ZAJ KAWM 15
ZAJ NKAUJ 30 Vajtswv Tsom Kwm Kuv
“Nyob Ze Vajtswv” Zoo Rau Peb!
“Kuv mas zoo siab kawg, vim kuv nyob ze Vajtswv.”—PHAU NTAWV NKAUJ 73:28.
LUB NTSIAB RAU ZAJ NO
Peb yuav kawm seb nyob ze Vajtswv yog li cas tiag thiab seb ho pab tau peb li cas.
1-2. (1) Peb yuav tau ua dab tsi peb thiaj nrog tau ib tug twg sib raug zoo? (2) Nyob rau hauv zaj kawm no peb yuav tham txog dab tsi?
KOJ puas muaj ib tug phooj ywg uas koj raug zoo nrog? Neb pib ua phooj ywg li cas? Tej zaud koj lauj sij hawm nrog nws ua ke ntau ntau, paub tej yam uas nws raug, paub tej yam twg nws nyiam thiab tsis nyiam, thiab pom nws tej yeeb yam zoo uas koj xav xyaum. Tej no thiaj ua rau koj nyiam nrog nws heev.
2 Yuav kom koj ntaus tau phooj ywg nrog ib tug twg zoo zoo, koj yuav tau lauj sij hawm ntau heev nrog nws. Zoo ib yam li ntawd, yuav kom peb ntaus tau phooj ywg nrog Yehauvas, peb yuav tau lauj sij hawm los kawm kom paub nws zoo. Nyob rau hauv zaj kawm no yuav tham txog seb qhov uas peb nyob ze Vajtswv yog li cas tiag thiab pab tau peb li cas. Peb yuav xub mus tham seb vim li cas ho zoo rau peb nyob ze Yehauvas uas yog peb tus Phooj Ywg uas zoo tshaj plaws.
3. Vim li cas ho zoo rau peb xav txog tej yam zoo uas peb yuav tau yog peb nyob ze Yehauvas?
3 Peb yuav tau ua tib zoo xav seb vim li cas txoj kev sib raug zoo nrog Yehauvas ho zoo rau peb. (Phau Ntawv Nkauj 63:6-8) Ua li cas peb yuav tau xav txog tej no? Cia peb muab tham li no kom thiaj nkag siab. Tib neeg yeej paub hais tias ua neej nyob yuav tau noj tej zaub mov zoo, qoj ib ce, pw kom txaus, thiab haus dej txhua txhua hnub. Cov neeg uas niaj hnub ua li hais tas no yeej noj qab nyob zoo dua li cov uas tsis quav ntsej dab tsi hlo li. Zoo ib yam li ntawd, peb yeej paub tias zoo rau peb nrog Yehauvas sib raug zoo tiam sis peb yuav tau xav seb vim li cas peb yuav tau nrog nws raug zoo xwv peb thiaj muaj lub siab xav nyob ze nws mus li.—Phau Ntawv Nkauj 119:27-30.
4. Tus uas sau Phau Ntawv Nkauj 73:28 hais li cas?
4 Nyeem Phau Ntawv Nkauj 73:28. Tus uas sau Phau Ntawv Nkauj 73 yog ib tug Levis uas ntaus nkauj ntawm Yehauvas lub tuam tsev. Tej zaud nws kuj teev tiam Yehauvas tau ntau ntau xyoo lawm. Txawm li ntawd los nws nco ntsoov hais rau nws tus kheej thiab lwm tus tias qhov uas “nyob ze Vajtswv” yeej zoo dua rau sawv daws. Ua li nyob ze Vajtswv ho pab tau ib tug twg li cas?
“NYOB ZE VAJTSWV” THIAJ MUAJ KEV ZOO SIAB
5. (1) Vim li cas qhov uas peb yim nrog Yehauvas sib raug zoo peb yim muaj kev zoo siab? (2) Raws li Pajlug 2:6-16, piav seb Yehauvas lub tswv yim ho pab thiab tiv thaiv tau koj li cas.
5 Yog peb yim nrog Yehauvas sib raug zoo ces peb yim muaj kev zoo siab. (Phau Ntawv Nkauj 65:4) Yeej muaj ntau yam ua rau peb muaj kev zoo siab. Ib yam yog thaum peb nyeem thiab mloog tej lus uas nws qhia rau peb hauv phau Vajlugkub ces yuav tsav tau tswv yim rau peb. Lub tswv yim ntawd yuav pab kom peb tsis txhob raug haub ntxias mus ua phem thiab ua tau yuam kev. (Nyeem Pajlug 2:6-16.) Vim li no nyob hauv phau Vajlugkub thiaj hais tias: “Tus uas muaj tswvyim thiab totaub txhua tsav yam yeej nyob kaj siab lug.”—Pajlug 3:13.
