Koj Yeej Muaj Nuj Nqis

1-2. Dab tsi thiaj pab tau kom peb xam pom tias peb muaj nuj nqis rau Vajtswv?

YEHAUVAS cov tib neeg ib txhia saib lawv tus kheej qis qis vim lwm tus ua saib tsis taus lawv. Yog hais tias koj ho tau xav li no yuav ua li cas koj thiaj paub tias Yehauvas yeej saib koj rau nqi?

² Tej zaud zoo rau koj mus nyeem tej zaj uas hais nyob hauv phau Vajlugkub seb Yexus coj li cas rau cov tib neeg uas luag saib tsis taus. Qhov uas Yexus saib taus thiab txuag lawv ntsej muag ntawd qhia tau tias Yehauvas thiab Yexus nkawd saib lawv muaj nuj nqis heev. (Yauhas 5:19; Henplais 1:3) Nyob rau hauv zaj no yuav tham txog tias (1) Yexus pab kom tib neeg pom tias lawv muaj nuj nqis npaum li cas, thiab (2) yuav ua li cas peb thiaj ntseeg tias peb muaj nuj nqis rau Vajtswv.​—Hakais 2:7.

YEXUS PAB TIB NEEG POM TIAS LAWV MUAJ NUJ NQIS

3. Yexus coj li cas rau cov tib neeg hauv Kalilais uas tuaj cuag nws?

³ Thaum Yexus mus tshaj tawm rau hauv Kalilais, tib neeg txawm tuaj sis laub sis lug tuaj mloog Yexus thiab kom Yexus kho lawv tej mob. Thaum Yexus pom cov tib neeg no mas nws hlub lawv kawg li vim lawv “zoo li pab yaj uas tshaib tshaib tsis muaj tus tswv yug.” (Mathais 9:36) Tiam sis cov thawj coj zoo tsis thooj li ntawd. Lawv saib tej tib neeg tsis khuab qhov muag thiab lawv tab meeg cem hais tias cov neeg ntawd yog cov uas “raug Vajtswv foom tsis zoo lawm.” (Yauhas 7:47-49) Txawm li ntawd los Yexus yeej lauj sij hawm los qhia tib neeg thiab kho lawv tej mob kom zoo du dais. (Mathais 9:35) Tsis tas li ntawd Yexus kuj cob qhia nws cov tub txib kom txawj mus qhia tib neeg thiab nws kuj muab hwj chim rau lawv kho tib neeg tej mob vim nws mus ncav tsis cuag txhua tus.​—Mathais 10:5-8.

4. Peb khaws tau dab tsi los ntawm qhov uas Yexus saib taus cov neeg uas luag saib tsis khuab qhov muag?

⁴ Qhov uas Yexus txuag thiab saib taus cov tib neeg uas tuaj ntawd qhia tau tias Yehauvas thiab Yexus nkawd saib tib neeg muaj nuj nqis kawg nkaus li. Yog hais tias koj tseem saib koj tus kheej tsis muaj nuj nqis quj qees ces koj yuav tau rov qab mus nyeem seb Yexus coj li cas rau tib neeg. Yog koj ua li no ces koj yuav pom tias koj muaj nuj nqis npaum li cas rau Yehauvas.

5. Piav seb tus poj niam uas Yexus ntsib ntawd lub neej zoo li cas.

⁵ Yexus tau pab ib tug poj niam uas nchuav cev tau 12 lub xyoos. (Malakaus 5:25) Tus poj niam no lub neej mas txom nyem kawg li vim nws nchuav cev ces luag suav tias nws yog neeg qias tsis huv. Yog li ntawd, tsis muaj neeg kam txav ti nws kiag li. Tsis tas li ntawd, nws kuj nrog tsis tau luag tej pe hawm Yehauvas ua ke. (Levis Kevcai 15:19, 25) Tus poj niam no tsis yog nyuaj siab rau nws tus mob xwb tiam sis nws kuj saib nws tus kheej qis qis thiab.​—Malakaus 5:26.

