Phau Vajlugkub Pab Puas Tau Txiv Neej Tej Kev Ntxhov Siab?

Thaum hais txog ib tug neeg ntxhov siab,a tej zaum koj yuav xav txog ib tug neeg uas nyob mluas mlob los sis ib tug uas tsis xav sawv saum txaj los li, los yog ib tug uas pheej piav nws tej kev txhawj xeeb tas li xwb.

Ib txhia yeej coj li hais no. Tiam sis cov neeg tshawb fawb pom tias tsis yog txhua tus txiv neej yuav coj li ntawd. Ib phau ntawv hais tias “thaum txiv neej muaj kev txhawj xeeb, lawv nyiam mus haus dej haus cawv thiab haus yeeb haus tshuaj. Tos ib txhia quav dej quav cawv los twb vim yog lawv muaj kev ntxhov siab. Thaum muaj li no los raug cov txiv neej, lawv thiaj siab luv heev thiab tswj tsis tau lawv tus kheej.”

Tiam sis tsis yog txhua tus txiv neej yuav coj zoo li no. Peb pom tias lub caij uas “muaj kev ntxhov siab heev” no, tsuas muaj ntxhov siab ntau zuj zus tuaj lawm xwb. (2 Timautes 3:1) Yog koj ntxhov siab, phau Vajlugkub yuav pab tau koj.

Cov nqe Vajlugkub uas pab peb nyiaj dhau tej kev ntxhov siab

Phau Vajlugkub muaj tej lus qhia uas pab tau peb nyiaj dhau tej kev ntxhov siab. Cia peb saib 3 yam nram no:

1. 1. “Yog li ntawd, txhob txhawj txog tag kis, rau qhov tag kis tseem yuav muaj lwm yam kev nyuaj siab. Hnub no twb muaj kev txhawj txaus lawm.”—Mathais 6:34.

   Qhov no txhais tias: Tsis tas peb yuav txhawj txhawj txog tej uas twb tsis tau muaj tshwm sim, vim tej thaud twb tsis muaj li peb txhawj. Tej thaud tseem yuav muaj tej yam zoo tshaj li peb xav.

   Sim ua li no: Xav seb yav tas los puas yog txhua yam uas koj txhawj txog puav leej muaj tshwm sim tib si. Ua zoo xav seb tej uas koj txhawj puas yuav muaj tiag thiab puas phem ua luaj twg.

2. 2. “Hlau hov hlau li cas, tej neeg ib leeg kawm ntawm ib leeg ib yam li ntawd.”—Pajlug 27:17.

   Qhov no txhais tias: Yog peb cia lwm tus pab peb, ces yuav daws tau peb tej kev ntxhov siab. Ib txhia txeev raug teeb meem ib yam li peb, yog peb nrog lawv tham lawv tsav tau tswv yim rau peb xwv peb thiaj nyiaj dhau tej kev nyuaj siab. Hos txawm lawv pab tsis tau ntau los qhov uas peb mus nrog lawv tham xwb peb lub siab twb nqeg lawm.

   Sim ua li no: Mus nrog ib tug uas txeev raug teeb meem zoo li koj tham, nug seb nws ua li cas los daws nws tej teem meem.

3. 3. “Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv.”—1 Petus 5:7.

   Qhov no txhais tias: Vajtswv hmov tshua tus uas raug kev txom nyem. Vajtswv xav kom peb thov Nws thiab qhia peb tej kev nyuaj siab huv si rau Nws.

   Sim ua li no: Muab koj tej kev ntxhov siab sau cia thiab thov Vajtswv txog tej ntawd, qhia ntxaws ntxaws rau nws thiab thov kom nws pab koj tiv dhau tej kev ntxhov siab.

Yuav Tsis Muaj Kev Ntxhov Siab Li Lawm

Phau Vajlugkub tsis yog pab tau peb tej kev ntxhov siab nkaus xwb. Phau Vajlugkub tseem cog lus tias tsis ntev tom ntej no peb yuav tsis muaj kev ntxhov siab li lawm.

Vajtswv lub Nceeg Vaj yuav rhuav tshem tib neeg tej kev ntxhov siab huv si mus (Tshwmsim 21:4) Thaum Vajtswv lub Nceeg Vaj kav, peb yuav tsis nco txog peb tej kev ntxhov siab thiab peb tej kev txhawj xeeb li lawm.—Yaxayas 65:17.

Tej lus no yog “Vajtswv tus uas ua rau peb nyob kaj siab lug” tej lus cog tseg. (Loos 16:20) Vajtswv hais rau peb tias: “Kuv tib leeg thiaj paub tej uas kuv npaj yuav ua rau nej, kuv yuav pab kom nej vammeej tsis yog ua kom nej puastsuaj, nej thiaj muaj kev cia siab rau yam tom ntej.”—Yelemis 29:11.