib txoos los yuav tsis tshua pom koj, koj kuj tsis tshua mus qhia Vajlugkub, tsis kawm Vajlugkub rau koj tus kheej, thiab tsis thov Vajtswv.​—Tshwmsim 2:4.

4. Sob lus “tus Tswv tes hauj lwm muaj ntau heev ua, cia li rau siab ntso ua tiag” yog li cas tiag? (1 Kauleethaus 15:58)

⁴ Nyeem 1 Kauleethaus 15:58. Thaum caij tsheb kauj vab, yuav kom lub tsheb kauj vab ntog mus tus tus tsis vau mas koj yuav tau tuam ob tug tes tsis so. Zoo ib yam li ntawd, yuav kom koj txoj kev sib raug zoo nrog Yehauvas ruaj khov khwb kho, koj yuav tsum rau siab ntso ua Yehauvas tes hauj lwm tsis tseg tsis tu. Twb yog vim li no nyob hauv phau Vajlugkub thiaj li hais tias “tus Tswv tes hauj lwm muaj ntau heev ua, cia li rau siab ntso ua tiag.” Tus nru lus no tsis yog kom peb lauj sij hawm ntau ntau los ua Yehauvas tes hauj lwm tiam sis yog kom peb saib tias Yehauvas tes hauj lwm tseem ceeb dua. Nco ntsoov tias teev tiam Yehauvas yog yam uas tseem ceeb tshaj hauv koj lub neej, tsis yog mus kawm ntawv qeb siab. (Mathais 22:37) Muaj ib tug muam uas tseem hluas npe hu ua Xameetam (Samantha) hais tias, “Kuv hais rau kuv tus kheej tias yog kuv mus kawm ntawv qeb siab es haj tseem tab kaum kuv txoj kev teev tiam Yehauvas ces kuv yuav muab tso tseg.”

5. Koj yuav tau ua dab tsi xwv koj thiaj rau siab ntso ua Yehauvas tes hauj lwm?

⁵ Koj yuav tau ua li tej uas hais no ua ntej koj mus kawm ntawv qeb siab. Ua zoo saib seb yam twg tseem ceeb tshaj rau koj ua ntej. Ua tib zoo xav li no tias, ‘Kuv yuav npaj siab ua li cas es kuv thiaj li mus tau tej kev sib txoos, mus tshaj tawm txoj xov zoo, thiab kawm Vajlugkub rau kuv tus kheej?’ (Yausuas 1:8; Mathais 28:19, 20; Henplais 10:25) Nco ntsoov tias yav tag los lawm uas koj tseem mus kawm ntawv, koj twb ua tau raws li tej uas hais no. Yog koj ho xav hais tias tseem tshuav qho yam koj yuav tau ua zoo dua, koj yuav tau ua dab tsi xwv koj thiaj ua tau zoo? Koj yuav tau kub siab lug ua Yehauvas tes hauj lwm kam tiag rau lub caij uas koj mus kawm ntawv qeb siab. Txawm koj siv sij hawm los ua koj tej ntaub ntawv los tsis txhob cia koj txoj kev kawm ntawd muab koj lub sij hawm noj tag nrho es tsis muaj sij hawm teev tiam Yehauvas.​—Mathais 6:24.

6. Yog koj mus kawm ntawv qeb siab, koj yuav tau soj ntshis koj tus kheej li cas? (Saib daim duab.)

⁶ Tom qab koj pib kawm ntawv lawd, nco ntsoov tshuaj ntshuj ntshis txhua lub hlis seb Yehauvas puas tseem yog tus tseem ceeb tshaj hauv koj lub neej. Xws li seb koj puas tuaj ib zaug tseg ib zaug kev sib txoos, tuaj kev sib txoos lig, thaum mus kev sib txoos los koj pheej xav txog koj tej ntaub ntawv uas koj mus kawm, koom kev sib txoos saum huab saum cua lawm xwb, koj tseg zuj zus tsis thov Vajtswv, tsis tshua nyeem Vajlugkub los sis txawm mus tshaj tawm txoj xov zoo los koj lam mus ib nyuag pliag xwb. Yog koj tau ua li hais no lawm ces kav tsij maj nrawm nroos hloov. Tsis txhob cia txoj kev mus kawm ntawv qeb siab hloov tej uas koj ua rau Yehauvas.

