Puas Zoo Rau Kuv Mus Kawm Ntawv Qeb Siab?

1-2. (1) Cov hluas yuav tau txiav txim siab txog dab tsi? (2) Thaum hais txog “kawm ntawv qeb siab,” yog hais txog dab tsi? (Saib “Txhais Tawm.”)

THAUM koj tseem yau, puas muaj neeg nug koj tias: “Thaum koj loj koj xav tau lub neej zoo li cas?” Lub neej uas zoo tshaj plaws ces yog lub neej teev tiam Yehauvas puv ntoob. Txawm li ntawd los koj kuj yuav tau nrhiav noj. (2 Thexalaunikas 3:10) Tej zaud koj kuj tau xav hais tias koj yuav tau nrhiav yam hauj lwm twg thiaj koob ncauj.

² Muaj ib txhia hluas kuj nrog lawv niam thiab lawv txiv tham seb lawv puas yuav mus kawm ntawv qeb siab ntxiv li cas thiaj nrhiav tau hauj lwm ua.a Tej zaud koj yuav xav tias koj yuav tau mus kawm ib yam ntawv qeb siab kom thiaj pab tau koj. Nyob rau hauv zaj kawm no yuav qhia txog phau Vajlugkub tej hauv paus ntsiab lus xwv koj thiaj li txiav txim siab tau zoo txog kev kawm ntawv qeb siab. Txawm tias zaj no hais txog cov hluas xwb los kuj yog hais rau cov laus uas xav mus kawm ntawv qeb siab tib yam nkaus. Tsis tas li ntawd, cov hauv paus ntsiab lus no yuav pab kom cov niam txiv paub pab lawv cov me nyuam txiav txim siab tau qhov zoo qhov yog.

PUAS ZOO MUS KAWM NTAWV QEB SIAB?

3. Vim li cas ib txhia Khixatias ho txiav txim siab mus kawm ntawv qeb siab?

³ Nyob rau tej qhov chaw, tsis tas yuav mus kawm ntawv qeb siab thiaj nrhiav tau hauj lwm. Hos nyob rau tej qhov mas yuav tsum tau mus kawm ntawv qeb siab thiaj tau tej hauj lwm uas koob ncauj los sis tau lub sij hawm uas pab tau koj teev tiam Yehauvas. Thaum zoo li no ces ib tug Khixatias thiaj li mus tshaj tawm tau txoj xov zoo los sis ua ntau yam hauj lwm rau Yehauvas. Tiam sis yog nws ho txiav txim siab mus kawm ntawv qeb siab ces nws yuav tau lauj sij hawm, dag zog, nyiaj txiag, thiab lwm yam uas yuav tab kaum nws lub luag hauj lwm.

4. Leej twg yog tus uas yuav tau txiav txim siab seb puas yuav mus kawm ntawv qeb siab? (Saib cov taw ntawv.)

⁴ Nyob hauv phau Vajlugkub hais tias “nyias yuav tau ua nyias tes hauj lwm.” (Kalatias 6:5) Tus nru lus no yog txhua tus uas tiav niam tiav txiv lawm yuav tau txiav txim siab seb nws puas yuav mus kawm ntawv qeb siab los sis tsis mus.b Cov niam txiv yuav yog cov uas pab lawv tej me nyuam txiav txim siab seb puas mus kawm ntawv qeb siab los tsis mus. (Efexaus 6:1) Yog lawv ua zoo pab lawv cov me nyuam ces lawv cov me nyuam yuav txawj txiav txim siab seb yuav ua li cas thaum lawv ho yog neeg laus lawm.​—Pajlug 22:6.

5. Thaum twg zoo rau ib tug xav seb nws yuav mus kawm ntawv qeb siab los tsis mus, thiab yog vim li cas? (Saib daim duab ntawm lub khaum.)

