KEV PAB RAU COV HLUAS
Txiv Neej Nyiam Txiv Neej, Poj Niam Nyiam Poj Niam Puas Txhaum?
Daviv yog ib tug txiv neej uas muaj 23 xyoos. Nws hais tias, “Thaum yau los kuv pheej nyiam txiv neej. Kuv xav tias ntshe kuv lam nyiam yuam kev ib vuag xwb, tiam sis ua cas kuv tseem nyiam txiv neej qees.”
Daviv yog ib tug Khixatias uas xav ua haum Vajtswv siab. Tiam sis nws puas ua tau haum Vajtswv siab yog tias nws nyiam txiv neej? Vajtswv ho xav li cas txog txiv neej nyiam txiv neej, poj niam nyiam poj niam?
Phau Vajlugkub qhia li cas?
Thaum hais txog txiv neej nyiam txiv neej, poj niam nyiam poj niam, ib haiv neeg nyias xav lawm nyias ib yam thiab ib tiam neeg xav txawv ib tiam. Tiam sis cov Khixatias tsis caum neeg tej tswv yim ua neej thiab tsis “raws luag qab rau ub rau no.” (Efexus 4:14) Lawv coj li phau Vajlugkub qhia, thaum hais txog qhov uas txiv neej nyiam txiv neej, poj niam nyiam poj niam thiab lwm yam.
Phau Vajlugkub yeej qhia meej txog qhov no. Vajtswv Txoj Lus hais tias:
‘Tsis pub tej txiv neej deev txiv neej.’—Levis Kevcai 18:22.
“Vajtswv thiaj tso lawv tseg cia lawv ua ywj siab. . . . Twb yog vim li no Vajtswv thiaj cia lawv mus sib dee ywj siab. Tej poj niam cia li rov sib dee lawm. Vajtswv yeej ib txwm tsis tau tsim kom tib neeg ua li no.”—Loos 1:24, 26.
Nej tsis txhob rov dag nej. Cov neeg ua plees ua yi, pe dab pe mlom, deev luag poj luag txiv, txiv neej deev txiv neej, ua tub sab tub nyiag, siab hlob, quav dej quav cawv, foom luag, thiab txeeb luag tug yuav tsis tau Vajtswv lub Nceeg Vaj hlo li.—1 Kauleethaus 6:9, 10.
Qhov tseeb tiag, Vajtswv tej kev cai yog hais rau txhua leej txhua tus. Tiam sis peb yog neeg txhaum xwb ces tej thaum peb xav ua tej uas tsis haum Vajtswv siab, txawm li los peb yuav tau tswj peb lub siab.—Kaulauxais 3:5.
Puas yog hais tias . . . ?
Puas yog hais tias phau Vajlugkub qhia kom peb ntxub cov txiv neej nyiam txiv neej, poj niam nyiam poj niam?
Tsis yog. Phau Vajlugkub tsis tau qhia kom peb ntxub ntxaug ib leeg twg. Tiam sis qhia kom peb ‘ua siab ntev nrog sawv daws sib nraug zoo,’ tab txawm lawv yuav coj lus neej zoo li cas. (Henplais 12:14) Yeej tsis tsim nyog rau ib tug hais lus saib tsis taus los sis ua phem rau cov txiv neej nyiam txiv neej, poj niam nyiam poj niam.
Puas yog hais tias cov Khixatias tawm tsam tej kev cai uas tso cai rau txiv neej yuav txiv neej, poj niam yuav poj niam?
Phau Vajlugkub qhia tias, Vajtswv tsuas tso cai rau ib tug txiv neej thiab ib tug poj niam sib yuav xwb. (Mathais 19:4-6) Tiam sis nom tswv rhawv tej kev cai sib yuav raws li tej pej xeem siab nyiam, tsis yog raws li Vajtswv tej kev cai txog kev sib yuav. Phau Vajlugkub twb qhia tseg tias, peb yuav tsum tsis txhob koom nrog ib tog nom tswv twg. (Yauhas 18:36) Yog li ntawd, cov Khixatias tsis txhawb thiab tsis tawm tsam tej kev cai uas nom tswv rhawv rau txiv neej yuav txiv neej, poj niam yuav poj niam.
Yog hais tias . . . ?
Yog hais tias muaj ib tug txiv neej nyiam txiv neej los sis poj niam nyiam poj niam, tus ntawd puas hloov tau nws lub neej kom ua tau haum Vajtswv siab?
Nws yeej hloov tau. Muaj ib co hauv phau Vajlugkub twb hloov tau lawm. Phau Vajlugkub qhia tias cov txiv neej deev txiv neej, poj niam deev poj niam yuav tsis tau Vajtswv lub Nceeg Vaj. Thiab kuj hais ntxiv tias: “Yav nram ntej nej ib txhia tau coj li no ntag.”—1 Kauleethaus 6:11.
Ua li, cov txiv neej nyiam txiv neej, poj niam nyiam poj niam puas tseem muaj lub siab ntshaw plias txog lawv lub neej yav tag los lawm? Tej thaum yeej tseem muaj. Tiam sis phau Vajlugkub hais tias: “Qhov uas nej ua tau neeg tshiab ntawd twb yog vim Vajtswv tus uas tsim nej niaj hnub pab nej kom nej coj tau tus yam ntxwv zoo.” (Kaulauxais 3:10) Yuav kom peb ua tau haum Vajtswv siab, peb yuav tsum tau tshuaj peb tus kheej ntshis thiab cia Vajtswv pab peb.
Yog hais tias muaj ib tug xav ua haum Vajtswv siab tiam sis nws tseem muaj pluaj siab nyiam ib hom neeg zoo li nws, nws yuav ua li cas xwb?
Ib tug neeg yeej muaj peev xwm tswj tau nws lub siab. Nws ua tau li no li cas? Phau Vajlugkub hais tias: ‘Cia li ua lub neej raws li lub hwj huam dawb huv, tsis txhob ua raws li lub cev nqaij tawv ntshaw.’—Kalatias 5:16.
Yog li, nws yuav tsum niaj hnub kawm Vajtswv Txoj Lus thiab thov Vajtswv tsis tseg, nws thiaj yuav tawm tsam yeej lub siab uas ntshaw plias ua tej yam uas tsis haum Vajtswv siab.
Daviv, tus uas hais thaum xub thawj, pom tias yeej muaj tseeb raws li nqe Vajlugkub no hais tiag. Tom qab Daviv qhia rau nws niam thiab nws txiv txog nws qhov teeb meem, nws hais tias: “Cuag li kuv muab lub nra hnyav txo kiag lawm. Yog kuv ntxov qhia rau nkawd thaum kuv tseem hluas ces ntshe kuv twb kaj siab lawm ntau.”
Yog peb ua raws li Vajtswv Yehauvas tej kev cai ces peb yeej yuav muaj kev zoo siab dua. Peb ntseeg tias Vajtswv ‘tej kev cai yeej yog tej uas ncaj ncees, thiab cov neeg uas hwm tej kev cai ntawd yuav tau txais kev kaj siab lug,’ thiab ‘peb tau txais nqi zog vim yog peb hwm tej kev cai ntawd.’—Phau Ntawv Nkauj 19:8, 11.