Cov Khixatias Puas Txais Kev Kho Mob Los Ntawm Kws Kho Mob?

Phau Vajlugkub qhia li no

Yexus hais tias “cov neeg tsis muaj mob yeej tsis mus cuag kws kho mob, cov uas muaj mob thiaj mus xwb.” (Mathais 9:12) Qhov no qhia tias Yexus cov thwj tim yeej txais tau kev kho mob los ntawm cov kws kho mob. Txawm phau Vajlugkub tsis yog ib phau ntawv kho mob los, phau Vajlugkub yeej pub tswv yim rau peb kom peb txawj xaiv txoj kev kho mob uas haum Vajtswv siab.

Ua ntej yuav txiav txim xaiv ib txoj kev kho mob twg, ua tib zoo xav li no

1. Koj puas nkag siab zoo txog txoj kev kho mob ntawd? Zoo rau koj muab qhov no ua tib zoo xav, vim phau Vajlugkub txhawb kom peb ua zoo tshawb nrhiav es tsis yog “ntseeg txhua yam.”​—Pajlug 14:15.

2. Yog hais tias koj twb mus nrog ib tug kws kho mob tham lawm, xav seb puas zoo rau koj mus cuag ob peb tug kws kho mob ntxiv, seb lawv ho hais li cas txog koj tus mob. Yog tias koj mob hnyav tseem ceeb heev rau koj ua li no. Vim rau qhov yog “muaj ntau leej taw qhia” yuav pab tau koj txawj txiav txim siab dua.​—Pajlug 15:22.

3. Txoj kev kho mob ntawd puas hla Vajtswv tej kev cai uas hais kom “caiv ntshav”?​—Tes Hauj Lwm 15:20.

4. Txoj kev kho mob ntawd puas txuam nrog kev cai dab qhuas? Zoo rau koj muab qhov no ua tib zoo xav vim hais tias phau Vajlugkub txwv tsis pub peb “ua neeb ua yaig.” (Kalatias 5:19-21) Hauv qab no muaj ob peb lo lus nug yuav pab koj paub seb ib txoj kev kho mob twg puas txuam nrog tej kev cai dab qhuas, xws li:

• Tus kws kho mob puas yog ib tug uas txawj ua neeb ua yaig thiab?

• Txoj kev kho mob ntawd puas cuam tshuam txoj kev ntseeg tias tau mus ua txhaum dab los sis raug dab?

• Thaum muab tshuaj los sis siv tshuaj, puas yuav tsum laig dab, ua khawv koob, los sis ua lwm yam ntsig txog dab?

5. Puas yog koj muab koj tus mob txhawj dhau lawm? Phau Vajlugkub qhia tias yog peb muab txhawj dhau lawm ces thaum kawg yuav tsis zoo rau peb. (Filipis 4:5) Thiab yog peb muab txhawj dhau lawm ces, peb yuav tsis muaj sij hawm los xav txog “yam uas tseem ceeb dua ntais” uas yog Vajtswv tes hauj lwm.​—Filipis 1:10; Mathais 5:3.