⁵ Feem ntau cov hluas ua ntej lawv kawm ntawv tiav, lawv twb txiav txim siab seb lawv yuav mus kawm ntawv qeb siab los tsis mus. Yeej yog ib qho zoo uas ib tug hluas yuav tsum nrog nws niam thiab nws txiv tham seb puas tsim nyog rau nws mus kawm ntawv qeb siab. Zoo rau lawv tsev neeg tshawb nrhiav ua ke seb lawv yuav ua li cas qhov twg thiaj yog qhov zoo. Tej zaud leej niam thiab leej txiv yuav xam pom tias nyob rau ntawm tus me nyuam lub tsev kawm ntawv kuj muaj kev cob qhia kom pab nws mus khwv tau noj los sis pab tau nws yog nws mus kawm ntawv qeb siab. Yog tus me nyuam tsis tau kawm ntawv tag los tsis txhob muab txhawj heev dhau. (Pajlug 21:5) Tom qab ib txhia me nyuam kawm ntawv tiav, lawv kuj mus nrhiav hauj lwm ua thiab pib ua ib tug tho kev ces tom qab ntawd lawv mam li txiav txim siab seb lawv puas yuav mus kawm ntawv qeb siab los tsis mus. Hos ib txhia thaum hnub nyoog nchav zog lawm lawv mam li ho mus pib kawm.

6. Yog ib tug xav mus kawm ntawv qeb siab, dab tsi thiaj yuav pab tau kom nws txawj txiav txim siab?

⁶ Yog koj xav mus kawm ntawv qeb siab, koj yuav tau thov Yehauvas pab kom koj thiaj txiav txim tau qhov yog. (Yakaunpaus 1:5) Tsis tas li ntawd, ua zoo xav txog ob yam no. Xws li ib, vim li cas ho xav mus kawm ntawv qeb siab? (Phau Ntawv Nkauj 26:2) Ob, ua zoo xav seb qhov koj mus kawm ntawv qeb siab ntawd puas pab tau koj los yog txo koj. (Pajlug 14:15) Cia peb mam mus ua zoo tshuaj ib lub ntsiab zuj zus.

VIM LI CAS HO XAV KAWM NTAWV QEB SIAB?

7. Peb yuav tau ua zoo xav li cas yog peb xav mus kawm ntawv qeb siab?

⁷ Yog tias koj xav mus kawm ntawv qeb siab, koj yuav tau rau ncoo xav li no tias, ‘Vim li cas kuv ho xav mus kawm ntawv qeb siab?’ Muaj coob leej ntau tus tib neeg mus kawm ntawv qeb siab kom lawv thiaj tau txoj hauj lwm uas lawv nyiam ua los sis tau tej txoj hauj lwm uas them zoo zoo. Txawm koj yuav xav li no los kuj tsis ua li cas. (1 Timautes 5:8) Nco ntsoov phau Vajlugkub ceeb toom peb tias nyiaj txiag tsis yog yam uas tseem ceeb tshaj thiab tsis yog ib yam uas yuav tiv thaiv tau peb mus li. (Pajlug 23:4, 5; 1 Timautes 6:8-10; 1 Yauhas 2:17) Yog koj xav mus kawm kom muaj txiag nplua nuj los sis muaj koob nto npe xwb ces tej zaum ntev mus ntev tuaj koj yuav tsis muaj kev zoo siab thiab haj tseem yuav rhuav tau koj txoj kev sib raug zoo nrog Yehauvas.

8-9. (1) Kawm ntawv qeb siab tseem ceeb npaum li cas rau peb? (Mathais 6:33) (2) Koj khaws tau dab tsi los ntawm tej uas Ntsauxefinam, Malees, thiab Ilis hais?

⁸ Kawm ntawv qeb siab tseem ceeb npaum li cas rau koj? Nco ntsoov tias tsis muaj ib yam uas yuav tseem ceeb tshaj qhov uas peb teev tiam Yehauvas. (Mathais 22:37, 38; Filipis 3:8) Yog li ntawd, kawm ntawv qeb siab tsuas yog ib feem los mus pab txhawb nqa peb lub neej kom peb thiaj li tau zoo teev tiam Yehauvas tag nrho peb lub siab lub ntsws.​—Nyeem Mathais 6:33.

