Kav Tsij Ua Kev Cai Raus Dej

1. Vim li cas ho zoo rau koj ua kev cai raus dej?

KOJ puas hlub Vajtswv Yehauvas, tus uas muab ib puas tsav yam zoo pub rau koj, tsis hais koj txoj sia huv tib si? Qhov uas koj qhia tau tias koj hlub nws tshaj plaws yog muab koj tus kheej cob rau nws thiab ua kev cai raus dej. Yog koj ua li no ces koj yuav yog Yehauvas tsev neeg. Tsis tas li ntawd, Yehauvas yuav yog koj Leej Txiv, koj tus Phooj Ywg thiab yuav saib xyuas koj vim koj yog nws teej nws tug. (Phau Ntawv Nkauj 73:24; Yaxayas 43:1, 2) Ntxiv ntawd, koj yuav muaj kev vam kev cia siab nyob mus ib txhis.​—1 Petus 3:21.

2. Nyob rau hauv zaj kawm no peb yuav tham txog dab tsi?

² Puas muaj dab tsi khuam cheem koj kom tsis txhob ua kev cai raus dej? Tsis yog koj tib leeg thiaj muaj ub muaj no los khuam cheem. Muaj coob leej ntau tus kuj yuav tau hloov lawv tus cwj pwm thiab lawv tej kev xav ua ntej ua kev cai raus dej. Tam sim no lawv zoo siab thiab kub siab teev tiam Yehauvas. Koj khaws tau dab tsi los ntawm cov ua kev cai raus dej nyob thawj 100 xyoo? Cia peb mam li mus tham seb lawv raug dab tsi thiab seb lawv tso yam ntxwv tseg li cas rau peb xyaum.

COV XAMALIS UA KEV CAI RAUS DEJ

3. Ib co Xamalis yuav tau hloov li cas ua ntej lawv ua tau kev cai raus dej?

³ Nyob rau Yexus lub caij, cov neeg Xamalis yeej ntseeg Vajtswv. Feem coob nyob rau lub nroog Sekhees thiab Xamalis uas yog yav qaum teb ntawm Yudias. Ua ntej cov Xamalis yuav ua tau kev cai raus dej, lawv yuav tsum ntseeg tag nrho Vajtswv Txoj Lus vim lawv tsuas ntseeg thawj tsib phau ntawv Vajlugkub uas yog Chivkeeb mus txog 2 Kevcai thiab tej zaud phau Yausuas xwb. Lawv haj tseem tos tus Mexiyas uas raws li hais hauv 2 Kevcai 18:18, 19. (Yauhas 4:25) Yuav kom lawv ua tau kev cai raus dej, lawv yuav tsum lees yuav Yexus ua tus Mexiyas. “Cov neeg Xamalis hauv lub nroog ntawd coob tus” yeej tau ntseeg li ntawd. (Yauhas 4:39) Hos muaj ib txhia yuav tau tswj kom tsis txhob xaiv ntsej muag vim cov Xamalis thiab cov Yudais yeej ib txwm sib ntxub.​—Lukas 9:52-54.

4. Raws li Tes Hauj Lwm 8:5, 6, 14, ib txhia Xamalis xav li cas txog tej uas Filis qhia rau lawv?

⁴ Dab tsi pab tau cov Xamalis ua kev cai raus dej? Thaum Filis “qhia tib neeg txog tus Khetos,” muaj ib txhia Xamalis “los ntseeg Vajtswv txoj lus.” (Nyeem Tes Hauj Lwm 8:5, 6, 14.) Txawm Filis yog ib tug neeg Yudais los lawv kuj tsis xav li cas. Tej zaud lawv kuj paub Vajtswv txoj lus hais tias Vajtswv tsis xaiv ntsej muag. (2 Kevcai 10:17-19) Lawv “mloog tej uas Filis qhia” txog Khetos thiab lawv xam pom tias Vajtswv yeej nrog nraim Filis. Filis ua ntau yam txuj ci xws li kho tib neeg thiab ntiab dab tawm.​—Tes Hauj Lwm 8:7.