6. Dab tsi ho ua rau tus sau phau ntawv nkauj tsis muaj kev zoo siab?
6 Muaj tej lub sij hawm Yehauvas cov phooj ywg kuj ntsoos ntsoos. Xws li tus uas sau Phau Ntawv Nkauj 73 tsis muaj kev zoo siab vim nws pheej xav tias cov tib neeg uas tsis quav ntsej Vajtswv thiab Nws tej kev cai tau zoo noj tau zoo nyob. Nws txawm chim ces pib khib thiab ntshaw tej uas lawv muaj. Nws xav tias tej tib neeg ua nruj ua tsiv thiab khav theeb tau txhua yam uas lawv lub siab ntshaw, muaj txiag nplua nuj, noj qab haus huv thiab tsis raug kev txom nyem. (Phau Ntawv Nkauj 73:3-7, 12) Tej no xeeb txob tus sau phau ntawv nkauj heev, txawm ua rau nws xav tias tsis tsim nyog rau nws teev tiam Yehauvas. Nws ntxhov siab hnyo nws thiaj hais tias: “Qhov uas kuv tswj kuv lub siab kom ua tau neeg zoo thiab tsis ua txhaum ntawd txawm tsis muaj nqis li los?”—Phau Ntawv Nkauj 73:13.
7. Thaum peb ntsoos ntsoos, peb yuav tau ua dab tsi? (Saib daim duab ntawm lub khaum.)
7 Txawm tus uas sau phau ntawv nkauj ntsoos ntsoos los nws kuj pib hloov nws txoj kev xav. Nws “mus rau hauv [Vajtswv] lub Tuamtsev” ces Vajtswv thiaj kho nws txoj kev xav. (Phau Ntawv Nkauj 73:17-19) Thaum peb muaj chaw tu siab los Yehauvas yeej paub. Peb kuj thov tau kom Yehauvas coj peb txoj hau kev. Tiam sis thaum nws siv nws Txoj Lus thiab cov kwv tij nkauj muam hauv lub koom txoos los pab peb los peb yuav tsum txais yuav. Yog peb ua li no ces yuav pab kom peb thev taus ib hnub dhau ib hnub. Tsis hais thaum peb muaj kev nyuaj siab ntxhov txoog los Yehauvas yuav nplig peb.—Phau Ntawv Nkauj 94:19.a
Tus Levis uas sau Phau Ntawv Nkauj 73 nyob ntawm Vajtswv lub tuam tsev (Saib nqe 7)
“NYOB ZE VAJTSWV” THIAJ MUAJ KEV VAM KEV CIA SIAB
8. Vim li cas ho zoo rau peb nyob ze Vajtswv?
8 Muaj ob yam uas yog peb nyob ze Vajtswv yuav zoo rau peb. Qhov thawj, yuav pab kom peb muaj lub neej uas muaj ntsiab rau. Qhov ob, pab kom peb muaj kev vam kev cia siab rau yav tom ntej. (Yelemis 29:11) Cia peb ua tib zoo tshuaj ib yam zuj zus.
9. Ua li cas nrog Yehauvas sib raug zoo peb ho tau lub neej uas muaj ntsiab rau?
9 Thaum peb muaj Yehauvas ua peb tus phooj ywg ces peb yuav ua ib lub neej uas muaj ntsiab rau. Niaj hnub no cov tib neeg uas tsis kam lees tias muaj Vajtswv lam tau lam ua neej thiab lawv ntseeg hais tias ib hnub tom ntej tib neeg yuav tu noob tas hauv ntiaj teb. Tiam sis raws li peb kawm hauv Vajtswv Txoj Lus, peb yeej ntseeg tias “yeej muaj Vajtswv tiag, thiab Vajtswv yuav muab nqi zog rau tus uas los cuag Vajtswv.” (Henplais 11:6) Tsis tas li ntawd, Yehauvas tsim kom peb muaj lub siab xav teev tiam nws. Thaum peb teev tiam nws lawd, thiaj li ua rau peb kaj siab.—2 Kevcai 10:12, 13.
10. Raws li Phau Ntawv Nkauj 37:29, Yehauvas tau cog lus li cas rau cov uas cia siab rau nws?
10 Muaj coob leej ntau tus lub neej tsuas tag rau lawv txoj hauj lwm, muaj ib tse neeg, thiab tseg nyiaj rau thaum laus. Lawv yeej tsis muaj Vajtswv hlo li. Tiam sis Yehauvas cov tib neeg cia siab rau nws thiab tso siab rau nws tej lus cog tseg yav tom ntej. (Phau Ntawv Nkauj 25:3-5; 1 Timautes 6:17) Xws li peb vam ntsoov yuav tau pe hawm nws mus ib txhiab ib txhis hauv lub Vaj Kaj Siab.—Nyeem Phau Ntawv Nkauj 37:29.b
