KEV PAB RAU COV HLUAS
Thaum Muaj Chaw Tu Siab Yuav Ua Li Cas?
Yuav tsum nkag siab
Tsis muaj leejtwg zoo tiav hlo. Sawvdaws puav leej yog neeg txhaum. Yog li ntawd, muaj tej zaum koj tus phoojywg zoo los tseem yuav ua rau koj tu siab. Koj los kuj ua rau nws tu siab thiab. Puas tau muaj li ntawd rau koj?—Yakaunpau 3:2.
Txojkev saib Is Taws Nej muaj peevxwm ua rau koj tu siab. Ib tug tub hluas hu Davi (David) hais tias: “Thaum koj saib Is Taws Nej es pom tej duab uas koj cov phoojywg nrog luag mus ua si lomzem, koj yuav pib xav tias ua cas nws ho tsis yaum kuv, puas yog nws tsis xav nrog kuv lawm. Tej no kuj ua tau rau yus tu siab thiab.”
Thaum muaj kev tu siab, koj yeej zam tau.
Xyaum ua li no
Tshuaj koj lub siab. Vajlugkub hais tias: “Tsis txhob chim sai, tsuas yog tus tsis thoob tsib thiaj khaws qhov chim rau hauv lub siab mus li.”—Laj Lim Tswvyim 7:9.
Alixam (Alyssa) hais tias: “Thaum koj lub siab nqeg lawd koj mam li pom tias twb tsis txaus chim ua luaj twg.”
Muab xav li no: Kuv puas yog ib tug neeg chim taus? Kuv puas rub lub siab kom ntev zog thiaj zam tau lwm tus thiab?—Laj Lim Tswvyim 7:21, 22.
Kev zam txim pab tau yus. Vajlugkub hais tias qhov uas “tsis quav ntsej tej uas luag ua txhaum . . . kuj yog meej mom rau nws.”—Paj Lug 19:11.
Malaulis (Mallory) hais tias: “Txawm tias muaj chaw tu siab tiag tiag los, yus zam txim zoo dua. Thaum peb zam txim lawd, tsis txhob niaj hnub tsuav txog qhov teeb meem, zam ces zam tiag tiag.”
Muab xav li no: Qhov teeb meem no puas txaus kuv tu siab? Yog kuv zam txim yuav pab peb muaj kev sib haum xeeb, ua li kuv puas saib qhov no rau nqe?—Khaulauxi 3:13.
Yog koj pheej tsuav tej teeb meem qub, zoo ib yam li koj lub tsev sov so tiamsis koj ib sij qheb qhov rooj rau cua txias nkag los
Xam pom luag lwm tus. Vajlugkub hais tias: “Nej tsis txhob nyias xam pom nyias tus kheej xwb yuav tsum xam pom lwm tus thiab.”—Filipi 2:4.
Nikhau (Nicole) hais tias: “Yog koj hlub thiab saib taus koj tus phoojywg ces thaum muaj chaw tu siab koj yeej nrhiav kev los daws qhov teeb meem sai sai. Neb twb sib raug zoo heev lawm, koj yeej tsis xav pub ib yam dabtsi txiav neb txojkev phoojywg li.”
Muab xav li no: Kuv puas xam pom tias kuj tsim nyog rau kuv tus phoojywg tu siab rau kuv thiab?—Filipi 2:3.
Ua cas ho tseem ceeb: Yog koj txawj sib zam thaum tseem hluas, ces yuav kav mus tas koj lub neej. Tsim nyog xyaum tamsim no, puas yog?