⁹ Cia peb mus tham txog ib txhia Khixatias uas lawv tau ua tib zoo xav txog lawv txoj kev kawm ntawv qeb siab. Nyob teb chaws Tshiv Lim (Chile) muaj ib tug npe hu ua Ntsauxefinam (Josefina) hais tias: “Kuv mus kawm ntawv qeb siab kom kuv thiaj tau ib txoj hauj lwm kom kuv muaj sij hawm teev tiam Yehauvas. Kuv ua zoo saib kom kuv mus kawm los tsis txhob cuam tshuam tau kuv txoj kev sib raug zoo nrog Yehauvas.” Muaj ib tug muam npe hu ua Malees (Morine) txiav txim siab mus kawm txiav plaub hau ib xyoos. Nws hais tias: “Kuv lub zeem muag yog xav mus pab rau tej thaj tsam uas tsis muaj cov Tim Khawv coob pes tsawg. Tom qab kuv kawm tag, kuv thiaj mus ua hauj lwm txiav plaub hau thiab tseg me ntsis nyiaj kom kuv thiaj muaj nyiaj tsiv mus. Thaum kuv mus txog ntawm qhov chaw uas kuv xav mus ntawd ces qhov uas kuv kawm txiav plaub hau kuj pab kuv nrhiav tau hauj lwm.” Muaj ib tug npe hu ua Ilis (Iris) mus kawm ua hniav. Nws hais tias: “Kawm ntau yam kuj ua tsis tau kom yus muaj kev zoo siab. Tiam sis yuav kom muaj taus kev zoo siab thiab muaj txawm peem mas Yehauvas yuav tsum yog thawj yam hauv koj lub neej.” Peb yeej muaj taus kev zoo siab mus ib txhiab ib txhis yog tias peb muaj kev sib raug zoo nrog Yehauvas.

KAWM NTAWV QEB SIAB PUAS PAB KOJ?

10. Raws li 2 Kevcai 32:29, dab tsi thiaj pab tau kom koj txiav txim siab seb yuav ua zaj twg?

¹⁰ Tej zaud koj twb xav rau hauv nruab siab tias koj yuav mus ua ib yam hauj lwm. Tiam sis kuj zoo rau koj nrhiav seb puas muaj lwm txoj hau kev. (Muab piv rau Pajlug 18:17.) Tam sim no kuj muaj kev kawm ntau dua li yav tag los lawm, xws li kuj muaj kev kawm nyob saum huab saum cua lawm thiab. Tsis tas li ntawd, koj yuav tau ua zoo xav seb koj puas nrhiav tau tej txoj hauj lwm koob ncauj es tsis tas mus kawm ntawv txuas ntxiv. Xws li nyob rau teb chaws Filees (Finland) muaj ib tug muam npe hu ua Ntsau-enam (Johanna) kuj tsis mus kawm ntawv qeb siab. Nws hais tias: “Tom qab kuv kawm ntawv tiav, kuv cia li mus nrhiav hauj lwm ua thiab ua ib tug tho kev. Txawm kuv ib sij hloov ib txoj hauj lwm los kuv xam pom tias Yehauvas yeej ib txwm pub kom kuv muaj txawm peem.” Nco ntsoov tias txawm koj yuav txiav txim siab li cas los yeej muaj qhov phem qhov zoo. Yog li ntawd koj yuav tau zaum tsaws es muab luj seb qhov twg hnyav dua, qhov twg sib dua. (Nyeem 2 Kevcai 32:29; 1 Kauleethaus 10:23) Koj yuav tau ua zoo xav txog tej uas tseem yuav hais tuaj no.

