Phau Vajlugkub Puas Pab Tau Peb Tej Kev Ntxhov Siab Txog Nyiaj Txiag?

Phau Vajlugkub qhia li no

Phau Vajlugkub muaj 4 lub hauv paus ntsiab lus uas pab tau peb thaum peb ntxhov siab txog nyiaj txiag:

1. Xam ua ntej seb yuav siv nyiaj txiag li cas. “Nquag thiab ua tib zoo npaj koj thiaj muaj nplua mias. Yog koj lam tau lam ua, koj yuav muaj tsis txaus.” (Pajlug 21:5) Tsis txhob maj yuav tej yam khoom uas luag muab lov nqi lawm. Tiamsis muab xam ua ntej seb yuav siv nyiaj txiag li cas, koj cheem tsum dabtsi, koj mam yuav raws li ntawd xwb.

2. Tsis txhob luab nuj luab nqis. “Txais luag nyiaj ces yog ua luag qhev.” (Pajlug 22:7) Yog koj tshuav luag nuj nqis es them tsis tau li koj cog lus tseg, sim ua raws li Vajlugkub tau hais hauv Pajlug 6:1-5 uas hais tias: “Koj cia li mus cuag nws thiab thov thim koj tej lus cog tseg kom nws tso koj, koj thiaj yuav dim. Koj tsis txhob pw tsaug zog lossis nyob ncaws nruj nris.” Mus nrog tus uas koj tshuav nqi tham seb nws puas kam ncua sijhawm ntev zog koj thiaj them taus lossis puas muaj dua lwm txoj hau kev los pab koj. Koj yuav tau ua siab ntev. Txawm thawj zaug luag tsis kam los tsis txhob tu siab, kav tsij rov mus nrog nws tham dua.

3. Txhob muab nyiaj saib hlob. “Cov neeg qia dub xav kom npluanuj sai, lawv twb tsis paub hais tias thaum twg kev txomnyem yuav los raug lawv.” (Pajlug 28:22) Kev khib xeeb thiab ntshaw nyiaj txiag tsuas ua rau koj muaj kev ntxhov siab xwb, tsis tas li ntawd tseem ua rau koj tso tseg tsis teev tiam Vajtswv thiab.

4. Txaus siab rau tej yam uas koj muaj. “Yog peb muaj noj muaj hnav lawm, peb cia li txaus siab rau tej ntawd xwb.” (1 Timautes 6:8) Tsis yog yus muaj ib pob nyiaj yus thiaj zoo siab. Ib txhia tsis muaj nyiaj ntau los lawv yeej muaj kev zoo siab, lawv muaj kev zoo siab vim lawv muaj tsev neeg thiab cov phoojywg uas txawj sib hlub, thiab nrog Vajtswv sib raug zoo.​—Pajlug 15:17; 1 Petus 5:6, 7.