11. Qhov uas peb nyob ze Vajtswv ho zoo rau peb li cas, thiab Vajtswv ho xav li cas?
11 Qhov uas peb nyob ze Vajtswv ntawd yeej zoo rau ntau fab, xws li Yehauvas yuav zam cov xav los cuag nws lub txim. (Yaxayas 1:18) Yog li ntawd, peb thiaj li tsis muaj lub siab uas rov nkaug peb ntxiv lawm. (Phau Ntawv Nkauj 32:1-5) Ntxiv ntawd, peb yuav muaj siab ua tau rau Yehauvas zoo siab. (Pajlug 23:15) Txuas ntxiv ntawd, peb kuj tau txais ntau yam zoo vim peb ua Yehauvas ib tug phooj ywg. Cia peb mam li soj ntsuas seb yuav ua li cas peb thiaj nyob ze rau Vajtswv.
YUAV UA LI CAS PEB THIAJ “NYOB ZE VAJTSWV” KAM TIAG?
12. Koj tau ua dab tsi kom koj thiaj nyob ze Vajtswv?
12 Ua ntej koj ua kev cai raus dej rau Yehauvas, koj twb ua ntau yam kom koj thiaj ua tau nws tus phooj ywg. Xws li koj kawm qhov tseeb txog Vajtswv Yehauvas thiab Yexus Khetos, hloov dua siab tshiab, muaj kev ntseeg rau Vajtswv, thiab koj twb hloov ua ntu zus kom koj thiaj ua tau raws li nws lub siab nyiam. Yuav kom koj nrog Vajtswv sib raug zoo kam tiag, koj yuav tau ua raws li hais tas no mus li.—Kaulauxais 2:6.
13. Peb yam uas pab tau peb kom nyob ze Vajtswv yog dab tsi?
13 Muaj peb yam uas yuav pab tau peb kom nyob ze Yehauvas mus li. (1) Peb yuav tau nyeem thiab kawm phau Vajlugkub tsis tseg tsis tu. Thaum peb kawm, peb tsis txhob kawm tej yam ntiav ntiav tiam sis peb yuav tau kawm kom paub seb Vajtswv xav kom peb ua li cas rau li cas thiab xyaum coj lub neej raws li phau Vajlugkub tej hauv paus ntsiab lus. (Efexus 5:15-17) (2) Peb yuav tau ua zoo xav txog tej uas Vajtswv tau ua rau peb kom tsav tau peb txoj kev ntseeg. (3) Peb yuav tau ntxub tej yam uas Yehauvas ntxub thiab tsis txhob mus nrog tej neeg uas nyiam ua phem ua qias ua ke.—Phau Ntawv Nkauj 1:1; 101:3.
14. Raws li 1 Kauleethaus 10:31, peb ua tau tej yam twg txhua txhua hnub uas haum Yehauvas siab? (Saib cov duab.)
14 Nyeem 1 Kauleethaus 10:31. Yog ib yam tseem ceeb heev uas thaum peb ua dab tsi los peb yuav tau ua kom haum Yehauvas siab. Muaj tej zaud peb yuav xav tias mus kev sib txoos thiab mus tshaj tawm xwb ces zoo kawg li lawm tiam sis kuj yog tej peb ua ub ua no ib hnub dhau ib hnub rau Yehauvas thiab. Xws li peb yuav tau ua ncaj ua ncees thiab pub yam ub yam no uas peb muaj rau lwm tus. (2 Kauleethaus 8:21; 9:7) Tsis tas li ntawd, peb yuav tau ris txiaj ntsig rau txoj sia uas peb tau es tsuas noj thiab haus kom hauj sim xwb, thiab peb yuav tau ua ub ua no kom peb lub cev thiaj noj qab haus huv. Thaum Yehauvas pom txhua yam uas peb ua rau nws mas yuav ua rau nws yim huab hlub peb.—Lukas 16:10.
Peb ua haum Yehauvas siab thaum peb ua zoo tsav tsheb, saib xyuas peb tus kheej, noj tej zaub mov zoo, thiab txawj xav txog luag (Saib nqe 14)
15. Yehauvas xav kom peb coj li cas rau lwm tus?
15 Yehauvas yeej ua zoo rau cov teev tiam thiab cov tsis teev tiam nws huv tib si. (Mathais 5:45) Nws xav kom peb ua li ntawd rau lwm tus tib yam nkaus. Xws li peb yuav tau “tsis txhob thuam leejtwg, tsis txhob nyiam sib cav sib ceg, tiamsis . . . ib leeg hlub ib leeg thiab nrog sawvdaws sib raug zoo.” (Titus 3:2) Txawm tib neeg tsis ntseeg Yehauvas los peb yuav tsum tsis txhob xav tias peb zoo tshaj lawv. (2 Timautes 2:23-25) Peb yuav nyob ze Yehauvas yog hais tias peb ua zoo thiab xav txog txhua tus huv tib si.