11. Vim li cas koj yuav tau ua zoo tshuaj lub sij hawm uas koj mus kawm ntawv qeb siab? (Saib cov duab.)

¹¹ Lub sij hawm uas koj yuav siv. Ua zoo xav seb koj yuav siv sij hawm ntau npaum li cas los mus kawm ntawv thiab ua tej ntaub ntawv uas xib hwb muab. Ua li koj puas tseem tshuav sij hawm los teev tiam Yehauvas? Koj puas muaj sij hawm los saib xyuas koj tsev neeg? (Filipis 1:10) Tom qab koj kawm ntawv ib hnub tag, koj puas sab sab lim lim es npaj tsis tau mus kev sib txoos los sis kawm Vajlugkub rau koj tus kheej? Nyob rau teb chaws Eedias muaj ib tug kwv tij npe hu ua Ntselas (Jeroz) hais tias: “Thaum kuv mus kawm ntawv qeb siab lawm ces kuv yeej tsis tshua mus tshaj tawm txoj xov zoo thiab tsis tshua mloog thaum mus kev sib txoos. Muaj tej zaud kuv haj tseem tsis mus kev sib txoos thiab. Kuv rov qab muab xav mas yeej tsis tsim nyog kuv siv dag siv zog ntau npaum no los mus kawm ntawv qeb siab.” Kuj muaj tej co kev kawm uas tsis noj sij hawm ntau. Tsuas mus me ntsis thiab tej thaud cov xib hwb kuj tsis muab ntawv ntau rau yus ua. Xws li nyob rau teb chaws Mauxanpij (Mozambique) muaj ib tug muam npe hu ua Lanpekam (Rabeca) zoo siab heev vim nws txiav txim siab tau qhov zoo. Nws hais tias: “Kuv mus kawm ntawv qeb siab ib hnub ob txoos teev xwb. Yog li ntawd, kuv haj tseem ua tau ib tug tho kev.”

12. Thaum hais txog kawm ntawv qeb siab, koj yuav siv koj lub sij hawm li cas thiaj muaj nuj nqis? (Tej Lus Qhia 12:1)

¹² Yuav kawm ntev li cas. Ua zoo xav seb koj yuav kawm pes tsawg lub hlis los sis pes tsawg xyoo thiaj kawm tiav qeb siab. Ua li puas tsim nyog koj lauj sij hawm mus kawm? (Efexaus 5:15-17) Yog koj yog ib tug hluas, thaum koj mus kawm ntawv qeb siab, ua li koj puas haj tseem muaj sij hawm ua Yehauvas tes hauj lwm? (Nyeem Tej Lus Qhia 12:1.) Puas muaj tej qhov kev kawm ntawv qeb siab uas tsis tshua noj sij hawm ua luaj twg es koj haj tseem ua tau qhov hauj lwm uas koj xav ua? Xws li muaj tej co kev kawm tsuas qhia tsawg tsuag kom koj nkag siab koj tes hauj lwm xwb ces kuj tsis poob nyiaj thiab noj sij hawm ntau. Nyob rau teb chaws Tshiv Lim muaj ib tug kwv tij npe hu ua Maliyaum (Mario) hais tias: “Kuv txiav txim siab mus ib lub tsev kawm ntawv uas tsuas siv ob xyoos los kawm xwb ces tiav lawm. Ib lub lim tiam twg kuv tsuas kawm plaub hnub xwb ces kuv haj tseem muaj sij hawm ua ib tug tho kev.”

13. Muaj li cas xwb thaum mus kawm ntawv deb vaj deb tsev?

¹³ Yuav kawm qhov twg. Tej zaud koj kuj nrhiav tau tej lub tsev kawm ntawv uas nyob ze vaj ze tsev. Tiam sis yog koj ho nrhiav tau tej lub uas nyob deb vaj deb tsev lawm, koj yuav ua li cas? Los sis koj ho yuav tau mus nyob rau ntawm lub tsev kawm ntawv qeb siab ntawd? Nco ntsoov tias thaum koj ncaim koj tsev neeg mus nyob rau ib qho mas yuav phom sij rau koj txoj kev ntseeg vim koj mus poo cov tib neeg uas tsis nrog koj teev tiam Yehauvas. (Pajlug 22:3; 1 Kauleethaus 15:33) Nyob rau Mauxanpij muaj ib tug kwv tij hu ua Matias mus kawm ntawv qeb siab ib xyoos tiam sis nws kuj xav txog lig. Nws hais tias: “Kuv mus nyob kiag rau hauv lub tsev kawm ntawv qeb siab uas nyob ntuj ncua kev deb. Kuv raug ntxias txhua txhua hnub kom mus ua tej yam tsis zoo. Kuv xav qhia rau txhua tus paub kom kawm tej tsev kawm ntawv nyob ze yus tsev neeg.” Nyob teb chaws Lav Xias muaj ib tug muam hais tias: “Vim kuv nrog kuv tsev neeg nyob, kuv thiaj tsis raug sim ib yam li cov uas mus nyob kiag rau ntawm lub tsev kawm ntawv.” Tej zaud koj kuj yuav nrhiav tau tej lub tsev kawm ntawv qhia saum huab saum cua rau koj kawm.

