Koj Puas Yuav “Zov Tos”?

1, 2. (1) Yexus qhia li cas txog lub sijhawm kawg? (2) Peb yuav teb cov lus nug twg?

XAV txog lub sijhawm uas Yexus nrog nws cov thwjtim zaum saum lub Roob Txiv Aulib ntsia mus rau lub tuam tsev hauv Yeluxalees. Petus, Anru, Yakaunpau, thiab Yauhas ua tib zoo mloog Yexus qhia ib zaj lus faj lem txog yav tom hauv ntej. Zaj lus faj lem ntawd qhia txog lub sijhawm kawg, thiab txog Vajtswv lub Nceeg Vaj. Yexus qhia tias nyob rau lub sijhawm kawg, nws “tus qhev ncaj thiab ntse” yuav sawv cev rau nws hauv ntiajteb no. Tus qhev ntawd mam li ua tus faib zaub faib mov ntawm sab kev ntseeg rau nws cov thwjtim noj, raws caij raws nyoog.​—Mathai 24:45-47.

² Thaum Yexus piav zaj lus faj lem ntawd rau nws cov thwjtim, nws kuj hais ib zaj kwv huam txog 10 tus hluas nkauj. (Nyeem Mathai 25:1-13.) Cia peb kawm txog zaj kwv huam ntawd. Peb yuav teb 3 lo lus nug no: (1) Zaj kwv huam no lub ntsiab txhais li cas? (2) Cov xaiv tseg tau coj raws li zaj kwv huam no li cas, thiab thaum kawg lawv tau txais dabtsi? (3) Zaj kwv huam no pab tau peb txhua leej txhua tus li cas?

ZAJ KWV HUAM LUB NTSIAB TXHAIS LI CAS?

3. (1) Yav tas los, peb cov ntaub ntawv piav li cas txog 10 tus hluas nkauj? (2) Peb yuav tau xav txog cov lus nug twg?

³ Tau ob peb xyoos no tus qhev ncaj thiab ntse pom tias muaj tej yam uas peb yuav tsum kho thiab hloov peb thiaj nkag siab phau Vajlugkub zoo dua. Yav tas los peb kheev kawm seb tej kwv huam hauv phau Vajlugkub ua lus faj lem li cas rau yav tom hauv ntej. Tiamsis nimno peb kawm kom tau lub ntsiab coj los siv hauv peb lub neej. Zoo li Yexus zaj kwv huam txog 10 tus hluas nkauj. Yav tas los peb cov ntaub ntawv qhia tias cov teeb, cov roj, thiab cov lam hwj yog ua duab rau yav tom ntej tibsi. Tiamsis puas yog peb muab txhais ntxaws zog lawm? Puas yog peb poob lub ntsiab ntawm cov lus ceeb toom lawd? Peb yuav tsum paub meej txog tej no.

4. (1) Hauv zaj kwv huam, tus nraug vauv piv txog leejtwg? (2) Cov hluas nkauj piv txog leejtwg?

⁴ Cia peb kawm txog lub ntsiab rau Yexus zaj kwv huam. Yexus piav txog tus nraug vauv thiab 10 tus hluas nkauj. Tus nraug vauv piv txog leejtwg? Piv txog Yexus. Peb paub tias yog Yexus rau qhov Yexus twb qhia ua ntej lawm tias nws yog tus nraug vauv. (Luka 5:34, 35) Cov hluas nkauj piv txog leejtwg? Lawv piv txog pab yaj tsawg uas yog cov xaiv tseg. Ua cas peb thiaj paub li ntawd? Rau qhov hauv Yexus zaj kwv huam, cov hluas nkauj yuav tsum taws teeb tos tus nraug vauv los. Yexus ceeb toom ib yam li ntawd rau nws cov thwjtim uas raug xaiv tseg thiab. Yexus hais tias: “Nej cia li sia siv khov kho thiab taws nej lub teeb cia, thiab ua zoo li cov uas tos rawv lawv tus lospav mus ua tshoob rov los.” (Luka 12:32, 35, 36) Tsis tas li ntawd xwb, tus tubtxib Povlauj thiab Yauhas muab cov xaiv tseg piv ib yam li cov nkauj xwb dawb huv. (2 Khaulee 11:2; Qhia Tshwm 14:4) Yog li ntawd, cov lus ceeb toom hauv Mathai 25:1-13 yuav tsum yog hais rau Yexus cov thwjtim uas yog cov xaiv tseg ntag.