“NYOB ZE VAJTSWV” TXAWM PEB UA YUAM KEV
16. Tus sau Phau Ntawv Nkauj 73 txawm pib xav li cas?
16 Tej zaud ntev mus ntev tuaj, koj lub siab yuav rov nkaug koj tias tsis tsim nyog rau Yehauvas hlub koj ntxiv lawm vim koj ua ntau yam yuam kev. Kuj tau muaj li no rau tus uas sau Phau Ntawv Nkauj 73 tib yam nkaus. Nws hais tias: “Kuv txhais kotaw twb yuav dawm, kuv txhais kotaw twb yuav plam tib tiag.” (Phau Ntawv Nkauj 73:2) Nws lees rau Yehauvas tias nws “chim,” “tsis totaub” thiab “ruam ib yam li tus tsiaj.” (Phau Ntawv Nkauj 73:21, 22) Puas yog nws xav tias tim nws ua yuam kev, Yehauvas tsis hlub thiab tsis zam txim rau nws?
17. (1) Thaum tus sau phau ntawv nkauj qaug zog zis, nws tau ua dab tsi? (2) Peb khaws tau li cas los ntawm nws tus yam ntxwv? (Saib cov duab.)
17 Txawm tias tus sau phau ntawv nkauj xav tias Yehauvas tsis hlub nws lawm los qhov ntawd tsuas yog ib nyuag ntu xwb. Thaum nws qaug zog yam li no nws paub hais tias nws yuav tau nyob ze Yehauvas. Nws thiaj sau tias: ‘Txawm yog li ntawd los kuv yeej nrog nraim Yehauvas nyob ua ke, thiab koj yeej tuav rawv kuv txhais tes. Koj tej lus qhuab ntuas niaj hnub coj kuv txoj hau kev, thiab txog thaum kawg koj yuav los tos kuv mus thiab pub rau kuv tau ntsejmuag.’ (Phau Ntawv Nkauj 73:23, 24) Txawm peb los tib yam nkaus, peb yuav tau thov Yehauvas kom txhawb peb lub zog thaum peb txoj kev ntseeg tsuag los sis thaum peb qaug zog vim peb ua tau tej yam yuam kev. (Phau Ntawv Nkauj 73:26; 94:18) Ntxiv ntawd, yog peb ho ua yuam kev tau ib nyuag ntu lawm los peb kuj rov tau los cuag Yehauvas vim nws tos tsis hnyu yuav zam peb lub txim. (Phau Ntawv Nkauj 86:5) Nco ntsoov tias thaum peb qaug zog zis, peb yuav tau nyob ze peb tus Vajtswv.—Phau Ntawv Nkauj 103:13, 14.
Thaum peb txoj kev ntseeg tsuag, peb yuav tau nyob ze Yehauvas es thov nws thiab mus kev sib txoos (Saib nqe 17)
“NYOB ZE VAJTSWV” MUS IB TXHIS
18. Ua li cas peb ho nyob ze tau rau Yehauvas mus ib txhis?
18 Tsis muaj ib hnub uas peb yuav tsis kawm txog Yehauvas li. Peb yeej nyob tau ze rau nws mus ib txhis. Nyob hauv phau Vajlugkub hais tias “tsis muaj leej twg yuav nkag siab tau” Yehauvas txoj kev, lub tswv yim, thiab kev txawj ntse.—Loos 11:33.
19. Nyob hauv Phau Ntawv Nkauj qhia peb li cas txog yav tom ntej?
19 Nyob hauv Phau Ntawv Nkauj 79:13 hais tias: “Peb uas yog koj haiv neeg, yog koj pab yaj uas nyob hauv koj lub tshav zaub yuav ua koj tsaug ib txhis, peb yuav qhuas koj ib tiam dhau ib tiam mus li.” Yog peb yim nyob ze Vajtswv ces peb yuav tau txais nws tej koob hmoov mus ib txhis. Peb yuav tsa ncauj hlo hais tias: “Vajtswv yog kuv lub zog, nws yog tus uas kuv ntshaw mus ibtxhis.”—Phau Ntawv Nkauj 73:26.
ZAJ NKAUJ 32 Tuaj Hlo Yehauvas Tog!
a Cov uas muaj kev nyuaj siab tau ntau xyoo tej zaum yuav tsum tau tej kws kho mob pab. Mus saib Phau Tsom Faj, Phau 1, Xyoo 2023.
b Phau Ntawv Nkauj 37:29, (TT ): “Cov ncaj ncees yuav tau lub [ntiaj teb] ua lawv teej lawv tug, thiab tau nyob rau hauv mus ib txhis.”