Xav Txog Tej Zaj Nyob Hauv Phau Vajlugkub

Muaj ntau zaj nyob hauv phau Vajlugkub uas yeej tau muaj tshwm sim tiag, uas peb kawm tau los pab peb lub neej. Yog peb muab ua tib zoo coj los xav, peb yuav to taub tias peb nyeem txog dab tsi thiab peb kawm tau li cas. Yog koj ua li hais nram no, yuav pab tau koj pom tias tej tug los sis tej zaj hauv phau Vajlugkub zoo li cas tiag.

• Nyeem nrov nrov. Yog koj nyeem Vajlugkub kom nrov nrov ces yuav pab kom koj pom tias muaj li cas rau li cas tiag. Thaum nej tsev neeg los nyeem Vajlugkub ua ke, xaiv nej ib tug zuj zus los ua ib tug uas nyob hauv phau Vajlugkub. Yog nej ua li ntawd nej thiaj li yuav pom tias muaj li cas rau li cas tiag.

• Xav seb muaj li cas rau lub sij hawm ntawd. Ua tib zoo xav seb thaum ntawd tus neeg ntawd tab tom xav li cas thiab muaj dab tsi tshwm sim. Koj kuj nug tau koj tus kheej li no: ‘Vim li cas tus neeg ntawd thiaj li hais los sis coj li ntawd? Yog kuv raug ib yam li tus neeg ntawd raug, kuv yuav xav li cas?’

• Kos duab. Txawm koj tsis txawj kos duab los, tsis txhob nyuaj siab. Yog koj kos duab tias tau muaj dab tsi tshwm sim rau lub sij hawm ntawd ces yuav pab tau koj pom thiab nco tias muaj li cas tiag.