Pab Cov Uas Nyuaj Rau Lawv Kawm Phau Vajlugkub Qhia
1. Puas zoo siv phau Vajlugkub Qhia los qhia txhua tus? Piav seb.
1 Yuav kom ib tug twg los pe hawm tau Yehauvas, nws yuav tsum paub tej uas phau Vajlugkub qhia. Tiamsis muaj ib txhia tsis ntseeg Vajtswv thiab tsis suav tias phau Vajlugkub yog Vajtswv txojlus. Muaj dua ib txhia tsis ntseeg tias muaj Vajtswv thiab saib phau Vajlugkub tsis muaj nqes. Yog peb ntsib cov tibneeg zoo li no thiab paub tias phau Vajlugkub Qhia yuav pab tsis tau lawv, peb yuav siv phau ntawv twg los pab lawv? Cov lus nram no yog cov tshaj tawm uas nyob rau 20 tawm lub tebchaws tau siv mus qhia Vajlugkub rau cov tsis ntseeg Vajtswv.
2. Yog muaj ib tug hais tias nws tsis ntseeg Vajtswv, peb yuav tsum nug li cas thiab vim li cas peb ho nug li ntawd?
2 Cov Uas Tsis Ntseeg Vajtswv: Yog muaj ib tug hais tias nws tsis ntseeg Vajtswv, zoo rau peb nug nws seb vim li cas nws hais li ntawd. Puas yog nws ntseeg tias ib puas tsav yam yog txia los xwb? Puas yog tej kev tsis ncaj ncees lossis tej kev phem uas cov neeg ua txuj ntseeg Vajtswv ua rau nws tsis ntseeg tias muaj Vajtswv. Puas yog nws nyob rau ib lub tebchaws uas txwv kev ntseeg Vajtswv? Los yog nws yeej ntseeg tias muaj Vajtswv tiamsis nws tsis xav ntseeg Vajtswv xwb? Muaj ntau tus tshaj tawm pom tias yog lawv nug tus tswv tsev li no, “Puas yog koj yeej ib txwm ntseeg li ko?” ua rau nws xav tham ntxiv. Thaum tus tswv tsev teb, koj yuav tsum ua tib zoo mloog txhob txiav nws lus. Thaum peb to taub zoo lawm, peb thiaj paub teb nws thiab muab tau phau ntawv uas phim nws rau nws nyeem.—P.L. 18:13.
3. Peb yuav tau ua li cas thiaj qhia tias peb saib taus tus tswv tsev thiab nws txojkev ntseeg?
3 Thaum peb teb tus tswv tsev, tsis txhob hais lus twm nws lossis hais saib tsis taus nws. Ib tug tshaj tawm hauv tebchaws United States tau hais tias: “Tseem ceeb heev rau peb saib taus lwm tus txojkev ntseeg. Tsis txhob nrog luag sib cav, tiamsis zoo rau peb nug tej uas yuav pab tau kom tus tswv tsev to taub thiab pom qhov tseeb.” Muaj ib tug saib xyuas cheeb tsam tau hais tias tom qab nws mloog tus tswv tsev hais tas, nws kheev nug li no, “Koj puas tau xav tias yuav muaj tau li no ib zaug li?”
