Muaj Kev Cia Siab Rau Lub Neej Yav Pem Suab

Thaum koj xav txog lub neej yav pem suab, koj xav li cas xwb? Txawm peb ntsib ntau yam teeb meem niaj hnub nim no los, yeej tseem muaj coob tus uas cia siab tias lub neej yav pem suab tseem yuav muaj qhov zoo. Yog li, lub neej yav pem suab puas yuav zoo ntxiv tuaj tiag? Yeej yuav zoo! Phau Vajlugkub qhia tsi ntsees tias peb yeej muaj kev cia siab rau lub neej yav pem suab.

Phau Vajlugkub cog lus li cas txog lub neej yav pem suab?

Phau Vajlugkub qhia tias noob neej raug ntau yam teeb meem. Tiam sis phau Vajlugkub kuj qhia ntxiv tias tej teeb meem no yuav tsis raug peb mus ib txhis. Cia peb tham txog lub neej yav pem suab seb yuav zoo li cas.

Tej yam raug peb tam sim no: Tsis muaj vaj tse nyob

Phau Vajlugkub cog lus tias: “Cov neeg ua tsev yuav tau nyob hauv tej tsev ntawd.”—Yaxayas 65:21.

Lub neej yav pem suab yuav zoo li cas: Txhua tus tib neeg, nyias yuav muaj nyias vaj nyias tsev.
Tej yam raug peb tam sim no: Poob hauj lwm thiab txom nyem

Phau Vajlugkub cog lus tias: “Lawv yuav zoo siab rau txhua yam uas lawv txhais tes ua tau los.”—Yaxayas 65:22.

Lub neej yav pem suab yuav zoo li cas: Txhua tus tib neeg yuav tau ua txoj hauj lwm uas lawv nyiam thiab lawv yuav muaj kev zoo siab thaum lawv pom tej uas lawv ua.
Tej yam raug peb tam sim no: Kev tsis ncaj ncees

Phau Vajlugkub cog lus tias: ‘Yuav muaj ib tug vaj ntxwv kav ncaj ncees.’—Yaxayas 32:1.

Lub neej yav pem suab yuav zoo li cas: Txhua leej txhua tus yuav sib txig sib luag, vim hais tias yuav tsis muaj tus pluag thiab tus nplua nuj. Kev xaiv ntsej xaiv muag los kuj yuav tsis muaj li lawm.
Tej yam raug peb tam sim no: Muaj kev tshaib nqis

Phau Vajlugkub cog lus tias: Lub teb chaws yuav muaj nplej ntsu nplua mias, thiab muaj qoob loo puv nkaus saum tej pov roob.—Phau Ntawv Nkauj 72:16.

Lub neej yav pem suab yuav zoo li cas: Yuav tsis muaj leej twg mus pw tshaib plab zias li lawm. Txhua leej txhua tus yuav tau zaub mov noj txaus nkaus.
Tej yam raug peb tam sim no: Muaj tub sab tub nyiag thiab kev ua nruj ua tsiv

Phau Vajlugkub cog lus tias: ‘Txhua tus yuav nyob kaj siab lug ntawm nyias tej vaj txiv hmab, txiv ncuav pias, thiab yuav tsis muaj leej twg ua rau nws tau kev txhawj kev ntshai li.’—Mikhas 4:4.

Lub neej yav pem suab yuav zoo li cas: Txhua tus yuav nyob tso siab plhuav vim hais tias yuav tsis muaj cov neeg lim hiam li lawm. Cov neeg ncaj ncees yog cov uas yuav tau lub ntiaj teb ua lawv tug.—Phau Ntawv Nkauj 37:10, 29.
Tej yam raug peb tam sim no: Muaj kev tsov kev rog

Phau Vajlugkub cog lus tias: ‘Ntau haiv neeg yuav tsis ua tsov ua rog thiab yuav tsis muaj leej twg npaj cuab yeej sib nkaug sib tua ntxiv li lawm.’—Yaxayas 2:4.

Lub neej yav pem suab yuav zoo li cas: Yuav muaj kev thaj yeeb thoob plaws ntiaj teb. (Phau Ntawv Nkauj 72:7) Yuav tsis muaj leej twg ua neeg thoj nam ntxiv li lawm thiab yuav tsis muaj leej twg quaj ntsuag vim kev tsov kev rog.
Tej yam raug peb tam sim no: Kev mob kev nkeeg thiab kab mob aws

Phau Vajlugkub cog lus tias: ‘Yuav tsis muaj leej twg nroo hais tias, “Kuv muaj mob.”’—Yaxayas 33:24.

Lub neej yav pem suab yuav zoo li cas: Yuav tsis muaj leej twg muaj mob muaj nkeeg thiab lub cev tsis meej xeeb li lawm. (Yaxayas 35:5, 6) Phau Vajlugkub kuj cog lus tias ‘kev tuag yuav tsis muaj ib zaug li lawm.’—Tshwmsim 21:4.
Tej yam raug peb tam sim no: Tib neeg ua rau lub ntiaj teb puas tsuaj

Phau Vajlugkub cog lus tias: ‘Tiaj suab puam thiab lub teb chaws uas qhuav nkig nkuav yuav zoo siab heev, thiab yuav muaj paj tawg ntsa iab rau saum tej av qhuav.’—Yaxayas 35:1.

