Yuav Teeb Rooj Teeb Laub Li Cas Qhia Vajlugkub

Pom tau tias teeb rooj teeb laub qhia Vajlugkub yeej rub tau cov uas muaj siab mos siab muag los paub qhov tseeb. (Yh. 6:44) Yog li ntawd, lub koom haum thiaj txhawb cov txwj laus kom mus tshuaj saib lub koom txoos thaj tsam seb thaj chaw twg muaj neeg coob dua kev es mus teeb rooj teeb laub rau thaj ntawd. Vim cab tau cov laub mus ib qho chaw rau chaw, feem ntau tsis tas yuav nom tswv tso cai thiaj mus teeb tau. Leejtwg thiaj mus teeb tau rooj thiab laub qhia Vajlugkub? Yuav tsum yog cov tshaj tawm uas paub tab, paub cai, txawj xav, thiab txawj hais lus. Nram qab no yog tej uas zoo ua thiab tsis zoo ua uas yuav pab tau cov tshaj tawm paub mus teeb rooj teeb laub qhia Vajlugkub.

Zoo:

Luag ntxhi pab cov dua kev. Muaj tej txhia tshaj tawm kuj luag ntxhi hu tibneeg. Yog muaj ib tug twg los ntawm lub rooj lossis lub laub, koj kuj hais li no: “Koj nyiam phau twg, nqa mus saib.”
Sawv kom nrug deb zog ntawm lub rooj lossis lub laub. Nyob rau tej thaj chaw, cov tshaj tawm pom tias yog lawv sawv ze li ib ob tshim ntawm lub rooj lossis lub laub, tibneeg los nqa ntaub ntawv ntau dua. Lwm cov ho pom tias yog sawv li ntawd ces tibneeg ho tsis tshua los nqa ntaub ntawv, yog li ntawd lawv thiaj sawv nrug deb zog es tos kom tibneeg los ntawm lub rooj lossis lub laub tso es mam li mus nrog lawv tham xwb. Thaum ib tug los ntawm lub rooj lossis lub laub lawd, zoo rau koj mus nrog nws tham. Kuj nug nws li no: “Koj puas tau xav txog lo lus nug ko dua li?”
Nthuav phau Vajlugkub los qhia ntau li ntau tau.
Yog muaj leejtwg los nqa cov ntawv uas siv qhia tibneeg, xws li phau Vajlugkub Qhia ces piav rau tus ntawd seb peb kawm Vajlugkub li cas. Nug seb nws puas kam koj tso zaj yeeb yaj kiab Kawm Vajlugkub Ua Dabtsi? rau nws saib.
Yog muaj tej tug uas xav kawm Vajlugkub, yog sau tau, muab lawv xov tooj lossis chaw nyob sau cia. Tus uas tsis nyob hauv koj thaj tsam, muab sau rau daim Please Follow Up (S-43) es muab rau tus ceev ntawv sai li sai tau.