“TIV THAIV KOJ TXOJ KEV XAV”

7. Thaum koj mus kawm ntawv qeb siab, tej zaud yuav ua rau koj xav li cas lawm xwb?

⁷ Tej zaum yuav muaj li no tshwm sim. Tej zaud koj yuav mus kawm tau tej chav ntawv uas qhia txog tib neeg “tej tswv yim txawj ntse thiab tej lus dag tsis muaj qab hau” xws li tej kev ntseeg tias tsis muaj Vajtswv, neeg yog txia los, thiab tso siab rau yus tus kheej. (Kaulauxis 2:8) Muaj ib tug kwv tij hluas hais tias: “Tsis yog lawv qhia peb kom paub ua ub ua no xwb tiam sis lawv qhia tej tswv yim uas tsis thooj li Yehauvas lub tswv yim. Xws li lawv hais tias peb lub neej yuav vam meej los nyob ntawm seb peb rau siab npaum li cas. Lawv cob kom yus tsis txhob vam khom Yehauvas ib qho li mas thiaj li ua rau kuv tsis tshua tso siab rau nws lawm.”

8. Vim li cas ho tseem ceeb rau koj “tiv thaiv koj txoj kev xav”? (Pajlug 5:1, 2)

⁸ Nyeem Pajlug 5:1, 2.a Nyob hauv phau Vajlugkub ceeb toom kom koj “tiv thaiv koj txoj kev xav.” Thaum peb tiv thaiv ib yam dab tsi twb yog lwm tus yuav muab txeeb los sis yuav muab ua kom puas ntsoog. Xatas thiab lub qab ntuj uas nws kav yeej nrhiav nrhw txhua txoj kev los rhuav kom koj txhob xav li Yehauvas xav. (1 Petus 5:8) Xws li lawv xav kom koj ua lub siab ywj fab ywj fwj txog tej uas Yehauvas hais tias yog thiab tsis yog, ua li tib neeg ho rhawv los li cas, thiab puas muaj Vajtswv tiag tiag. Tej zaud tej xib hwb los sis lwm tus ua rau koj xav tias lawv lub tswv yim mas tob dua tiam sis tsis muaj tseeb li ntawd. Vajtswv hais tias lawv “lub tswv yim tsis muaj qab hau.”​—1 Kauleethaus 3:18-20.

9. Koj ua tau dab tsi los mus tiv thaiv koj txoj kev xav?

⁹ Koj yuav tau ua li tej uas hais no ua ntej koj mus kawm ntawv qeb siab. Yuav kom tiv thaiv tau koj txoj kev xav, koj yuav tsum ntseeg hais tias tej uas hais hauv phau Vajlugkub yog qhov tseeb tiag tiag ua ntej koj mus kawm ntawv qeb siab. Koj yuav tau xav mus xav los tias: ‘Ua li cas kuv ho ntseeg Vajtswv? Ua li cas kuv ho paub tias phau Vajlugkub yog Vajtswv tej lus? Ua li cas kuv ho paub tias yog kuv coj lub neej raws li tej uas hais hauv phau Vajlugkub ho zoo dua li tej uas lub qab ntuj neeg qhia?’ Thaum koj tseem yau los koj yeej mus kawm ntawv nrog cov uas tsis paub Yehauvas. Thaum lawv tham txog tias neeg yog txia los ntawm tej tsiaj los, puas ua rau koj ua xyem xyav? Koj puas ntshaw mus ua lub neej ib yam li tej tub ntxhais kawm ntawv niaj hnub ua? Yog thaum ntawd nyuaj rau koj ces koj yuav tau kho li cas thiaj pab tau koj txoj kev ntseeg? Koj yuav tau tiv thaiv koj txoj kev xav tiag tiag thaum koj mus kawm ntawv qeb siab.​—2 Timautes 2:16-18.b