4. Peb yuav qhia cov ntseeg Npus Das li cas?
4 Cov neeg uas ntseeg Npus Das lossis coj txoj kevcai Hauj Sam tsis paub Vajtswv yog leejtwg. Yog li ntawd, ib co tshaj tawm uas nyob tebchaws Britain thiaj li nyiam siv phau Lasting Peace and Happiness—How to Find Them los qhia cov uas ntseeg Npus Das. Tom qab lawv nrog tus tswv tsev tham cov lus piav qhia tas, lawv mus tham ntxiv rau lub ntsiab “Is There Really a Most High Creator?” thiab lub ntsiab “A Guidebook for the Blessing of All Mankind.” Lawv mam li muab phau Vajlugkub Qhia rau tus tswv tsev thiab hais rau nws tias, “Txawm koj tsis ntseeg Vajtswv los, yog koj kawm Vajlugkub, yeej muaj ntau yam zoo uas yuav pab tau koj lub neej.” Muaj ib tug tho kev uas qhia Vajlugkub rau cov Suav hauv tebchaws United States tau hais tias: “Feem coob cov Suav nyiam nyeem ntawv heev. Tej ntaub ntawv uas peb muab rau lawv, lawv yeej nyeem tas huvsi ua ntej peb rov mus xyuas lawv. Txawm li ntawd los, lawv tsis paub tias yuav kawm Vajlugkub li cas. Vim li no kuv thiaj nyiam muab phau Xov Zoo rau cov uas kuv ntsib thawj zaug, rau qhov phau no yoojyim siv los qhia lwm tus.” Ib tug saib xyuas thaj tsam rau cov Suav hauv tebchaws United States tau hais tias yeej muab tau phau Vajlugkub Qhia rau cov uas yus ntsib thawj zaug. Tiamsis zoo dua yog xub kawm tshooj 2, uas tham txog phau Vajlugkub es mam kawm tshooj 1, uas tham txog Vajtswv.
5. Vim li cas ho tseem ceeb rau peb ua siab ntev qhia lwm tus?
5 Yuav tau siv sijhawm ntev thiaj pab tau ib tug neeg los ntseeg Yehauvas. Yog li ntawd, peb yuav tsum ua siab ntev. Thawj zaug uas peb nrog ib tug twg tham txog Vajlugkub, tej zaum nws yuav tsis ntseeg tias muaj ib tug uas tsim txhua yam. Tiamsis yog kawm ntev mus, tej zaum nws kuj ntseeg tias muaj ib tug tsim txhua yam thiab, lossis tej zaum nws kuj to taub qhov uas lwm cov ntseeg tias muaj ib tug uas tsim txhua yam.
6. Vim li cas ib txhia thiaj tsis nyiam phau Vajlugkub?
6 Cov Uas Tsis Nyiam Phau Vajlugkub: Muaj tej tug kuj paub tias muaj Vajtswv tiamsis nws tsis nyiam phau Vajlugkub rau qhov nws ntseeg tias phau Vajlugkub tsis yog Vajtswv txojlus. Tej zaum tus uas ntseeg li no yog ib tug nyob rau tej lub tebchaws uas tsis ntseeg Vajtswv thiab xav tias phau Vajlugkub yog cov Khixatia cuav phau xwb, lossis tej zaum nws kuj nyob rau tej lub tebchaws uas ntseeg Vajtswv tiamsis tsis coj raws li phau Vajlugkub qhia. Yog li ntawd, nws thiaj xav tias phau Vajlugkub yuav pab tsis tau nws. Yog ntsib cov zoo li no, peb yuav pab lawv li cas lawv thiaj xav paub phau Vajlugkub thiab thaum kawg los kawm phau Vajlugkub Qhia?
7. Peb yuav pab cov uas tsis tau paub txog phau Vajlugkub li cas?
7 Hmoob yeej ib txwm ntseeg tias muaj ib tug tswv tsim tiamsis lawv tsis teev tiam nws. Lawv tsuas pe tej poj koob yawm txwv thiab ua dab ua qhua xwb. Feem coob tsis paub phau Vajlugkub thiab tej kevcai Khixatia. Lawv xav tias phau Vajlugkub yog cov neeg tawv dawb phau xwb. Vim li no phau Vajlugkub Qhia thiaj yog ib phau uas nyuaj heev los qhia cov Hmoob to taub Vajtswv tej kevcai. Rau qhov thaum lawv kawm, nyuaj heev rau lawv teb tej lus nug uas nyob hauv phau Vajlugkub Qhia. Tiamsis coob tus tshaj tawm pom tias yog lawv siv phau Kuv Phau Ntawv Txog Phau Vajlugkub los pab thaum lawv qhia phau Xov Zoo los yog phau Vajlugkub Qhia rau tus tswv tsev ua rau nws to taub Vajlugkub zoo dua. Thaum kawm phau Xov Zoo los yog phau Vajlugkub Qhia, ua tib zoo ntsuas seb yuav siv zaj twg hauv Phau Ntawv Txog Vajlugkub los pab kom tus kawm to taub. Tej zaj uas nyob hauv phau ntawv no yuav pab kom tus kawm paub phau Vajlugkub lub hauv paus ib zaj zus xwv nws thiaj to taub zaj uas nws tabtom kawm. Tej zaum tus tshaj tawm yuav pib qhia ib zag zuj zus tom hauv paus tuaj. Qhov uas qhia li no yuav pab tau cov Hmoob vim lawv yeej ib txwm nyiam piav dab neeg thiab piav kwv huam. Thiab vim coob tus tsis txawj ntaub txawj ntawv, tus tshaj tawm yuav tau qhia kom yooj yim thiab qhia ib zaj zuj zus tom hauv paus tuaj xwv thiaj pab tau lawv.