5. Yexus cov lus ceeb toom yuav muaj tiav rau lub caij nyoog twg?

⁵ Yexus cov lus ceeb toom yuav muaj tiav rau lub caij nyoog twg? Thaum Yexus yuav xaus zaj kwv huam, nws hais tias yog lub sijhawm uas “tus nraug vauv txawm tuaj txog.” (Mathai 25:10) Thaum twg Yexus mam li “tuaj txog” lossis “los” txog? Raws li Phau Tsom Faj Askiv lub 7 Hli tim 15, 2013, Yexus zaj lus faj lem hauv Mathai tshooj 24 thiab 25 qhia 8 zaus txog lub sijhawm uas Yexus yuav “los.” Yexus yuav “los” rau lub sijhawm uas muaj kev ceeblaj txom nyem loj kawg li. Thaum ntawd nws yuav los txiav txim thiab rhuav tshem lub qab ntuj limhiam no. Yog li ntawd, zaj kwv huam txog 10 tus hluas nkauj yog hais rau tiam kawg, tiamsis Yexus yuav “los” thaum tabtom muaj kev ceeblaj txom nyem loj kawg nkaus.

6. Lub ntsiab rau Yexus zaj kwv huam yog dabtsi?

⁶ Lub ntsiab rau Yexus zaj kwv huam yog dabtsi? Nco ntsoov tias hauv Mathai tshooj 24, Yexus qhia txog tus qhev ncaj thiab ntse. Tus qhev ntawd yog ib pawg kwvtij tsawg tsawg ntawm cov uas xaiv tseg. Lawv yog cov uas ntaus thawj rau Yexus Khetos cov thwjtim nyob rau tiam kawg. Yexus ceeb toom cov txivneej ntawd tias lawv yuav tsum muab siab npuab nws tiag. Hauv tshooj 25, Yexus mam li hais zaj kwv huam txog 10 tus hluas nkauj. Zaj kwv huam ntawd yog hais ceeb toom tag nrho cov xaiv tseg tibsi uas nyob rau tiam kawg. Zaj ntawd txhawb kom lawv “zov tos” xwv lawv thiaj tsis poob lawv qhov nqe zog mus saum ntuj ceeb tsheej. (Mathai 25:13) Cia peb kawm seb cov xaiv tseg tau coj raws li zaj kwv huam txog 10 tus hluas nkauj li cas.

COV XAIV TSEG COJ RAWS LI ZAJ KWV HUAM LI CAS?

7, 8. (1) Cov hluas nkauj ntse npaj txhij tos li cas? (2) Cov xaiv tseg npaj txhij li cas thiab?

⁷ Hauv Yexus zaj kwv huam, ua cas cov hluas nkauj ntse ho txawv ntawm cov hluas nkauj ruam? Rau qhov lawv npaj txhij tos tus nraug vauv thiab lawv ceev faj zov tos lub sijhawm nws yuav los. Kaum tus hluas nkauj ntawd yuav tsum ceev faj thiab kho kom lawv tej teeb cig lam lug zov tos. Muaj 5 tug hluas nkauj uas ntse, lawv npaj roj txhab nyob tsam lawv cov teeb roj tas lawm. Ua li cov xaiv tseg uas npuab siab rau Vajtswv tau npaj txhij tos hnub Yexus los li cas?