10. Yuav ua li cas koj thiaj tiv thaiv tau koj txoj kev xav tas zaj tas zog?

¹⁰ Thaum koj mus kawm ntawv qeb siab, nco ntsoov tshuaj koj tus kheej ntshuj ntshis li no tias: ‘Kuv puas pib xyaum coj ib yam li tej neeg uas tsis paub Yehauvas? Kuv puas toov tau thaum tib neeg qhia txog lawv tej tswv yim? Kuv puas ntseeg tias Vajtswv txoj kev kav xwb thiaj daws tau tib neeg tej teeb meem?’ Yuav kom tiv thaiv tau koj txoj kev xav, koj yuav tau nco ntsoov kawm Vajtswv Txoj Lus tsis tseg tsis tu thiab muab coj los xav mus xav los kom koj thiaj tsis ua ywj fab ywj fwj.​—1 Timautes 4:15.

SIV KOJ LUB SIJ HAWM KOM MUAJ NUJ NQIS

11. Thaum koj mus kawm ntawv qeb siab, yuav muaj li cas?

¹¹ Tej zaum yuav muaj li no tshwm sim. Kawm ntawv qeb siab yuav noj koj lub sij hawm ntau heev. Yog koj tsis ua zoo luj koj lub sij hawm ces yuav ua rau koj ntxhov siab hnyo thiab ua tsis tsheej dab tsi. Yog li ntawd, koj yuav tau saib xyuas kom koj noj qab haus huv thiab so kom txaus.

12. Koj yuav tau lauj sij hawm xwv koj thiaj ua tau dab tsi? (Efexaus 5:15, 16)

¹² Nyeem Efexaus 5:15, 16. Vim koj muaj ntau yam ua mas nyuaj heev rau koj “siv [koj] lub sij hawm kom muaj nuj nqis.” Xws li yuav tau lauj sij hawm nrog cov kwv tij nkauj muam thiab koj tsev neeg ua ke. (Phau Ntawv Nkauj 133:1; Pajlug 18:1) Koj yuav tau ua tej yam los tsav koj txoj kev sib raug zoo nrog Yehauvas. (Mathais 6:33) Tej zaud koj yuav tau ua ub ua no hauv lub cuab lub yig thiab mus ua hauj lwm. Koj yuav tau so thiab tau mus taug kev kom koj thiaj noj qab haus huv. (Tej Lus Qhia 4:6; 1 Timautes 4:8) Yuav kom koj ua tau txhua yam no, koj yuav tau teem sij hawm kom zoo zoo.

13. Koj yuav tau ua dab tsi xwv koj thiaj siv tau koj lub sij hawm kom muaj nuj nqis?

¹³ Koj yuav tau ua li tej uas hais no ua ntej koj mus kawm ntawv qeb siab. Nyob hauv phau Vajlugkub hais tias yog koj npaj ces koj yuav ua tau txhua yam tiav. (Pajlug 21:5) Yog li ntawd, koj yuav tau teem sij hawm kom zoo zoo ua ntej koj mus kawm ntawv qeb siab. Koj yuav tau zaum tsaws xav seb yav tas los lawm, koj teem sij hawm li cas rau li cas. Yog yav tas los lawd nyuaj rau koj, koj yuav tau hloov li cas koj thiaj tsis zoo li yav tas los? Koj yuav tau npaj lub sij hawm kom zoo zoo, koj thiaj tsis xav tias cas sij hawm tsawg ua luaj rau koj.