Lub neej yav pem suab yuav zoo li cas: Lub ntiaj teb tag nrho yuav zoo nkauj cuag li ib lub vaj paj. Qhov no yeej yog Vajtswv lub hom phiaj puag thaum chiv keeb los lawm.—Chivkeeb 2:15; Yaxayas 45:18.

Txoj kev vam kev cia siab hauv phau Vajlugkub cuag li yog dab neeg xwb, es puas yuav muaj tiag?

Tej zaum koj yuav xav hais tias yog dab neeg xwb. Tiam sis yeej meem soj ntsuam seb phau Vajlugkub hais li cas txog lub neej yav pem suab. Vim hais tias tej lus hauv phau Vajlugkub uas hais txog lub neej yav pem suab yeej sib txawv deb heev ntawm tej uas neeg kwv yees pom, rau qhov cov lus hauv phau Vajlugkub yog los kiag ntawm Vajtswv tsis yog los ntawm tib neeg. Vim li cas peb thiaj tso siab tau rau Vajtswv tej lus? Vim hais tias:

Vajtswv yog tus uas peb tso siab tau rau. Phau Vajlugkub qhia tias Vajtswv “yeej tsis dag li.” (Titus 1:2) Tsis tas li ntawd, tsuas yog Vajtswv tib leeg xwb, thiaj yog tus paub hais tias yuav muaj li cas rau yav pem suab. (Yaxayas 46:10) Nyob hauv phau Vajlugkub, twb muaj ntau yam pov thawj sau tseg cia lawm tias muaj tiav raws nkaus li Vajtswv tau hais tiag. Yog xav paub ntxiv, mus saib zaj yeeb yaj kiab Vim Li Cas Peb Ho Paub Tias Phau Vajlugkub Yog Vajtswv Tshoov Neeg Sau?
Vajtswv muaj peev xwm daws tau peb tej teeb meem. Phau Vajlugkub qhia tias Vajtswv muaj hwj chim “ua tau txhua yam raws li nws lub siab nyiam.” (Phau Ntawv Nkauj 135:5, 6) Yog li ntawd, yeej tsis muaj ib yam dab tsi yuav los tav tau Vajtswv tej lus cog tseg kom txhob muaj tiav. Thiab nws yeej xav pab peb vim nws hlub peb heev.—Yauhas 3:16.

Tej zaum koj xav paub tias, ‘Yog Vajtswv twb muaj peev xwm npaum li ntawd thiab nws yeej xav pab peb tiag, ces vim li cas peb ho ntsib teeb meem ntau ua luaj?’ Yog koj xav paub, mus saib zaj yeeb yaj kiab Ua Li Cas Vajtswv Cia Muaj Kev Txom Nyem?

Txoj kev vam kev cia siab hauv phau Vajlugkub yuav muaj tau li cas?

Vajtswv lub Nceeg Vaj yuav los ua kom Vajtswv tej lus cog tseg muaj tiav. Vajtswv lub Nceeg Vaj kav saum ntuj ceeb tsheej thiab Yexus Khetos yog tus uas Vajtswv tsa kom saib xyuas tib neeg thiab tu lub ntiaj teb no. Thaum Yexus tseem nyob hauv ntiaj teb, nws tau ua txuj ci qhia tias nws txoj kev kav yuav zoo li cas. Nws kho cov muaj mob muaj nkeeg, nws pub zaub mov rau cov tshaib nqis, nws tswj huab cua, thiab nws tsa cov tuag sawv rov los.—Malakaus 4:39; 6:41-44; Lukas 4:40; Yauhas 11:43, 44.

Yog koj xav paub seb Vajtswv lub Nceeg Vaj yuav pab tau koj li cas, saib zaj yeeb yaj kiab Vajtswv Lub Nceeg Vaj Yog Dab Tsi?

Txoj kev vam kev cia siab no yuav los thaum twg?

Yuav los sai sai tom ntej no! Vim li cas peb ho paub? Vim phau Vajlugkub twb qhia txog tej xwm txheej uas yuav pab peb paub tias Vajtswv lub Nceeg Vaj twb kav lawm. (Lukas 21:10, 11) Niaj hnub nim no, peb yeej pom tej xwm txheej no muaj tshwm sim raws nkaus li phau Vajlugkub qhia.

Yog koj xav paub ntxiv, mus nyeem zaj hu ua “Thaum Twg Vajtswv Lub Tseem Fwv Mam Li Kav Ntiaj Teb?”

Txoj kev vam kev cia siab hauv phau Vajlugkub pab tau koj li cas tam sim no?

Ib tug uas sau phau Vajlugkub muab txoj kev cia siab no piv rau “tus tswg uas muaj hlua khi peb lub siab kom nyob ruaj ruaj.” (Henplais 6:19) Zoo ib yam li tus tswg tuav lub nkoj kom nyob ruaj nreeg thaum muaj huab cua phem, txoj kev cia siab hauv phau Vajlugkub yuav pab tau peb thev taus tej teeb meem uas peb raug niaj hnub nim no. Peb yuav ua tau lub siab tus, muaj kev zoo siab, thiab noj qab nyob zoo.—1 Thexalaunikes 5:8.