8. Peb yuav qhia li cas rau cov uas tsis nyiam phau Vajlugkub vim lawv pom tej kev phem uas cov Khixatia cuav tau ua?
8 Yog muaj ib tug twg tsis nyiam phau Vajlugkub vim nws pom cov Khixatia cuav tej kev phem, pab kom nws pom tias cov Khixatia cuav yeej ib txwm tsis coj raws li tej uas phau Vajlugkub qhia. Ceg Npe-ee uas nyob rau tebchaws Is Dias tau sau tias: “Tej zaum peb yuav tau pab kom tibneeg pom tias phau Vajlugkub tsis yog cov tshawj phau.” Ceg no tau hais ntxiv tias cov neeg Hindus nyiam ntu 4 hauv phau What Is the Purpose of Life? How Can You Find It? heev, rau qhov ntu ntawd piav tias tej tshawj tau muab tej lus hauv phau Vajlugkub hloov thiab rhuav puas tas. Muaj ib tug tho kev hauv tebchaws Brazil txeev hais rau tibneeg tias: “Koj kuj kawm es koj thiaj paub tias phau Vajlugkub qhia li cas? Muaj coob tus yeej zoo siab hlo kawm, txawm lawv tsis mus koom nrog Yehauvas cov Timkhawv. Tej zaum koj yuav kawm tau tej yam uas koj tsis tau xav txog li.”
9. Tej tug tibneeg yuav tsis nyiam kawm Vajlugkub thawj zaug peb ntsib lawv, tiamsis vim li cas peb yuav tsum tsis txhob tso tseg?
9 Yehauvas pom txhua tus tibneeg lub siab. (1Xmy. 16:7; P.L. 21:2) Nws rub cov uas muaj lub siab xib rau nws los pe hawm nws. (Yh. 6:44) Muaj coob tus uas tsis tau muaj leejtwg qhia Vajlugkub rau lawv dua li lossis lawv yeej tsis paub phau Vajlugkub li tiamsis Yehauvas tau rub lawv los pe hawm nws. Tes num peb ua pab tau lawv “dim thiab paub txojkev tseeb.” (1Tmt. 2:4) Yog li ntawd, txawm lawv tsis xav kawm Vajlugkub thawj zaug peb ntsib lawv los xij, tsis txhob tso tseg. Peb kuj siv tau lwm yam ntaub ntawv uas peb muaj los pab seb lawv puas xav kawm. Yog ntev mus, lawv kawm lawd koj kuj siv tau Phau Vajlugkub Qhia Txog Dabtsi Tiag? los pab lawv.
[Ntsiab me nyob sab 4]
Yog tus tswv tsev tsis ntseeg Vajtswv, koj kuj nug li no:
• Nug tias, “Puas yog koj yeej ib txwm xav li ko?” Yog koj nug li no koj thiaj paub seb nws xav li cas.
• Yog tej kev tsis ncaj ncees thiab tej kev phem ua rau nws tsis ntseeg Vajtswv lawm, cov ntaub ntawv no yuav pab tau nws:
Phau ntawv loj Phau Vajlugkub Qhia Txog Dabtsi Tiag? tshooj 11
Phau ntawv me Vajtswv Muaj Xov Zoo Rau Peb! zaj 8
Daim ntawv tseb Koj Puas Xav Paub Qhov Tseeb? lo lus nug “Vajtswv Puas Mob Siab Txog Peb Tiag?”
