Cov Laus Haj Tseem Pab Tau Lub Koom Txoos Heev

Tej zaud koj kuj zoo li tus muam uas hais tas no vim koj lub hnub nyoog zoo yam li lub hnub uas qaij nroos rau tim npoo ntuj lawm tiag. Txawm koj twb teev tiam Yehauvas tau ntau ntau xyoo lawm los tej zaum koj tseem xav qis qis txog koj tus kheej vim koj laus lawm es ua tsis taus dab tsi. Tej zaud koj yuav muab koj lub neej tam sim no piv rau koj lub neej yav tas los lawm. Puas muaj ib yam dab tsi yuav pab tau koj kom tsis txhob xav ntev xav ntau?

YEHAUVAS XAV KOM KOJ UA DAB TSI?

Koj yuav tau zaum tsaws xav nug koj tus kheej tias, ‘Yehauvas xav kom kuv ua dab tsi?’ Nyob hauv 2 Kevcai 6:5 hais tias: “Nej yuav tsum hlub [Yehauvas] uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog.”

Raws li nqe ntawd hais, Yehauvas xav kom koj teev tiam nws kawg siab kawg ntsws, kawg plab kawg plawv, thiab kawg dag kawg zog. Yog koj ua li no yuav pab kom koj tsis txhob muab koj tus kheej piv rau lwm tus los sis piv rau koj lub neej yav tag los lawm.

Thaum koj tseem hluas, koj yeej ua tag nrho koj rab peev xwm rau Yehauvas li koj ua tau thaum ntawd. Txawm niaj hnub nim no koj laus los koj maj mam ua raws li koj ua tau rau Yehauvas. Yog koj nco ntsoov li no ces yuav pab tau kom koj xam pom tias yav thaud thiab niaj hnub no los koj yeej muab sib npaug zog rau Yehauvas.

KOJ PAB TAU LWM TUS

Tsis txhob muab muab qhov uas koj laus los txiav txwv koj. Thaum koj tseem hluas koj yuav ua tsis tau ntau npaum li thaum koj laus lawm. Xws li:

Qhia seb koj kawm tau dab tsi hauv koj lub neej rau lwm tus. Muaj tej tug nyob hauv phau Vajlugkub kuj xav li no tias:

Vaj Ntxwv Daviv: “Nimno kuv yog ib tug neeg laus, kuv ua neej nyob los tau ntev lawm, tiamsis kuv tsis pom [Yehauvas] muab ib tug neeg zoo tso povtseg rau qhov twg, lossis cia nws tej menyuam mus thov khawv noj.”​—Phau Ntawv Nkauj 37:25.

Yausuas: “Nimno kuv tsis muaj pestsawg xyoo nrog nej nyob lawm. Nej yeej paub hais tias, [Yehauvas] uas yog nej tus Vajtswv twb pub ib puas tsav yam zoo rau nej raws li nws tau coglus tseg rau nej tsis poob ib los li.”​—Yausuas 23:14.

Tej zaud koj kuj tau hais ib yam li Daviv thiab Yausuas nkawd hais dua lawm thiab. Tej lus nkawd hais no tseem ceeb heev vim nkawd twb ua neej laus nkoos thiab raug ntau yam dua los lawm nkawd thiaj li hais li nkawd hais.

Yog tias koj twb teev tiam Yehauvas tau ntau xyoo lawm, koj yeej piav tej uas koj tau ntsib thiab tej koob hmoov uas koj tau rau lwm tus. Koj puas nco qab ib lub sij hawm twg uas koj pom Yehauvas foom koob hmoov rau nws cov tib neeg? Yog koj pom no muab qhia rau lwm tus paub thiab! Yog lwm tus hnov ntshe yuav txhawb lawv lub dag zog kawg nkaus li.​—Loos 1:11, 12.

Ib qho uas yuav txhawb lwm tus yog koj mus kev sib txoos tim ntsej tim muag npaum li koj mus tau. Thaum koj ua li no yuav txhawb tau koj tus kheej thiab cov kwv tij nkauj muam heev. Khonim hais tias: “Mus kev sib txoos tim ntsej tim muag pab tau kom kuv tsis txhob qaug zog. Thaum kuv pom cov kwv tij nkauj muam mas ua rau kuv lub siab kaj nrig. Tej thaud kuv muab me ntsis khoom pub rau cov kwv tij nkauj muam kom qhia tias kuv ris lawv txiaj ntsig. Ntxiv ntawd, kuv kuj npaj siab zim nrog lawv mus tshaj tawm txoj xov zoo.”