5. Koj khaws tau li cas los ntawm cov Xamalis?

⁵ Yog cov Xamalis tsis xav mloog Filis hais los yeej tau vim nws yog neeg Yudais los sis tej zaud lawv tsis tau hnov dua tej nws qhia ib zaug. Tiam sis lawv kuj tsis ua li ntawd. Tom qab lawv paub hais tias Filis qhia qhov tseeb rau lawv ces lawv kuj maj nrawm nroos ua kev cai raus dej. Nyob hauv phau Vajlugkub qhia tias: “Thaum Filis tshaj tawm txoj xov zoo txog Vajtswv txoj kev kav thiab Yexus Khetos lub npe, muaj cov poj niam txiv neej los ntseeg thiab ua kev cai raus dej tib si.” (Tes Hauj Lwm 8:12) Ua li koj puas ntseeg tias Vajtswv Txoj Lus qhia qhov tseeb? Koj puas ntseeg tias Yehauvas Cov Tim Khawv tsis xaiv ntsej muag thiab ib leeg hlub ib leeg tiag tiag? (Yauhas 13:35) Yog koj ntseeg ces tsis txhob ua xyem xyav. Kav tsij ua kev cai raus dej. Koj yeej tso siab tau tias Yehauvas yuav foom koob hmoov rau koj.

6. Lunpees tus yam ntxwv ho pab tau koj li cas?

⁶ Lunpees (Ruben) nyob rau teb chaws Ntsaws Mes Nis (Germany). Nws tsev neeg puav leej yog Yehauvas Cov Tim Khawv. Thaum nws tseem yau, nws pheej xav tias xyov puas muaj Yehauvas tiag. Ua li dab tsi thiaj pab tau kom nws tsis txhob xav li ntawd? Nws thiaj li txiav txim siab kawm Vajlugkub ntxiv vim nws paub tias tseem tshuav ntau yam uas nws tsis tau paub. Nws hais tias: “Thaum kuv kawm Vajlugkub rau kuv tus kheej, kuv yuav tau tshawb nrhiav tej lub ntsiab uas kuv pheej ua xyem xyav txog. Kuv thiaj li kawm lub ntsiab neeg puas yog txia ntau zaus.” Nws nyeem ib phau ntawv uas Yehauvas lub koom haum luam tawm tham txog seb tus Tswv Tsim puas hmov tshua txog peb.a Phau ntawv no raug Lunpees siab kawg li. Nws thiaj li hais rau nws tus kheej tias, ‘Yeej muaj Yehauvas tiag sav.’ Thaum Lunpees mus xyuas lub hauv paus koom haum loj, nws huab yam nyiam cov kwv tij nkauj muam heev. Thaum nws rov qab mus txog Ntsaws Mes Nis, nws thiaj li ua kev cai raus dej thaum nws muaj 17 xyoo. Raws li zaj hais tas no yog koj ua xyem xyav, koj yuav tau tshawb nrhiav tej ntaub ntawv uas Yehauvas lub koom haum luam tawm. Thaum koj paub qhov tseeb ces yuav pab tau kom koj tsis txhob ua xyem xyav ntxiv lawm. (Efexus 4:13, 14) Tsis tas li ntawd, thaum koj hnov txog Yehauvas cov tib neeg thoob plaws qab ntuj thiab pom koj lub koom txoos muaj kev sib hlub thiab sib koom siab ces koj yuav zoo siab tias koj muaj Yehauvas cov tib neeg.

XOLAUS UA KEV CAI RAUS DEJ

7. Xolaus yuav tau hloov nws txoj kev xav li cas?

⁷ Cia peb mus tham txog Xolaus uas yog neeg Thaxas tus yam ntxwv. Nws paub cov Yudais txoj kev cai thiab muaj koob nto npe rau cov neeg Yudais. (Kalatias 1:13, 14; Filipis 3:5) Nyob rau lub sij hawm ntawd, coob tus neeg Yudais xav hais tias cov Khixatias yog cov neeg fav xeeb. Xolaus thiaj li tsim txom lawv heev. Nws xav hais tias nws ua raws li Vajtswv lub siab nyiam. (Tes Hauj Lwm 8:3; 9:1, 2; 26:9-11) Yog Xolaus ntseeg Yexus thiab ua kev cai raus dej, nws paub hais tias nws yeej yuav raug kev tsim txom.

8. (1) Ua li cas Xolaus ho ua kev cai raus dej? (2) Raws li Tes Hauj Lwm 22:12-16, Ananias tau pab Xolaus li cas? (Saib daim duab.)

