Top left: Marek M. Berezowski/Anadolu Agency via Getty Images; bottom left: Halfpoint Images/Moment via Getty Images; center: Zhai Yujia/China News Service/VCG via Getty Images; top right: Ismail Sen/Anadolu Agency via Getty Images; bottom right: E+/taseffski/via Getty Images
CIA LI CEEV FAJ ZOV TOS!
Xyoo 2023 Yog Ib Xyoos Muaj Kev Ntxhov Siab—Phau Vajlugkub Hais Li Cas?
Nyob rau xyoo 2023 tej xwm txheej thoob plaws ntiaj teb ua pov thawj tias peb nyob rau tiam uas phau Vajlugkub hais tias yog “tiam kawg.” (2 Timautes 3:1) Tau muaj tej xwm txheej raws li phau Vajlugkub qhia li cas?
Phau Vajlugkub thiab tej xwm txheej thoob ntiaj teb
“Nej yuav hnov suab ntaj suab riam thiab yuav hnov txog kev tsov kev rog.”—Mathais 24:6.
“Muaj kev kub ntxhov zuj zus hauv ntau lub teb chaws.”a
Mus saib zaj “Leej Twg Yuav Cawm Cov Pej Xeem?” thiab zaj “Cov Nom Tswv Nyob Thoob Ntiaj Teb Siv Nyiaj Tag Ntau Heev Rau Lawv Cov Tub Rog.”
“Yuav muaj av qeeg ib qho rau ib qho.”—Malakaus 13:8.
“Suav txij xyoo 2023 los thoob ntiaj teb tau muaj 13 zaug av qeeg loj txog qib 7. Txij thaum tib neeg pib suav thiab luj av qeeg, tsis tau pom muaj loj thiab heev npaum li no.”b
Mus saib zaj “Av Qeeg Loj Heev Hauv teb chaws Rhawkis thiab Xilias.”
“Yuav muaj tej yam txaus ntshai heev.”—Lukas 21:11.
Tiam uas lub ntiaj teb pib sov twb tag lawm, lub ntiaj teb tshuav kub hnyiab lawm xwb.”—António Guterres, UN secretary-general.c
“Yuav muaj kev tshaib kev nqhis.”—Mathais 24:7.
“Xyoo 2023 rov qab yog ib xyoos uas tib neeg txhawj xeeb tsis paub xyov yuav nrhiav noj rau lawv tsev neeg li cas.”d
“Yuav yog lub sij hawm txom nyem nyuaj siab kawg.”—2 Timautes 3:1.
“Thoob ntiaj teb, ntawm yim tus tib neeg ib tug yuav tsum muaj tus mob nyuaj siab los sis kev ntxhov siab lwm yam.”e
Mus saib zaj “Disturbing Decline in Teen Mental Health” ua lus Askiv.
Xyoo 2024 yuav zoo li cas?
Tsis muaj leej twg paub xyov xyoo 2024 yuav zoo li cas tiag. Tiam sis tej uas muaj tshwm sim thoob ntiaj teb ua pov thawj tias tsis ntev Vajtswv lub Nceeg Vaj, los sis nws lub tseem fwv saum ntuj, yuav los hloov tib neeg tej tseem fwv. Vajtswv lub tseem fwv yuav rhuav tshem tib neeg tej kev txom nyem thiab kev ntxhov siab mus.—Daniyees 2:44; Tshwmsim 21:4.
Thaum peb muaj kev ntxhov siab cia peb tso siab rau Vajtswv. Phau Vajlugkub hais tias:
“Thaum kuv muaj kev txhawj ntshai, kuv cia siab rau koj xwb.” Ntawv Nkauj 56:3.
Peb yuav ua li cas qhia tias peb cia siab rau Vajtswv? Vajtswv cog lus tseg tias yuav tsis muaj kev ntxhov siab lawm. Peb caw koj los kawm txog tej lus cog tseg no. Saib seb kev kawm Vajlugkub zoo li cas xwv koj thiab koj tsev neeg thiaj tau txais tej koob hmoov uas phau Vajlugkub qhia txog.
a Phau Foreign Affairs, zaj “A World at War: What Is Behind the Global Explosion of Violent Conflict?” uas Emma Beals thiab Peter Salisbury, sau lub 10 Hli tim 30, 2023.
b Phau Earthquake News, zaj “Year 2023: Number of Major Earthquakes on Course for Record,” Lub 5 Hlis, 2023.
c Lub koom haum UN (United Nations), “Secretary-General’s Opening Remarks at Press Conference on Climate,” Lub 7 Hli tim 27, 2023.
d Lub koom haum World Food Programme, “A Global Food Crisis.”
e Lub koom haum World Health Organization, “World Mental Health Day 2023,” Lub 10 Hli tim 10, 2023.