14. Qhov hauv paus ntsiab lus uas nyob hauv Lukas 14:28 pab tau koj txiav txim siab li cas txog kev kawm ntawv qeb siab?

¹⁴ Yuav kim npaum li cas. Muaj tej txhia tsev kawm ntawv kuj tsis kim ua luaj twg los sis muaj nom tswv pab them ces kuj zoo rau yus mus kawm kom paub ub paub no thiab txawj ua ub ua no xwv thiaj nrhiav tau tej hauj lwm uas koob ncauj. Hos muaj tej txhia tsev kawm ntawv kim heev. Tej zaud kuj yuav tau poob nyiaj ntiav tej xib hwb los pab ntxiv xwv thiaj tau mus kawm lub tsev kawm ntawv qeb siab ntawd. Hos muaj tej txhia mus kawm ntawv tag mas haj tseem tshuav tej tog nuj nqis nyob tom qab. Nyob rau Mauxanpij muaj ib tug npe hu ua Adixees (Adilson) mus kawm ntawv qeb siab mas ua rau nws xav txog lig kawg. Nws hais tias: “Kuv niam tais thiab yawm txiv noj mov zaub tsuag kom thiaj li them taus kuv mus kawm ntawv plaub xyoos.” Ua ntej koj yuav txiav txim siab mus kawm ntawv qeb siab, zaum tsaws xav cov lus no ua ntej: ‘Yog mus kawm no yuav kim npaum li cas? Kuv los sis kuv tsev neeg puas them taus? Puas muaj tej lub tsev kawm ntawv uas pheej yig dua?’ (Nyeem Lukas 14:28.) ‘Yog kuv tiv nuj tiv nqi no yuav siv sij hawm ntev npaum li cas them rov qab? Ua li thaum kuv mus ua hauj lwm, kuv puas khwv tau los them tej nuj nqis kuv txais kawm ntawv thiab muaj txaus noj txaus siv?’​—Pajlug 22:7.

15. Vim li cas zoo rau koj saib ua ntej seb puas muaj hauj lwm ua tso koj mam mus kawm ntawv qeb siab?

¹⁵ Puas muaj hauj lwm ua. Ua zoo xav seb ntawm qhov koj nyob los sis koj xav mus nyob puas muaj hauj lwm txaus ua. Tom qab koj kawm ntawv tag, koj puas yuav nrhiav tau hauj lwm ua? Muaj tej co kev kawm tsis qhia txog txoj hauj lwm koj yuav ua ntawd tiam sis tsuas qhia txog lawv tej tswv yim xwb. (Kaulauxis 2:8) Nyob rau teb chaws Eedias muaj ib tug muam hais tias: “Tej uas kuv mus kawm tsuas qhia kom kuv txawj ntse xwb, pab tsis tau kuv kom txawj ua ub ua no ces tib neeg tsis kam txais kuv ua hauj lwm.” Tom qab tej txhia kawm ntawv tag, tsis tshua muaj hauj lwm pes tsawg ua. Nyob rau teb chaws Xetshaum Afikas Lephanplis (Central African Republic) muaj ib tug kwv tij npe hu ua Xunplis (Sublime) kawm kho lub tshuab cua txias. Nws hais tias: “Ntawm qhov chaw uas peb nyob, tib neeg puav leej txawj kho ub kho no ces tom qab kuv kawm tag los nrhiav tsis tau hauj lwm ua.”