⁸ Dab tsi pab tau Xolaus ua kev cai raus dej? Thaum Yexus hais lus rau Xolaus, txawm muaj duab ci ntsa iab saum ntuj tuaj ua rau nws tsis pom kev. (Tes Hauj Lwm 9:3-9) Tau peb hnub nkaus, Xolaus yoo tshaib thiab xav txog tej yam uas los raug nws. Nws mam li paub meej tias Yexus yog tus Mexiyas thiab Yexus cov thwj tim txoj kev ntseeg yog txoj tseeb. Thaum ntawd ntshe Xolaus ntxhov siab heev tias nws pom zoo muab Xatefanaus tua pov tseg! (Tes Hauj Lwm 22:20) Tau peb hnub tom qab, Yexus ib tug thwj tim hu ua Ananias thiaj li tuaj cuag Xolaus, kho nws lub qhov muag, thiab txhawb kom nws kav tsij tsawg tsuag ua kev cai raus dej. (Nyeem Tes Hauj Lwm 22:12-16.) Xolaus thiaj li txo hwj chim thiab ua kev cai raus dej li Ananias hais.​—Tes Hauj Lwm 9:17, 18.

9. Koj kawm tau li cas los ntawm Xolaus?

⁹ Muaj qho yam uas peb kawm tau los ntawm Xolaus. Nws tsis cia txoj kev khav theeb los sis ntshai neeg txwv tau kom nws tsis txhob ua kev cai raus dej. Nws txo hwj chim thiab txaus siab hlo hloov tej yam hauv nws lub neej los mus raws Khetos qab. (Tes Hauj Lwm 26:14, 19) Xolaus yeej txaus siab hlo ua ib tug Khixatias tab txawm nws paub ntsoov tias nws yuav raug kev tsim txom. (Tes Hauj Lwm 9:15, 16; 20:22, 23) Tom qab nws ua kev cai raus dej tag, nws kuj tso siab rau Yehauvas pab nws thev ntau yam kev sim siab. (2 Kauleethaus 4:7-10) Tom qab koj ua kev cai raus dej los ua Yehauvas ib tug Tim Khawv tej zaud yuav muaj tej yam yuav sim koj txoj kev ntseeg los sis sim koj siab. Tiam sis cia li tso siab plhuav vim Vajtswv thiab Khetos nkawd yuav pab koj.​—Filipis 4:13.

10. Enas tus yam ntxwv pab tau koj li cas?

¹⁰ Enas (Anna) yog haiv neeg Khadis (Kurdish) uas nyob Yus Luv sab hnub tuaj (Eastern Europe). Tom qab nws niam ua kev cai raus dej tag, Enas txiv kam rau nws kawm Vajlugkub thaum nws muaj cuaj xyoos. Qhov no ua rau lawv cov nruab ze uas nrog lawv nyob tib tse tsis nyiam. Cov nruab ze xav hais tias yog ib tug twg tso lawv txoj kev ntseeg uas lawv poj koob yawm txwv ua tseg ces yog lawv rhuav ntsej muag. Thaum Enas muaj 12 xyoos, nws thov nws txiv tias nws xav ua kev cai raus dej. Nws txiv xav paub seb puas yog nws txiav txim siab ua kev cai raus dej los sis lwm tus txw nws. Enas teb tias, “Kuv hlub Yehauvas.” Nws txiv thiaj li tso cai rau nws ua kev cai raus dej. Tom qab nws ua kev cai raus dej, nws kuj raug thuam thiab ua saib tsis taus. Muaj ib tug nruab ze hais rau nws tias, “Koj deev hluas nraug thiab haus luam yeeb zoo dua li koj ua Yehauvas ib tug Tim Khawv.” Enas ua li cas xwb? Nws hais tias, “Yehauvas txhawb kuv lub zog thiab kuv niam thiab kuv txiv nkawd pab kuv heev.” Enas kuj muab sau tseg tias Yehauvas tau pab nws pes tsawg zaus. Tej thaud nws rov qab mus muab saib xwv nws thiaj li nco ntsoov tias Yehauvas tau pab nws. Yog koj ntshai lwm tus tawm tsam koj, nco ntsoov tias Yehauvas yeej yuav pab koj.​—Henplais 13:6.

KHAUNELIAS UA KEV CAI RAUS DEJ

11. Muaj dab tsi ho txwv tau Khaunelias ua kev cai raus dej?

¹¹ Nyob hauv phau Vajlugkub kuj qhia txog Khaunelias tus yam ntxwv. Nws “yog ib tug thawj tub rog” uas saib xyuas kwv lam li 100 leej tub rog Loos. (Tes Hauj Lwm 10:1) Tej zaud nws kuj muaj suab muaj npe. Nws “muaj lub siab dawb pub rau cov txom nyem.” (Tes Hauj Lwm 10:2) Yehauvas xa tus tub txib Petus mus qhia txoj xov zoo rau Khaunelias paub. Ua li nws tes hauj lwm puas tab kaum kom nws txhob ua kev cai raus dej?