⁸ Cov xaiv tseg yeej npaj txhij los ua tes haujlwm uas Yehauvas pub rau lawv. Lawv paub tias thaum lawv ua Vajtswv tes haujlwm lawv yuav tsum tso ib puas tsav yam hauv Xatas lub qab ntuj no tseg. Puas yog lawv lam teev tiam Yehauvas vim hnub kawg los ze lawm xwb? Tsis yog. Lawv muab siab npuab Yehauvas thiab zoo siab teev tiam nws rau qhov lawv hlub nws thiab hlub nws tus Tub. Lawv tsis cia lub qab ntuj no ntxias kom lawv ua siab hlob, ntshaw nyiaj txiag, thiab ntshaw kev nkauj kev nraug. Lawv zoo ib yam li cov hluas nkauj ntse uas npaj teeb cig lam lug rau sawvdaws pom. Txawm tias zoo li tus Nraug Vauv tuaj lig zog, los lawv ua siab ntev tos.​—Filipi 2:15.

9. (1) Yexus ceeb toom li cas? (2) Thaum cov xaiv tseg hnov lub suab hu tias, “Tus nraug vauv tuaj lawm lauj!” lawv ua li cas xwb? (Saib cov lus hauv qab taw qhia.)

⁹ Cov hluas nkauj ntse npaj txhij tos tau tus nraug vauv rau qhov lawv ceev faj zov tos. Tiamsis hauv zaj kwv huam ntawd thaum lawv nyob tos tus nraug vauv, 10 tus hluas nkauj puavleej “tsaug zog” ncaws nruj nris lawm. Zaj no ceeb toom cov xaiv tseg li cas? Ceeb toom tias niaj hnub no cov xaiv tseg yuav tsum hajyam ceev faj zov tos hnub uas Khetos yuav los. Yog lawv cia lub qab ntuj no tab kaum lawv ces lawv yuav “tsaug zog” ib yam li cov hluas nkauj ntawd thiab. Yexus paub tias txawm yog ib tug neeg kub siab npaum li cas los, yog nws tsis ceev faj ces nws yuav qaug rau lub qab ntuj no. Yog li ntawd, cov xaiv tseg yuav tsum siv zog peem tiag. Lawv yuav ceev faj zov tos li cas? Hauv zaj kwv huam, 10 tus hluas nkauj hnov luag hu tias: “Tus nraug vauv tuaj lawm lauj!” Lawv thiaj sawv tsees. Tiamsis thaum kawg tsuas yog cov hluas nkauj ntse thiaj tos tau nws xwb. (Mathai 25:5, 6; 26:41) Ib yam li ntawd, nyob rau tiam kawg no cov xaiv tseg hnov lub suab hu tias, “Tus nraug vauv tuaj lawm lauj!” Lawv pom tej xwm txheej uas qhia tias Yexus yuav los sai sai no. Lawv twb npaj txhij tos hnub ntawd lawm.a (Saib cov lus hauv qab taw qhia.) Cia peb kawm seb Yexus xaus zaj kwv huam ntawd li cas, peb thiaj paub tias Yexus zaj kwv huam no muaj tiav rau thaum twg.

COV HLUAS NKAUJ NTSE TAU NQE ZOG TIAMSIS COV HLUAS NKAUJ RUAM RAUG TXIM

10. Puas yog muaj ib hnub cov xaiv tseg yuav tsis kam pab cov uas mus cuag lawv?

¹⁰ Hauv zaj kwv huam cov hluas nkauj ruam thov kom cov hluas nkauj ntse faib roj rau lawv siv. Tiamsis cov hluas nkauj ntse tsis kam pab lawv. (Nyeem Mathai 25:8, 9.) Puas yog muaj ib hnub cov xaiv tseg yuav tsis kam pab cov uas mus cuag lawv? Yog, yuav muaj li ntawd tiag. Vim li cas? Zoo li peb twb kawm lawd, zaj kwv huam no yog hais rau lub sijhawm uas Yexus los txiav txim. Nws los thaum yuav xaus lub sijhawm muaj kev ceeblaj txom nyem loj kawg nkaus. Thaum ntawd cov xaiv tseg twb raug nias cim zaum kawg nkaus ua ntej lawm. Yog li ntawd, thaum cov ruam thov kev pab los, cov xaiv tseg yuav tsis kam pab lawm.

