Yog Kuv Thov Vajtswv Nws Puas Yuav Pab Kuv Tiag?

Phau Vajlugkub qhia li no

Vajtswv yeej pab txhua tus uas thov raws li Vajtswv lub siab nyiam thiab thov tawm hauv lub siab dawb paug tuaj. Txawm koj tsis txeev thov Vajtswv dua li los koj yeej thov tau. Muaj coob tus hauv phau Vajlugkub uas thov Vajtswv tias: “Thov koj pab kuv.” Lawv cov qauv nram no yuav txhawb kom peb yeej meem thov Vajtswv.

• “[Yehauvas, New World Translation] uas yog kuv tus Vajtswv, thov koj pab kuv; vim koj yog tus muaj txojkev hlub uas tsis paub kawg.”​—Phau Ntawv Nkauj 109:26.

• “Tus TSWV, thov mloog kuv lub suab hu thiab hlub kuv! Tus TSWV, thov pab kuv!”​—Phau Ntawv Nkauj 30:10.

Cov lus no, yog cov neeg uas muaj kev ntseeg rau Vajtswv tej lus thov. Vajtswv yeej mloog txhua tus tej lus thov yog tias thov tawm hauv lub siab dawb paug tuaj. Vajtswv tseem hajyam mloog “cov neeg uas tas kev cia siab” lossis “cov neeg uas tsis muaj chaw vamkhom” tej lus thov.​—Phau Ntawv Nkauj 34:18.

Koj tsis txhob txhawj tias Vajtswv yuav nyob deb es tsis quav ntsej txog koj tej teeb meem. Phau Vajlugkub hais tias: ‘Txawm yog Vajtswv nyob saum qhov chaw uas siab tshaj plaws los nws hlub txog cov uas nyob qis hauv ntiajteb no.’ (Phau Ntawv Nkauj 138:6) Yexus kuj qhia rau nws cov thwjtim hais tias: “Txawm yog nej tej plaubhau los Vajtswv twb suav txhua txoj huv tibsi lawm.” (Mathais 10:30) Vajtswv yeej paub txhua yam txog peb, nws tseem paub peb zoo tshaj li peb paub peb tus kheej. Yog li ntawd, peb ruaj siab tias thaum peb thov Vajtswv pab peb thev tej kev nyuaj siab, nws yeej yuav mloog peb tej lus thov!​—1 Petus 5:7.