12. Dab tsi pab tau Khaunelias ua kev cai raus dej?

¹² Dab tsi pab tau Khaunelias ua kev cai raus dej? Nyob hauv phau Vajlugkub hais tias Khaunelias thiab “nws tsev neeg puav leej ntseeg thiab hwm Vajtswv heev.” Thiab nws niaj hnub taij thov Vajtswv tsis tseg tsis tu. (Tes Hauj Lwm 10:2) Thaum Petus qhia txoj xov zoo rau Khaunelias, nws thiab nws tsev neeg puav leej ntseeg Khetos thiab maj nrawm nroos ua kev cai raus dej. (Tes Hauj Lwm 10:47, 48) Khaunelias txaus siab hlo hloov txhua yam hauv nws lub neej xwv nws thiaj li tau teev tiam Yehauvas nrog nws tsev neeg ua ke.​—Yausuas 24:15; Tes Hauj Lwm 10:24, 33.

13. Peb khaws tau dab tsi los ntawm Khaunelias?

¹³ Zoo ib yam li Xolaus, yog Khaunelias xav cia nws lub meej mom txwv nws kom tsis txhob ua ib tug Khixatias los yeej tau. Tiam sis nws tsis ua li ntawd. Puas muaj tej yam loj loj uas koj yuav tau hloov hauv koj lub neej ua ntej koj yuav ua kev cai raus dej? Yehauvas yeej pab tau koj. Nws yuav foom koob hmoov rau koj vim koj xyaum coj raws li phau Vajlugkub tej hauv paus ntsiab lus kom thiaj tau teev tiam nws.

14. Txhuyausis tus yam ntxwv pab tau koj li cas?

¹⁴ Txhuyausis (Tsuyoshi) nyob rau Nyiv Pooj (Japan) teb yuav tau hloov nws txoj hauj lwm kom nws thiaj ua tau kev cai raus dej. Nws yog tus pab tus thawj ntawm lub tsev kawm ntawv xyaum kom txawj ua paj. Thaum twg tus thawj mus tsis tau rau tej tsev txias ces Txhuyausis yuav tau mus nyob rau ntawd tam nws tus thawj, xws li thaum cov ntseeg Npus Das (Buddhist) ua dab ua qhua. Thaum Txhuyausis kawm Vajlugkub thiab paub qhov tseeb txog kev tuag ces nws yuav tau tsis txhob mus koom tej ntawd xwv nws thiaj ua tau kev cai raus dej. Nws thiaj li txiav txim siab tsis nrog cov ntseeg Npus Das koom tes ua ntxiv lawm. (2 Kauleethaus 6:15, 16) Txhuyausis thiaj li mus nrog nws tus thawj tham txog qhov no. Tom qab nkawd tham tag, Txhuyausis kuj tseem tau nws txoj hauj lwm thiab nws kuj tsis tas mus koom lawv ntxiv lawm. Tom qab nws kawm Vajlugkub tau ib xyoos, nws kuj ua kev cai raus dej. Zaj no qhia tias yog koj yuav tau hloov koj txoj hauj lwm xwv koj thiaj ua haum Vajtswv siab, nco ntsoov tias Vajtswv yeej yuav pub kom koj thiab koj tsev neeg muaj txawm peem.​—Phau Ntawv Nkauj 127:2; Mathais 6:33.

COV KAULEETHAUS UA KEV CAI RAUS DEJ

15. Muaj dab tsi txwv tau kom cov Kauleethaus txhob ua kev cai raus dej?

¹⁵ Cov tib neeg uas nyob rau hauv Kauleethaus txheej thaum ub mas ntshaw kom muaj ub muaj no thiab nyiam kev plees kev yis heev. Muaj coob leej ntau tus ua tej yam uas Vajtswv tsis pom zoo. Ces yog lawv xav teev tiam Yehauvas los yuav tsis yooj yim. Tiam sis thaum tus tub txib Povlauj tuaj qhia txoj xov zoo nyob hauv lub nroog ntawd, “cov neeg Kauleethaus uas hnov txoj xov zoo kuj muaj coob tus los ntseeg thiab ua kev cai raus dej.” (Tes Hauj Lwm 18:7-11) Tus Tswv Yexus Khetos txawm los ua yog toog tshwm rau Povlauj thiab hais tias: “Tseem muaj neeg coob heev hauv lub nroog no uas yuav los ntseeg.” Yog li ntawd, Povlauj thiaj li nyob ntawd qhia txoj xov zoo tau ib xyoos thiab rau lub hlis.