6. Tus poj niam ua dab tsi es nws tus mob thiaj li zoo?

⁶ Tus poj niam uas nchuav cev no paub tias nws qias tsis huv ces nws thiaj li txaj muag mus cuag Yexus tim ntsej tim muag kom kho nws. Nws kuj ntshai tsam Yexus ho cem nws ces nws thiaj li ua twj ywm mus kov Yexus lub tw tsho kom nws tus mob zoo xwb. (Malakaus 5:27, 28) Tom qab ntawd, nws tus mob txawm zoo hlo ces Yexus thiaj nug seb leej twg kov Yexus lub tw tsho. Tus poj niam ntawd thiaj li lees hlo tias nws yog tus kov. Ua li Yexus ho coj li cas xwb?

7. Yexus coj li cas rau tus poj niam uas nchuav cev ntawd? (Malakaus 5:34)

⁷ Yexus saib taus thiab ua tib zoo hais tus poj niam ntawd xwb. Yexus toov tau tias nws “ntshai tshee na,” Yexus thiaj hu nws tias “me ntxhais.” Zaum no yog tib zaug uas Yexus hu ib tug poj niam li ntawd. Qhov uas Yexus hu nws li no qhia tau tias Yexus saib taus thiab hlub nws heev. (Nyeem Malakaus 5:34.) Yog Yexus tsis txawj xav li no mas txawm yog tus poj niam ntawd tus mob zoo lawm los ntshe nws yuav puas siab puas ntsws tas. Tiam sis vim Yexus txawj xav, pab tau tus poj niam pom tias nws muaj nuj nqis heev rau Yehauvas.

8. Maiv raug dab tsi hauv nws lub neej?

⁸ Niaj hnub nim no Vajtswv cov tib neeg ib txhia uas muaj mob muaj nkeeg thiaj ua rau lawv saib lawv tus kheej qis qis. Xws li nyob hauv teb chaws Nplaxi (Brazil) muaj ib tug muam npe hu ua Maiva thiab thaum nws yug los nws lub cev tsis meej xeeb. Nws hais tias: “Thaum kuv mus kawm ntawv tib neeg thuam luag kuv thiab hu kuv npe ua dog ua dig. Txawm kuv tsev neeg kiag los twb tsis hlub kuv li thiab.”

9. Ua cas Maiv ho xam pom tias nws muaj nuj nqis rau Yehauvas?

⁹ Thaum Maiv los ntseeg Yehauvas, cov kwv tij nkauj muam hauv nws lub koom txoos nplig nws siab thiab pab nws kom saib nws tus kheej rau nqi ib yam li Yehauvas saib nws. Nws hais tias: “Muaj coob leej ntau tus kwv tij nkauj muam pab kuv heev! Kuv ua Yehauvas tsaug uas muaj lawv los hlub kuv.”

10. Maivliag Madalas tej kev nyuaj siab yog dab tsi? (Saib cov duab.)

¹⁰ Cia peb mus tham txog Maivliag Madalas seb Yexus tau pab kom nws pom tias nws muaj nqis npaum li cas rau Yehauvas. Maivliag raug xya tus dab tsim txom nws mas ua rau tib neeg ntshai ntshai nws thiab tsis kam mus ti nws. (Lukas 8:2) Ntshe lub sij hawm ntawd Maivliag saib yam li nws poob ib lub qhov ntuj uas tawm tsis tau los vim nws txog qhov twg los tus twg tsis nyiam thiab nws kuj txaj muag kawg li. Txij ntua hnub Yexus ntiab cov dab tawm tag ces Maivliag kuj raws Yexus ncuj nciav rau ub rau no lawm xwb.

11. Yexus ua qhia li cas tias Maivliag Madalas muaj nuj nqis heev rau Vajtswv? (Saib cov duab.)

¹¹ Yexus caw Maivliag Madalas nrog nws mus tshaj tawm ib lub zos rau ib lub zos mas Maivliag kuj hnov txhua yam uas Yexus tau qhia.b Hnub Yexus sawv rov qab los Maivliag Madalas yog thawj tug thwj tim uas Yexus hais lus rau. Tsis tas li ntawd, Yexus kuj txib kom Maivliag mus qhia rau nws cov tub txib tias nws sawv rov qab los lawm. Tos Yexus ua tej no los nws xav kom Maivliag pom hais tias Yehauvas hlub Maivliag heev!​—Yauhas 20:11-18.