11. (1) Ua ntej lub sijhawm muaj kev ceeblaj txom nyem loj kawg nkaus, yuav muaj dabtsi tshwm sim? (2) Ua cas cov hluas nkauj ntse hais kom cov hluas nkauj ruam mus yuav roj lwm qhov?

¹¹ Yog li ntawd, ua ntej lub sijhawm muaj kev ceeblaj txom nyem loj kawg li, tag nrho cov xaiv tseg yuav “raug nias cim” rau zaum kawg nkaus. (Qhia Tshwm 7:1-4) Thaum lawv tau lub cim ntawd ces lawv paub tseeb lawm tias lawv yuav tau mus saum ntuj ceeb tsheej tiag. Tiamsis ua ntej lub caij muaj kev ceeblaj txom nyem loj kawg nkaus, yuav ua li cas rau cov xaiv tseg uas tsis ceev faj zov tos thiab tsis npuab siab rau Yehauvas? Vajtswv yuav tsis nias lub cim kawg nkaus rau cov ntawd. Yog li ntawd, thaum pib lub sijhawm muaj kev ceeblaj txom nyem loj kawg nkaus, cov uas ruam yuav xav tsis thoob thaum Vajtswv rhuav tshem lub Tuam Ceeb Npanpiloo. Thaum ntawd lawv mam li ras dheev tias lawv tsis tau npaj txhij rau hnub Yexus los. Thaum ntawd yog tias lawv thov kev pab los ntawm cov xaiv tseg, cov xaiv tseg yuav ua li cas? Zoo ib yam li zaj kwv huam, cov hluas nkauj ntse yuav hais kom cov hluas nkauj ruam mus nrhiav roj lwm qhov. Tiamsis thaum ntawd twb yog ib tag hmo, yeej tsis muaj neeg muag roj rau lawv lawm, lig dhau lawm.

12. (1) Vajtswv puas nias lub cim kawg nkaus rau cov xaiv tseg uas tsis muab siab npuab Nws? (2) Cov hluas nkauj ruam yuav raug xwm dabtsi?

¹² Lub sijhawm muaj kev ceeblaj txom nyem loj kawg nkaus, cov xaiv tseg uas npuab siab rau Vajtswv yuav tsis kam pab cov uas tso Vajtswv tseg. Thaum ntawd lig dhau lawm. Yuav ua li cas rau cov uas tsis npuab siab rau Vajtswv? Hauv zaj kwv huam, thaum cov hluas nkauj ruam mus yuav roj lawm, “tus nraug vauv txawm tuaj txog, mas cov uas npaj txhij lawd kuj tau nrog nws mus rau hauv rooj tshoob, ces lub qhov rooj txawm raug muab kaw lawm.” Thaum lub sijhawm muaj kev ceeblaj txom nyem loj kawg li yuav xaus, Yexus yuav los. Nws yuav coj cov xaiv tseg uas npuab siab rau Yehauvas mus saum ntuj. (Mathai 24:31; 25:10; Yauhas 14:1-3; 1 Thexalaunika 4:17) Tiamsis Yexus yuav tsis txais yuav cov uas tsis npuab siab rau Yehauvas. Zoo ib yam li cov hluas nkauj ruam, lawv yuav thov tias: “Yawg hlob, yawg hlob, thov qheb qhov rooj rau peb.” Tiamsis Yexus yuav teb li cas? Nws yuav hais ib yam li nws teb cov uas zoo li tshis, nws yuav hais tias: “Kuv hais tseeb rau nej tias, kuv tsis paub nej.”​—Mathai 7:21-23; 25:11, 12.

13. (1) Yexus zaj kwv huam puas yog lus faj lem qhia tias cov xaiv tseg ib txhia yuav tso Vajtswv tseg? (2) Yexus cov lus ceeb toom qhia tias nws tso siab li cas rau cov xaiv tseg? (Saib daim duab ntawm sab 16.)

