Ib Daim Yeeb Yaj Kiab Tshiab Mus Pib Kawm Vajlugkub Nrog Tibneeg
Muaj coob leej ntau tus tau pom daim yeeb yaj kiab luv luv hu ua Kawm Vajlugkub Ua Dabtsi? hauv lub Vej xaij jw.org. Daim yeeb yaj kiab no yog tsim los pab kom tibneeg kawm Vajlugkub. Koj mus saib tau daim yeeb yaj kiab hauv lub Vej xaij rau ntawm “Kuv Xav Kawm Vajlugkub” lossis mus yees lub cim uas nyob rau sab kawg nkaus ntawm peb cov ntawv tseb tshiab. Peb siv tau daim yeeb yaj kiab mus qhia Vajlugkub raws li nram qab no.
Thaum rov mus xyuas tus tswv tsev, zoo rau koj hais li no: “Kuv muaj ib daim yeeb yaj kiab luv luv xav muab tso rau koj saib. Daim yeeb yaj kiab no teb tau tej lus nug uas koj muaj txog phau Vajlugkub.” Yog nws kam saib, siv koj lub xov tooj lossis lub twj ntawm tes los tso daim yeeb yaj kiab rau nws saib. Yog nws muaj koos pis tawj (computer), koj kuj siv nws lub koos pis tawj tso daim yeeb yaj kiab.
Yog koj muab ib daim ntawv tseb tshiab rau ib tug twg thaum mus qhia Vajlugkub tom tej kev, tej kiab tej khw, thiab tej chaw uas muaj neeg dhau mus mus los los, qhia kom nws muab nws lub xov tooj lossis lub twj ntawm tes yees lub cim uas nyob rau sab kawg nkaus. Yog nws yees lub cim ntawd, ces nws yuav pom daim yeeb yaj kiab hauv peb lub Vej xaij uas hais nws yam lus. Kuj muaj ntau yam lus nyob hauv peb lub Vej xaij uas ua tau li no thiab. Yog koj muaj xov tooj lossis tej twj ntawm tes, koj kuj tso daim yeeb yaj kiab rau nws saib tamsim ntawd.
Qhia cov uas nrog koj ua haujlwm ua ke, kawm ntawv ua ke, cov txheeb ze, thiab lwm tus uas koj paub txog daim yeeb yaj kiab thiab hais seb lawv puas xav saib. Lossis koj kuj e-mail mus qhia lawv seb yuav mus rau qhov twg es thiaj tso tau daim yeeb yaj kiab los saib.
Yog peb siv daim yeeb yaj kiab no, peb yuav kawm tau Vajlugkub nrog coob tus uas xav “tau txojsia ib txhis tsis kawg.”—Ttx. 13:48.