Tso Siab Plhuav Tias Peb Yuav Dim Lub Sij Hawm Kawg

Yehauvas yuav tsis ua siab ntev mus li rau lub qab ntuj neeg no. Nws yuav rhuav tshem kev ntseeg cuav. Ib tsoom teb chaws yuav sau nthwv tuaj tawm tsam Yehauvas cov tib neeg, thiab nws yuav muab lawv txhua tus tua pov tseg hauv ntsuj rog Amankedoos. Cov uas pe hawm nws yeej tos ntsoov lub caij lub nyoog no.

Txawm li ntawd los, peb tsis paub tias txhua yam yuav zoo li cas thaum txog lub sij hawm txom nyem loj kawg nkaus. Peb tsis paub tias txoj kev txom nyem ntawd yuav pib thaum twg, thiab xyov tej nom tej tswv yuav siv lub tswv yim twg los tawm tsam tej kev ntseeg. Tsis tas li ntawd, peb tsis paub tias lawv yuav tawm tsam Yehauvas haiv neeg li cas thiab ho ntev. Peb kuj tsis paub tias Yehauvas yuav rhuav tshem cov neeg lim hiam li cas hauv ntsuj rog Amankedoos.

Txawm li los, phau Vajlugkub twb qhia txhua yam rau peb kom peb ua tau lub siab tuab tiv tiag. Peb yeej paub tias peb nyob rau “tiam kawg” lawm tiag. (2 Timautes 3:1) Thaum nom tswv tawm tsam tej kev ntseeg, Yehauvas yuav “txiav hnub txiav nyoog kom luv.” (Mathais 24:22) Ua li no txoj kev ntseeg tseeb thiaj yuav tsis raug rhuav tshem mus. Peb paub tias Yehauvas yeej yuav cawm nws cov neeg. (2 Petus 2:9) Nws yuav siv nws leej tub uas muaj hwj chim loj nkawg nkaus los rhuav tshem cov lim hiam.​—Tshwmsim 19:11, 15, 16.

Tej xwm txheej uas yuav tshwm sim rau yav tom ntej yuav ua rau coob tus ntshai heev. Tiam sis yog peb nyeem thiab ua zoo xav txog tej uas Yehauvas tau ua los cawm nws haiv neeg yav tag los, thiab tej uas nws yuav ua yav tom ntej, qhov no yuav pab peb sawv nreg nroos tsa hau ntsia tias, kev cawm dim twb los ze lawm.​—Lukas 21:26, 28.