Nrog Koj Tus Me Nyuam Tham Txog Dej Caw

Alexadaws hais tias: “Wb nrog wb tus ntxhais tham txog dej caw thaum nws muaj 6 xyoo. Wb xav tsis thoob tias nws twb paub ntau npaum li ntawd lawm.”

• Yuav tsum nkag siab

• Xyaum ua li no

• Phau Vajlugkub hais li cas txog dej caw

Yuav tsum nkag siab

Cov niam txiv yuav tau nrog lawv cov me nyuam tham txog dej caw. Txhob tos me nyuam tiav hluas tso mam nrog lawv tham. Ib leej txiv hu ua Has-mib uas nyob teb chaw Lav Xias hais tias: “Twb tsim nyog kuv nrog kuv tus tub tham txog dej caw thaum nws tseem yau. Thaum kuv paub tias nws niaj hnub haus dej haus cawv ces nws twb muaj 13 xyoo lawm. Yog kuv ntxov qhia ces twb tsis zoo li no.”

Vim li cas zoo rau koj nrog koj tus me nyuam tham?

• Nco ntsoov tias cov me nyuam tom tsev kawm ntawv, tej uas luag tshaj tawm txog dej caw, thiab tej uas tso tawm hauv TV yuav ntxias tau koj tus me nyuam mus haus dej haus cawv.

• Ib lub koom haum txog kev noj qab haus huv hauv teb chaws Yunaithim Xatej (United States) hais tias tag nrho ntawm cov neeg haus dej haus cawv hauv teb chaw Mekas, 11 feem puas yog cov me nyuam yaus.

Twb yog vim li ntawd, cov kws kho mob thiaj txhawb kom cov niam txiv cob qhia lawv tej me nyuam txog tej yam uas tsis zoo ntawm dej caw pib puag thaum lawv tseem yau. Ua li, koj yuav cob qhia koj tus me nyuam li cas?

Xyaum ua li no

Npaj ua ntej seb koj tus me nyuam yuav nug koj li cas. Cov me nyuam kheev nug ub nug no thiab thaum lawv hlob zuj zus lawm lawv haj yam xav paub xav pom ntxiv. Yog li ntawd, yuav tau ua zoo npaj koj thiaj paub teb koj tus me nyuam. Xws li:

• Yog koj tus me nyuam xav paub seb dej caw qab li cas, koj kuj teb tau tias cawv txiv hmab qab li tej dej txiv hmab qaub hos npias (beer) ces iab iab xwb.

• Yog koj tus me nyuam xav sim cawv, koj kuj hais tau tias cawv muaj kuab dhau lawm tsis tsim nyog rau cov me nyuam haus. Tom qab ntawd mam piav tias dej caw yeej ua rau yus muaj kev zoo siab. Tiam sis yog haus ntau dhau lawm yuav ua rau yus qaug, thiab mus ua tej yam uas tsis tsim nyog ua. Tsis tas li ntawd tseem yuav hais tau tej yam uas xav txog lig.​—Pajlug 23:29-35.

Tshawb ntxiv. Phau Vajlugkub hais tias: “Cov neeg txawj ntse yuav ua dabtsi lawv xub xav ua ntej mam li ua.” (Pajlug 13:16) Zoo rau koj mus tshawb seb luag siv dej siv cawv li cas thiab muaj kev cai li cas txog dej caw hauv koj lub teb chaw. Yog koj ua li no, koj tus me nyuam yuav paub tias nws yuav tsum muaj hnub nyoog npaum li cas nws thiaj haus tau thiab haus npaum li cas xwb.

Xub nrog koj tus me nyuam tham txhob tos nws nug koj. Ib leej txiv npe hu ua Mas uas nyob hauv lub teb chaw Askiv hais tias: “Ib tug me nyuam yeej tseem tsis to taub tag tag txog txoj kev haus dej caw. Yog li kuv thiaj nug kuv tus tub uas muaj 8 xyoo hais tias nws xav li cas txog dej caw, zoo los tsis zoo. Thaum kuv nrog kuv tus tub tham wb tham zoo li ua si xwb, ua li no nws thiaj tsis ntshai qhib siab qhia kuv.”

Cov me nyuam yuav nco ntsoov koj tej lus yog tias koj ib sij qhia rau lawv ib zaug. Thiab vim lawv tseem yau koj yuav tsum qhia kom phim lawv lub hnub nyoog. Qhov uas koj qhia lawv txog dej caw tseem ceeb npaum li thaum koj qhia lawv txog kev tsav tsheb thiab koj qhia lawv txog kev nkauj kev nraug.

Tso qauv zoo. Tej me nyuam zoo li lub paj rwb uas nqus tau tej uas nyob ib puag ncig lawv. Cov neeg tshawb fawb tshawb pom tias cov me nyuam yuav xyaum lawv niam lawv txiv tus qauv. Yog cov niam cov txiv haus dej haus cawv thaum muaj kev nyuaj siab los sis ntxhov siab, cov me nyuam yuav xav hais tias thaum ntsib teeb meem yuav tsum haus dej haus cawv thiaj daws tau. Yog li ntawd, koj yuav tau ua qauv zoo rau koj tus me nyuam xyaum thiab ua zoo xav ua ntej haus dej haus cawv.