¹³ Zaj kwv huam no puas yog ua faj lem tias cov xaiv tseg ib txhia yuav tso Vajtswv tseg thiab lwm tus yuav hloov lawv chaw? Tsis yog. Peb paub li ntawd rau qhov hauv Mathai tshooj 24, Yexus ceeb toom kom tus qhev ncaj thiab ntse tsis txhob pauv siab ua li tus qhev phem. Tsis yog Yexus qhia tias tus qhev yuav ntxeev siab, tiamsis nws tsuas ceeb toom kom lawv ceev faj xwb. Ib yam li ntawd, hauv Yexus zaj kwv huam muaj 5 tug hluas nkauj ruam thiab 5 tug hluas nkauj ntse. Zaj no ceeb toom tias cov xaiv tseg nyias yuav tau txiav txim nyias seb lawv puas yuav npaj txhij zov tos. Yog tias lawv tsis ceev faj lawv yuav coj li cov hluas nkauj ruam. Povlauj kuj ceeb toom cov xaiv tseg li ntawd thiab. (Nyeem Henplais 6:4-9; muab piv rau Kevcai 30:19.) Povlauj hais phua hlo rau lawv tsis zais li. Tiamsis nws yeej tso siab tias nws cov kwvtij nkauj muam yuav tau nqe zog yav tom hauv ntej. Yexus cov lus ceeb toom kuj qhia tias nws tso siab rau cov xaiv tseg. Nws tso siab tias cov xaiv tseg yuav npuab siab rau Yehauvas thiab yuav tau txais nqe zog zoo kawg nkaus.

ZAJ KWV HUAM PAB TAU LWM PAB YAJ LI CAS?

14. Zaj kwv huam txog cov hluas nkauj pab tau lwm pab yaj li cas?

¹⁴ Yexus zaj kwv huam yog hais rau cov xaiv tseg. Zaj no puas pab tau lwm pab yaj thiab? (Yauhas 10:16) Yeej pab tau thiab! Nco ntsoov tias thaum Yexus hais zaj kwv huam no, nws tus nru lug yog kom ceev faj “zov tos.” Yexus thiaj hais li no: “Tej uas kuv hais rau nej no kuv kuj hais rau sawvdaws tias, cia li zov tos.” (Malakau 13:37) Yexus xav kom nws cov thwjtim txhua tus npaj thiab ceev faj zov tos hnub uas nws yuav los. Zoo rau txhua tus Khixatia muab Vajtswv tes num tso ua ntej hauv lawv lub neej ib yam li cov xaiv tseg thiab. Nco ntsoov txog cov hluas nkauj ruam uas thov kom cov hluas nkauj ntse faib roj rau lawv. Tiamsis cov hluas nkauj ntse tsis kam qee roj rau lawv siv. Tus qauv ntawd ceeb toom peb sawvdaws tias, peb txhua tus yuav tsum npaj txhij thiab ceev faj zov tos. Peb yuav tsum muab siab npuab Vajtswv tiag tiag. Peb vam khom tsis tau lwm tus txojkev ntseeg. Yexus Khetos twb yuav los txiav txim sai sai no. Thaum kawg peb txhua tus yuav tau sawv ntawm nws xub ntiag. Cia peb sawvdaws npaj txhij tos hnub ntawd!

15. Vim li cas peb txhua tus tos ntsoov Yexus Khetos rooj tshoob?

¹⁵ Txhua tus Khixatia yeej tos ntsoov rooj tshoob uas Yexus piav hauv zaj kwv huam no. Yav tom hauv ntej, tom qab ntsuj rog Amakedoo, cov xaiv tseg yuav tau ua Yexus tus nkauj nyab. (Qhia Tshwm 19:7-9) Txhua leej txhua tus hauv ntiajteb no yuav txais koob hmoov nplua mias los ntawm Yexus rooj tshoob. Tej koob hmoov dabtsi? Yuav muaj ib lub tseem fwv zoo tiav log kav thoob plaws lub ntiajteb no. Cia peb txhua leej txhua tus, tsis hais cov uas muaj kev cia siab yuav mus saum ntuj lossis nyob hauv ntiajteb no, npaj txhij thiab ceev faj zov tos hnub ntawd. Yog tias peb ua li ntawd, peb yuav pom tej koob hmoov uas Vajtswv tau npaj tseg rau peb yav pem suab!