14. Piav seb koj yuav tau tshuaj koj tus kheej li cas.

¹⁴ Thaum koj mus kawm ntawv qeb siab, nco ntsoov tshuaj koj tus kheej ntshuj ntshis li no tias: ‘Kuv puas muaj sij hawm so thiab mus taug kev? Kuv puas muaj sij hawm nrog cov kwv tij nkauj muam hauv kuv lub koom txoos ua ke? Kuv puas ua tau kuv tej ntaub ntawv kom tiav rau xib hwb? Yog kuv ua tsis tiav, puas yog kuv pheej sej lub sij hawm los sis kuv muaj hauj lwm ntau dhau ua tsis yeej? Kuv tsev neeg thiab kuv cov phooj ywg puas yws tias kuv ua ub ua no ntau dhau?’ Yog koj xam pom tias koj yuav tau hloov koj lub sij hawm los sis ua raws li koj tau teem tseg ces kav tsij ua tsawg tsuag. Tsis txhob ua siab deb, kav tsij nrog tej tug uas txawj luj lawv lub sij hawm tham seb lawv ho npaj li cas lawv thiaj ua tiav.​—Pajlug 11:14.

“NROG COV NEEG TXAWJ NTSE” KAM TIAG

15. Thaum koj mus kawm ntawv qeb siab tej zaum yuav muaj li cas tshwm sim?

¹⁵ Tej zaum yuav muaj li no tshwm sim. Thaum koj mus kawm ntawv qeb siab, tej zaum cov uas nrog koj kawm ntawv ua ke yuav caw koj mus nrog lawv noj haus. Tsis tas li ntawd, koj kuj muaj ib lub siab pheej xib xav mus nrog lawv nyob ua ke vim koj niaj hnub pom lawv thiab ncawg lawv. Ntxiv ntawd, koj kuj xav twj ywm hauv nruab siab tias koj nyiam nrog lawv dua li nrog cov kwv tij nkauj muam ua ke. Yog muaj li no koj yuav tau ua zoo ceev faj vim lawv tsis nrog koj teev tiam Yehauvas ua ke. Yog koj pheej mus nrog lawv ua ke ces koj yuav xyaum coj ib yam li lawv. (1 Kauleethaus 15:33) Muaj ib tug npe hu ua Maikaum (Michael) mus kawm kho hluav taws xob tau plaub xyoos hais tias, “Ib lub lim tiam kuv siv li 40 txoos teev nrog cov neeg kuv ua hauj lwm. Lawv nyiam hais lus dev lus npua, mloog tej nkauj tsis zoo, thiab hais lus saib tsis taus poj niam ces kuv txawm pib xav ib yam li lawv xav lawm thiab.”

16. Piav seb “nrog cov neeg txawj ntse” yog li cas tiag. (Pajlug 13:20)

¹⁶ Nyeem Pajlug 13:20. Nyob hauv phau Vajlugkub ceeb toom peb txog qhov uas mus poo tej tib neeg uas tsis txhawb kom peb teev tiam Yehauvas yuav phom sij npaum li cas. Tiam sis kuj hais ntxiv tias “yog koj nrog cov neeg txawj ntse ua ke koj thiaj yuav txawj ntse.” Ob sob lus no qhia tias yog yus nrog hom neeg zoo li cas ces yus yuav zoo li ntawd. Yog li ntawd, nco ntsoov nrog nraim cov uas txhawb kom koj teev tiam Yehauvas xwb.​—Phau Ntawv Nkauj 101:6, 7; 119:63.

