Koj Puas Yog Ib Tug Neeg Txaj Muag Heev?
1 Thaum koj pom ib tug menyuam yaus pheej nkaum ntawm leej niam lossis leej txiv ib sab xauj tuaj rau koj, koj paub tias nws txaj muag heev, puas yog? Menyuam yaus yeej ib txwm txaj muag heev. Txawm cov laus los muaj coob tus kuj txaj muag kawg li thiab. Yog koj txaj muag heev thaum koj mus tshaj tawm txoj xov zoo, koj yuav tau ua li cas?
2 Tej Uas Pab Tau Kom Koj Txhob Txaj Muag: Tseem ceeb heev rau koj tshuaj saib koj lub siab kom koj muaj kev hlub rau Yehauvas thiab tibneeg zej zog. (1Pt. 3:4) Nco ntsoov tias tes haujlwm tshaj tawm txoj xov zoo uas tau muab cob rau koj yog ib yam uas koj ua tau los qhia tias koj hlub Yehauvas heev. Rau siab ntso kawm Vajlugkub thiab mus koom kev sib txoos. Thov Vajtswv tsis tu ncua thiab qhia tej uas koj cheem tsum rau nws. Yog koj muaj kev ntseeg khov thiab tso siab rau Yehauvas, ces koj yuav ruaj siab thiab “muaj lub siab tuab . . . piav Vajtswv txojlus tsis ntshai kiag li.”—Flp. 1:14.
3 Yog koj xav tias koj ua tsis tau, tsis txhob txhawj. Timaute los kuj xav tib yam li koj thiab. Yog li ntawd, Povlauj thiaj txhawb nws kom “tsis txhob cia leejtwg saib tsis taus qhov uas [nws] tseem hluas,” tiamsis kom nws nco ntsoov tias “Vajtswv tsis pub lub siab ntshai rau peb tiamsis pub lub siab muaj hwjchim.” (1Tmt. 4:12; 2Tmt. 1:7) Vim li no, Yehauvas thiaj siv Timaute ua ntau yam haujlwm. Yehauvas yeej yuav siv koj thiab yog koj tso siab plhuav rau nws tsis ntshai li.—Nt.Nk. 56:11.
4 Muaj ib tug muam uas tus txiv tawm tsam nws heev ua rau nws ntshai kawg li, vim nws yog ib tug siab muag heev. Tiamsis nqe Vajlugkub hauv Mathai 10:37 pab tau nws muaj siab tawv. Nws ua siab ntev thev tej kev tawm tsam thiaj pab tau nws muaj lub siab tuab mus qhia Vajlugkub. Tsis ntev xwb nws tus txiv, nws niam, thiab nws cov nus puav leej los teev tiam Yehauvas.
5 Tseem Ceeb Rau Koj Npaj Ua Ntej: Yog koj ua tib zoo npaj ua ntej, koj yuav tsis ntshai mus qhia Vajlugkub. Xaiv ib tug qauv uas yoojyim hauv phau Reasoning lossis hauv daim Tes Num Rau Lub Nceeg Vaj los xyaum. Tsis txhob txhawj tias tsam koj ua tsis tau, koj yuav tsum xav tias koj yeej yuav ua tau xwb. Nrog lwm tus mus qhia Vajlugkub ua ke thiaj pab tau koj muaj lub siab tuab. Nco ntsoov tias cov tibneeg uas koj yuav mus ntsib los kuj txaj muag ib yam li koj thiab. Tsis txhob txaj muag, vim txhua tus cheem tsum hnov txoj xov txog Vajtswv lub Nceeg Vaj.
6 Yog koj yog ib tug uas txaj muag heev, tsis txhob tas kev cia siab. Cia li rau siab ntso mus ua Yehauvas txoj haujlwm, nws yeej yuav pab kom koj txawj mus tshaj tawm txoj xov zoo. Thaum ntawd koj yuav zoo siab xyiv fab ua koj tes haujlwm.—P.L. 10:22.