Tej Lus Nug Uas Peb Muaj

◼ Ib tug tshaj tawm uas tsis tau raus dej yuav tsum mus koom tej kev sib txoos thiab mus tshaj tawm ntau npaum li cas ua ntej nws ua tau kevcai raus dej?

Kevcai raus dej yog yam tseem ceeb tshaj plaws uas ib tug neeg txiav txim siab los ua. Yog li ntawd, ua ntej ib tug twg yuav ua kevcai raus dej, nws yuav tsum paub tej uas Vajtswv xav kom nws ua. Tsis tas li ntawd xwb, nws yuav tsum coj nws lub neej raws li Vajtswv tej kevcai.

Vajtswv tau sam hwm rau cov Khixatia kom mus koom tej kev sib txoos. Yog li ntawd ib tug tshaj tawm uas tsis tau raus dej yuav tsum rau siab ntso mus koom kev sib txoos. (Hnpl. 10:24, 25) Thaum nws mus, nws yuav tsum npaj cov lus teb. Yog nws rau npe kawm kev tshaj tawm kuj yuav pab tau nws thiab.

Tsis tas li ntawd xwb, Yexus tau hais rau cov Khixatia kom ua tes haujlwm tshaj tawm txoj xov zoo thiab mus coj tibneeg los ua nws cov thwjtim. Yog li ntawd, ib tug tshaj tawm uas tsis tau raus dej yuav tsum mus tshaj tawm tsis tu ncua ua ntej nws yuav ua kevcai raus dej. (Mth. 24:14; 28:19, 20) Nws yuav tsum ua ib tug tshaj tawm uas tsis tau raus dej ntev npaum li cas ua ntej nws ua tau kevcai raus dej? Qhov zoo, cia sijhawm rau nws qhia seb nws puas kub siab mus tshaj tawm txhua lub hlis. (Nt.Nk. 78:37) Txawm li ntawd los, tsis tas tos ntev, tej zaum peb plaub lub hlis xwb nws ua tau kevcai raus dej lawm. Ua li nws yuav tsum mus tshaj tawm txoj xov zoo ntau npaum li cas? Nyob ntawm seb nws mus tau npaum li cas xwb. Cov txwj laus yuav tsum ua tib zoo ntsuas thiab paub tias ib leeg txawv ntawm ib leeg thiab nyias muaj nyias chaw tab kaum.​—Lk. 21:1-4.

Cov txwj laus (lossis cov tub leg num hauv cov koom txoos uas tsis muaj txwj laus txaus) uas ntsib nrog tus uas yuav ua kevcai raus dej yuav tsum nco ntsoov tias txhua tus nyias txawv nyias. Yog li ntawd, lawv yuav tsum ua tib zoo tshuaj seb cov uas xav ua kevcai raus dej puas yuav ua tau tiag. Lawv yuav tsum pom tias nws xav ua Yehauvas ib tug Timkhawv thiab xav nrog Yehauvas lub koom haum thiab xav ua Vajtswv tes num tiag. Cov txwj laus yeej paub tias nws txojkev ntseeg tseem tsis tau loj hlob txaus lossis tsis paub ua Vajtswv tes num npaum li ib tug uas twb ua kevcai raus dej lawm. Yog cov txwj laus pom tias nws ua tsis tau kevcai raus dej, lawv yuav tsum siv phau Vajlugkub los ua tib zoo qhia nws tias vim li cas lawv thiaj txiav txim siab li ntawd es mam nrhiav kev los pab nws.