12. Ua cas Diav thiaj saib nws tus kheej tsis rau nqi?

¹² Muaj coob leej ntau tus tib neeg kuj xav ib yam li Maivliag Madalas es saib lawv tus kheej qis qis. Nyob rau teb chaws Xapee (Spain) muaj ib tug muam npe hu ua Diav qhia hais tias nws niam twb yuav muab nws rho thaum nws xeeb rau hauv nws niam plab. Thaum nws yau nws tsuas nco nws niam cem nws nkaus nkaus xwb. Nws hais tias: “Kuv ntshaw ntshaw kom lwm tus hlub kuv. Kuv niam ib txwm cem kuv tias kuv yog ib tug neeg phem mas ua rau kuv xav tias tsis muaj leej twg yuav hlub kuv.”

13. Muaj dab tsi pab tau Diav pom tias nws muaj nuj nqis rau Yehauvas?

¹³ Qhov uas pab tau Diav yog nws kawm Vajlugkub, thov Vajtswv, thiab muaj cov kwv tij nkauj muam hais thiab ua zoo rau nws. Nws hais tias: “Kuv tus txiv niaj zaug hais rau kuv tias nws hlub kuv thiab hais tias kuv coj cwj pwm zoo heev. Cov kwv tij nkauj muam los kuj hais ib yam li kuv tus txiv hais thiab.” Yog li ntawd, ua zoo tshuaj hauv koj lub koom txoos seb puas muaj tej tug uas koj hais tau qho lo lus zoo los sis ua ib yam zoo los pab nws kom nws pom tias nws muaj nuj nqis rau Yehauvas.

SAIB PEB TUS KHEEJ YAM LI YEHAUVAS SAIB

14. Nyob hauv 1 Xamuyees 16:7 pab kom peb saib peb tus kheej li Yehauvas saib li cas? (Saib lub ntsiab “Vim Li Cas Yehauvas Saib Nws Cov Tib Neeg Rau Nqi Ua Luaj?”)

¹⁴ Nco ntsoov tias Yehauvas saib koj txawv dua li lub qab ntuj neeg no saib koj. (Nyeem 1 Xamuyees 16:7.) Xws li Yehauvas tsis saib tias koj muaj nyiaj txiag, zoo nkauj zoo nraug los sis kawm ntawv qib siab. (Yaxayas 55:8, 9) Yog li ntawd, nco ntsoov saib koj tus kheej yam li Yehauvas saib. Ib qho uas yuav tsav tau tswv yim rau koj yog mus nyeem txog cov tib neeg nyob hauv phau Vajlugkub uas saib lawv tus kheej qis qis es Yehauvas hlub lawv npaum li cas. Xws li Eliyas, Na-aumis, thiab Hanas. Tsis tas li ntawd, muab tej yam uas Yehauvas tau pab koj lawd sau tseg cia thiaj li pab tau koj nco ntsoov tias Yehauvas hlub thiab saib koj muaj nuj nqis npaum li cas. Ntxiv ntawd, mus nyeem tej ntaub ntawv uas Yehauvas lub koom haum luam tawm txog tej ntsiab uas saib koj tus kheej rau nqi.c

15. Vim li cas Yehauvas saib Daniyees rau nqi heev? (Daniyees 9:23)

¹⁵ Nco ntsoov qhov uas koj teev tiam Yehauvas ua rau koj muaj nuj nqis heev rau nws. Thaum Daniyees muaj 90 tawm xyoo, nws qaug zog heev. (Daniyees 9:20, 21) Yehauvas thiaj li xa Kali-ees los txhawb Daniyees lub zog tias nws muaj nuj nqis heev thiab Yehauvas yeej hnov nws tej lus thov. (Nyeem Daniyees 9:23.) Yehauvas saib Daniyees muaj nuj nqis vim Daniyees ua ncaj ua ncees thiab tuav rawv nws txoj kev ntseeg. (Exekees 14:14) Yehauvas muab Daniyees zaj sau tseg cia kom peb tau nyeem tias Yehauvas kuj mloog peb tej lus thov, nws saib qhov uas peb nyiam ua qhov zoo qhov yog thiab rau siab teev tiam nws rau nqi heev.​—Mikhas 6:8, Loos 15:4; Henplais 6:10.