[Ntsiab me nyob sab 5]
Yog tus tswv tsev tsis ntseeg phau Vajlugkub koj kuj muab tau cov ntaub ntawv no rau nws:
• Phau ntawv loj Phau Vajlugkub Qhia Txog Dabtsi Tiag? tshooj 2, nqe 6-9.
• Tham txog seb yog peb coj raws tej hauv paus ntsiab lus hauv phau Vajlugkub yuav pab peb li cas. Cov ntaub ntawv no yuav pab tau tej tug pom tias phau Vajlugkub muaj ntau yam uas yuav pab tau nws:
Phau ntawv loj Phau Vajlugkub Qhia Txog Dabtsi Tiag? tshooj 14
Phau ntawv me Vajtswv Muaj Xov Zoo Rau Peb! zaj 9 thiab 11
Yog koj qhia Vajlugkub rau tej thaj tsam uas cov tibneeg tsis nyiam phau Vajlugkub, tsis txhob qhia rau lawv tias koj siv phau Vajlugkub. Tom qab koj twb mus ob peb zaug lawm koj mam li qhia lawv paub tias koj siv phau Vajlugkub.
• Qhia tus tswv tsev txog tej faj lem uas twb muaj tiav lawm. Tej ntaub ntawv koj yuav siv los qhia tus tswv tsev txog tej faj lem yog:
Phau ntawv loj Phau Vajlugkub Qhia Txog Dabtsi Tiag? tshooj 2 nqe 13-17
[Ntsiab me nyob sab 6]
Yog tus tswv tsev hais tias: “Kuv tsis ntseeg Vajtswv,” koj kuj teb nws li no:
• “Yog tias muaj Vajtswv ne, koj xav kom nws coj li cas?” Ntau tus tswv tsev teb tias lawv xav tau ib tug Vajtswv uas muaj kev hlub, coj ncaj, zam txim, thiab tsis xaiv ntsej muag. Nthuav phau Vajlugkub thiab nyeem txog 4 qho yeeb yam uas Vajtswv muaj no rau nws. (Koj siv phau Vajlugkub Qhia tshooj 1 nqe 6 los qhia nws.)
Yog tus tswv tsev hais tias: “Kuv tsis ntseeg phau Vajlugkub,” koj kuj teb nws li no:
• “Muaj coob tus kuj xav li ko thiab. Lawv hais tias phau Vajlugkub tsuas yog cov neeg tawv dawb phau ntawv xwb thiab phau Vajlugkub tsis muaj ib yam los pab tau tibneeg li. Yog li, koj puas tau nyeem phau Vajlugkub? [Cia nws teb tas tso. Qhia nws txog zaj 9 hauv phau Vajtswv Muaj Xov Zoo Rau Peb! thiab muab 1 phau rau nws.] Phau Vajlugkub muaj ntau lub hauv paus ntsiab lus uas yuav pab kom tsev neeg nrhiav tau kev zoo siab tiag. Lwm zaus kuv xav piav ib lub hauv paus ntsiab lus ntawm lo lus nug 1.”
• “Muaj ntau tus yeej xav li ko thiab. Yog koj tsis xav li cas cia kuv nyeem ib nqes Vajlugkub uas txhawb tau kuv heev. [Nyeem Yauj 26:7 lossis Yaxaya 40:22, uas qhia tias tej yam hauv phau Vajlugkub yeej muaj tseeb li tej neeg txawj ntse tshawb nrhiav.] Phau Vajlugkub kuj pab tau lub cuab lub yig thiab. Lwm zaus kuv xav qhia ib yam txog qhov ntawd rau koj.”
• “Ua tsaug uas koj qhia kuv. Yog tias Vajtswv tau sau ib phau ntawv rau noob neej, koj xav nws yuav sau dabtsi?” Ces nyeem ib nqes Vajlugkub los txhawb tej uas nws teb koj.