17. Koj yuav tau ua li cas koj thiaj tsis nrog cov tib neeg uas tsis ntseeg Yehauvas ua ke?

¹⁷ Koj yuav tau ua li tej uas hais no ua ntej koj mus kawm ntawv qeb siab. Koj yuav tau ua zoo luj seb koj yuav nrog cov tib neeg uas nrog koj kawm ntawv ntau npaum li cas. Muaj ib tug npe hu ua Rheteem (Trenton) hais tias: “Kuv yeej ua zoo rau cov uas nrog kuv kawm ntawv ua ke tiam sis kuv tsis lauj sij hawm nrog lawv ua si tom qab kawm ntawv tag. Kuv tsuas saib lawv tam li yog ib co tib neeg uas nrog kuv kawm ntawv ua ke xwb, kuv tsis suav tias lawv yog kuv cov phooj ywg.” Ua li yog txog koj no koj yuav coj li cas? Rau siab ntso nrog “cov neeg txawj ntse ua ke” es tsis txhob nrog cov uas tsis nyiam Yehauvas ua ke.c

18. Koj yuav tau nco ntsoov tshuaj ntshis li cas? (Saib daim duab.)

¹⁸ Thaum koj mus kawm ntawv qeb siab, nco ntsoov tshuaj koj tus kheej ntshuj ntshis li no tias: ‘Puas yog kuv nrog cov neeg kuv kawm ntawv ua ke ntau dhau? Puas yog kuv pib coj ib yam li lawv coj, hais lus ib yam li lawv hais, thiab xav ib yam li lawv xav? Ua li Yehauvas puas pom zoo kuv pheej mus nrog lawv ua ke?’ (Phau Ntawv Nkauj 1:1) Yog koj pom hais tias koj coj li no lawm, koj yuav tau hloov tam sid. Ua zoo saib kom koj tsuas nrog cov tib neeg nyiam Yehauvas ntaus phooj ywg xwb. Tsis txhob txaj muag qhia Vajlugkub rau cov uas koj nrog kawm ntawv ua ke vim yog ib lub cij fim zoo rau koj qhia rau lawv paub.

UA ZOO NPAJ

19. Piav seb koj yuav npaj koj tus kheej li cas ua ntej koj mus kawm ntawv qeb siab.

¹⁹ Ib tug tib neeg uas yuav mus ntoj ncig hav zoov yeej ua tib zoo npaj ua ntej. Vim nws twb ua tib zoo npaj zoo zoo lawm, txawm muaj dab tsi los raug nws nthawv nthav los nws yeej mus tau kom txog tom kawg. Zoo ib yam li ntawd, ua ntej koj yuav mus kawm ntawv qeb siab, nco ntsoov tsav koj txoj kev ntseeg, “cia li muab tag nrho Vajtswv tej cuab yeej los hnav,” thiab nco ntsoov Yehauvas hauv koj lub neej es tsis txhob qaug rau lub qab ntuj neeg txoj kev vam meej.​—Efexaus 6:11-13; 1 Kauleethaus 9:26, 27; 10:31.

20. Koj yuav “tshuaj [koj] tus kheej seb [koj] puas tuav kev ntseeg ruaj nreeg” li cas?

²⁰ Nyob hauv phau Vajlugkub hais tias: “Tshuaj nej tus kheej seb nej puas tuav kev ntseeg ruaj nreeg. Sim nej tus kheej thiaj paub tseeb tias nej zoo li cas tiag.” (2 Kauleethaus 13:5) Thaum koj mus kawm ntawv qeb siab lawm, nco ntsoov tshuaj koj tus kheej tsis so zoo li tau hais rau hauv zaj kawm no, xws li: Koj puas lauj sij hawm los tsav koj txoj kev sib raug zoo nrog Yehauvas? Koj puas tiv thaiv koj txoj kev xav kom tsis txhob xav li lub qab ntuj neeg no xav? Koj puas luj koj lub sij hawm kom zoo zoo? Koj puas nrog cov kwv tij nkauj muam sib cog phooj ywg dua li cov uas koj nrog kawm ntawv ua ke? Cov lus nug no tsis yog nug rau cov uas kawm ntawv qeb siab xwb tiam sis kuj yog hais rau cov mus ua hauj lwm thiab mus ua lwm yam tib yam nkaus. Rau siab ntso tuav rawv koj txoj kev ntseeg tab txawm yuav muaj dab tsi yuav tshwm sim los rau koj.​—Pajlug 3:5, 6.