16. Muaj dab tsi ho pab tau cov Kauleethaus ib txhia ua kev cai raus dej? (2 Kauleethaus 10:4, 5)

¹⁶ Dab tsi pab tau cov Kauleethaus ua kev cai raus dej? (Nyeem 2 Kauleethaus 10:4, 5.) Vajtswv Txoj Lus thiab nws lub hwj huam dawb huv pab tau kom lawv txawj hloov lawv lub neej. (Henplais 4:12) Cov neeg Kauleethaus uas txais yuav txoj xov zoo txog Khetos tseg tsis ua tej kev phem uas lawv ib txwm ua.​—1 Kauleethaus 6:9-11.b

17. Koj khaws tau dab tsi los ntawm cov Kauleethaus?

¹⁷ Muaj ib co Kauleethaus yuav tau hloov ntau yam tiam sis lawv tsis xav tias qhov ntawd txwv lawv txoj kev los ntseeg Yehauvas. Lawv sib zog ntsos hloov lawv lub neej kom taug tau txoj kev nqaim los sis txoj kev me uas coj mus tau txoj sia. (Mathais 7:13, 14) Ua li koj puas sib zog ntsos hloov koj lub neej xwv koj thiaj ua tau kev cai raus dej? Kav tsij rau siab hloov kam tiag! Thov Yehauvas kom nws muab lub hwj huam dawb huv los pab koj tswj tsis txhob ua tej yam phem.

18. Monika tus yam ntxwv ho pab tau koj li cas?

¹⁸ Monika nyob teb chaws Ntsuas Ntsia (Georgia) yuav tau tswj nws tus kheej kom tsis txhob hais lus phem, saib thiab mloog tej yam tsis zoo xwv nws thiaj ua tau kev cai raus dej. Nws hais tias: “Thaum kuv tseem hluas, kuv thov Vajtswv pab kom kuv tseg tsis txhob ua tej yam tsis zoo. Yehauvas paub tias nyob hauv kuv nruab siab kuv xav ua qhov zoo, nws thiaj li pab thiab coj kuv txoj hau kev.” Monika ua kev cai raus dej thaum nws muaj 16 xyoo. Raws li zaj hais no puas muaj qho yam uas koj yuav tau tseg tsis ua xwv koj thiaj ua tau kev cai raus dej? Kav tsij thov Yehauvas pab kam tiag kom koj hloov tau. Yehauvas yeej zoo siab hlo muab nws lub hwj huam dawb huv los pab koj.​—Yauhas 3:34.

KEV NTSEEG YEEJ TXAV TAU TEJ ROOB

19. Yuav ua li cas koj thiaj li kov yeej tej teeb meem loj cuag li roob? (Saib daim duab.)

¹⁹ Txawm koj yuav raug ntau yam ua rau koj ua tsis tau kev cai raus dej los thov nco ntsoov tias Yehauvas hlub koj thiab nws xav tau koj los ua nws tsev neeg. Yexus hais rau nws ib co thwj tim tias: “Yog nej muaj kev ntseeg luaj li ib lub noob me me xwb ces nej yuav hais rau lub roob no tias, ‘Txav mus rau tod,’ los yeej yuav txav, tsis muaj ib yam dab tsi uas nej yuav ua tsis tau li.” (Mathais 17:20) Cov thwj tim uas mloog Yexus hais ntawd nyuam qhuav nrog nws tau ob peb xyoos xwb ces lawv txoj kev ntseeg tseem loj tsis tau txaus. Tiam sis Yexus qhia rau lawv tias yog lawv muaj me ntsis kev ntseeg ces Yehauvas yuav pab kom lawv txav tau tej teeb meem uas loj cuag li lub roob. Yehauvas yeej yuav pab koj tib yam nkaus!

20. Cov yam ntxwv txheej thaum ub thiab nim no uas hais hauv zaj kawm no txhawb tau koj li cas?

²⁰ Yog tseem tshuav dab tsi khuam cheem kom koj tsis txhob ua kev cai raus dej ces kav tsij maj nrawm nroos kho sai li sai tau, tsis txhob sej sij hawm. Cia cov yam ntxwv uas hais nyob hauv phau Vajlugkub thiab cov kwv tij nkauj muam tej yam ntxwv niaj hnub nim no txhawb tau kom koj muab koj tus kheej cob rau Yehauvas thiab ua kev cai raus dej. Yog koj ua li no ces yuav yog ib qho kev txiav txim siab uas zoo tshaj plaws!