16. Dab tsi pab tau kom koj pom tias Yehauvas yog ib Leej Txiv uas muaj kev hlub heev?

¹⁶ Saib Yehauvas tam li ib Leej Txiv uas hlub tshua koj. Yehauvas tsuas xav pab koj xwb. (Ntawv Nkauj 130:3; Mathais 7:11; Lukas 12:6, 7) Cov uas nco ntsoov li no ces yeej pab tau lawv kom lawv tsis txhob saib lawv tus kheej qis qis. Xws li nyob Xapee muaj ib tug muam npe hu ua Mim. Nws tus txiv tsis hlub nws. Nws hais tias: “Thaum twg kuv saib kuv tus kheej tsis muaj nuj nqis, kuv xav tias Yehauvas twb muab kuv puag hauv nws xub ntiag lawm thiab nws hlub thiab tiv thaiv kuv.” (Ntawv Nkauj 28:9) Nyob rau hauv Afika Qab Teb (South Africa) muaj ib tug muam npe hu ua Lug hais tias: “Kuv xav tias yog Yehauvas twb coj kuv los teev tiam nws, pab kom kuv tsis txhob tso nws tseg, thiab siv kuv mus pab lwm tus ces qhov no qhia tau tias kuv yeej muaj nuj nqis heev rau nws.”​—Hauxeyas 11:4.

17. Muaj dab tsi pab tau koj xam pom tias Yehauvas txaus siab rau koj? (Ntawv Nkauj 5:12) (Saib daim duab.)

¹⁷ Nco ntsoov tias Yehauvas yeej pom zoo rau koj. (Nyeem Ntawv Nkauj 5:12.) Daviv muab qhov uas Yehauvas txaus siab rau Nws cov tib neeg piv ib yam li “daim hlau tivthaiv cev.” Yog peb nco ntsoov tias Yehauvas txaus siab thiab xav pab peb ces yuav tiv thaiv tau peb thaum peb xav tsis zoo txog peb tus kheej. Qhov uas peb paub tias Yehauvas txaus siab rau peb yog nyeem nws Txoj Lus. Tsis tas li ntawd, Yehauvas kuj siv cov txwj laus thiab cov kwv tij nkauj muam pab txhawb kom peb nco ntsoov tias peb muaj nuj nqis heev rau Yehauvas.

18. Vim li cas koj yuav tau mloog thaum lwm tus qhuas txog koj?

¹⁸ Thaum cov txwj laus thiab cov kwv tij nkauj muam nplig koj siab, tsis txhob xav hais tias lawv lam ua txuj hais xwb. Nco ntsoov tias tej zaum yog Yehauvas siv lawv los hais cov lus ntawd rau koj kom koj paub hais tias nws txaus siab rau koj. Mim hais tias: “Thaum ib tug twg hais lus qhuas kuv, kuv yuam kuv kheej kom mloog nws hais vim Yehauvas xav kom kuv mloog tej lus ntawd thiaj pab tau kuv.” Mim kuj cia cov txwj laus pab txhawb nws thiab. Niaj hnub nim no Mim yog ib tug tho kev thiab nws kuj pab ua hauj lwm me ntsis rau Npe-ee.

19. Ua li cas koj ho ruaj siab tau tias koj muaj nuj nqis rau Vajtswv?

¹⁹ Yexus ua tib zoo qhia rau peb tias peb yeej muaj nuj nqis rau peb Leej Txiv saum ntuj ceeb tsheej. (Lukas 12:24) Cia peb nco ntsoov rau nruab siab tias Yehauvas yeej saib peb rau nqi! Tsis tas li ntawd, cia peb mus pab lwm tus kom lawv pom tias lawv muaj nuj nqis rau Vajtswv thiab!