YEHAUVAS YEEJ NCO NTSOOV TEJ KOJ UA RAU NWS

Muaj coob leej ntau tus hauv phau Vajlugkub uas Yehauvas hlub lawv heev tab txawm lawv ua tsis tau ntau npaum li thaum lawv tseem hluas. Xws li Xime-oos uas yog ib tug neeg Ixayees laus laus uas tseem ua neej nyob thaum Yexus yug los. Thaum Xime-oos mus rau ntawm lub tuam tsev, nws kuj pom cov tub hluas ua hauj lwm fab taws ntsos rau ub rau no ces tej zaud kuj ua rau nws xav tias nws ua tsis tau hauj lwm rau Yehauvas li yav thaud lawm. Tiam sis Yehauvas twb tsis xav li ntawd rau nws hlo li. Yehauvas tsuas pom tias Xime-oos yog “ib tug neeg ncaj ncees uas paub ntshai” nws. Yog li ntawd, Yehauvas thiaj li cia nws muaj lub cij fim los pom Yexus thaum nws tseem mos liab. Yehauvas kuj siv Xime-oos faj lem tias Yexus yuav yog tus Mexiyas! (Lukas 2:25-35) Yehauvas tsis saib qhov uas Xime-oos laus tiam sis nws tsuas pom Xime-oos txoj kev ntseeg xwb thiab “lub hwj huam dawb huv nrog nraim nws.”

Txawm koj los nco ntsoov tias Yehauvas saib koj txoj kev ntseeg rau nqi tab txawm koj laus thiab ua tsis tau ntau yam. Nyob rau hauv 2 Kauleethaus 8:12 hais tias: “Vajtswv yeej xav kom peb pub raws li peb muaj tsis yog raws li peb tsis muaj.”

Nco ntsoov xav txog tej yam koj ua tau xwb. Xws li xav seb koj mus qhia tau Vajlugkub li cas rau li cas tab txawm koj mus ib nyuag chim los sis ib nyuag tsam xwb. Tej zaud kuj zoo rau koj hu xov tooj los sis xa ib tsab ntawv mus txhawb cov kwv tij nkauj muam. Txawm koj ua tej yam me me li no xwb los yeej raug lawv siab heev vim koj yog ib tug uas twb teev tiam Yehauvas tau ntev loo lawm.

Muaj tej tug mus tsis taus qhov twg. Mus nyeem ib zaj uas sau txog ib tug muam nyob rau Afika sab hnub tuaj lub neej ntawm lub ntsiab “Cawm Nws Txoj Sia.”

Nco ntsoov tias qhov uas teev tiam Yehauvas tau ntau ntau xyoo los lawm thiab haj tseem teev tiam Yehauvas quj qees yuav txhawb tau lwm tus heev. Koj tso tau ib tug yam ntxwv kom ua siab ntev thev. Nyob rau hauv Henplais 6:10 hais tias: “Vajtswv yog tus ncaj ncees! Nws yeej yuav nco ntsoov tej haujlwm uas nej tau ua los lawm thiab qhov uas nej pab cov ntseeg ib yam li niaj hnub no nej tseem pab. Nej ua li ntawd twb yog vim nej muab siab npuab Vajtswv.”

NRHIAV UB NRHIAV NO UA

Tib neeg tshawb pom tias cov laus tsis hais poj niam los sis txiv neej uas pheej pab lwm tus mas lawv noj qab haus huv, tsis ua tim toob, thiab ua neej nyob ntev dua.

Qhov no tsis yog txhais hais tias pab lwm tus ces yuav tsis txawj laus. Tsuas yog Vajtswv txoj kev kav thiaj tshem tau txoj kev laus, kev txhaum thiab kev ploj kev tuag xwb.​—Loos 5:12.

Tiam sis yog koj ua li Yehauvas hais thiab rau siab ntso pab lwm tus los mus paub Yehauvas ces koj txoj kev vam kev cia siab yuav ruaj khov khwb kho thiab haj tseem yuav pab tau koj txoj kev noj qab haus huv. Cov laus, nco ntsoov tias Yehauvas yeej saib txhua yam koj ua rau nws rau nqi thiab lub koom txoos los kuj saib koj muaj nqis vim koj tuav rawv koj txoj kev ntseeg.