16. Vim li cas zoo rau koj tshuaj ua ntej seb puas muaj hauj lwm ua tso mam mus kawm ntawv qeb siab?

¹⁶ Ua zoo xav txog tom qab koj kawm tiav es koj mus ua txoj hauj lwm ntawd, koj puas yuav nyiam? (Tej Lus Qhia 3:12, 13) Cov tib neeg koj nrog ua puas coj zoo? Lawv puas sib tw ua hauj lwm? Koj txoj hauj lwm ntawd puas ntxhov siab los sis phom sij rau koj? Yuav them koj pes tsawg thiab puas txaus them koj tej nuj nqis? Ua li koj puas yuav tau kawm ntxiv kom koj thiaj tau txoj hauj lwm ntawd ua? Ib yam uas tseem ceeb tshaj yog koj puas ua tau Yehauvas tes hauj lwm? (Tej Lus Qhia 12:13) Yog thaj chaw uas koj nyob tsis tshua muaj hauj lwm ces tau txoj twg ces koj lam ua txoj ntawd. Tiam sis qhov uas koj txiav txim siab mus kawm ntawv qeb siab ntawd yuav raug rau koj lub neej yav tom ntej thaum koj mus nrhiav hauj lwm ua. Nyob rau teb chaws Eedias muaj ib tug hu ua Tanpitham (Tabitha) mus kawm xaws tshuab tau rau lub hlis. Nws hais tias: “Kuv txiav txim siab mus kawm xaws khaub ncaws kom thiaj li pab tau kuv ua ib tug tho kev. Qhov hauj lwm no yog ib txoj uas yuav tsum muaj tas mus li, thaum twg kuv xav ua ces kuv mam li mus ua, thiab kuv kuj tsis poob nyiaj poob txiaj ntau ua luaj twg yuav khoom xaws khaub ncaws.” Tom qab Tanpitham kawm tiav, nws kuj nrhiav tau hauj lwm los pab nws tho kev.

17. (1) Puas muaj dab tsi ntxiv uas koj ua tau ua ntej koj txiav txim siab mus kawm ntawv qeb siab? (2) Phau Vajlugkub tej hauv paus ntsiab lus twg pab tau kom koj txawj txiav txim siab? (Saib lub ntsiab “Ua Zoo Xav Txog Phau Vajlugkub Tej Hauv Paus Ntsiab Lus.”)

¹⁷ Nyob rau hauv zaj kawm no peb kawm tau ntau yam tseem ceeb uas peb yuav tau ua tib zoo xav txog. Muaj dab tsi ntxiv uas peb yuav tau mus saib ua ntej peb txiav txim siab mus kawm ntawv qeb siab? Mus tshawb nrhiav seb lub tsev kawm ntawv qeb siab los sis lawv lub vej xaij zoo li cas. Tsis tas li ntawd, mus nrhiav seb puas muaj hauj lwm rau yam uas koj yuav kawm ntawd. Ntxiv ntawd, mus nrog cov uas twb kawm tiav lawd los sis cov uas ib txwm ua txoj hauj lwm ntawd tham. (Pajlug 13:10) Nug lawv seb qhov zoo thiab qhov phem ntawm tes hauj lwm ntawd yog li cas. Nco ntsoov mus nug cov uas ib txwm teev tiam Yehauvas seb lawv puas paub muaj hauj lwm dab tsi los sis kev kawm dab tsi rau koj mus ua. (Pajlug 15:22) Tej zaud lawv kuj yuav qhia tau tej txoj hauj lwm uas koj twb ras tsis txog tias koj yuav mus ua.

18. Peb yuav tau nco ntsoov li cas?

¹⁸ Raws li peb tau kawm tag los lawd mas kawm ntawv qeb siab kuj muaj qhov phem qhov zoo. Yog li ntawd, txhob ua siab deb kav tsij thov Vajtswv pab. Nco ntsoov tias mus kawm ntawv qeb siab yeej pab tau kom koj nrhiav tau tej txoj hauj lwm los koob ncauj tiam sis qhov uas koj nrog Vajtswv sib raug zoo thiaj li ua rau koj muaj kev zoo siab tiag. (Phau Ntawv Nkauj 16:9, 11) Yehauvas yeej yuav saib xyuas nws cov tib neeg tab txawm lawv yuav kawm ntawv los tsis kawm. (Henplais 13:5) Nyob rau zaj kawm txuas ntxiv tom ntej yuav tham txog seb koj yuav tuav rawv koj txoj kev sib raug zoo nrog Yehauvas li cas yog koj ho mus kawm ntawv qeb siab.