Dabtsi Ua Rau Koj Xyiv Fab?
1. Txhua hli thaum koj suav koj cov sijhawm, yam dabtsi ua rau koj xyiv fab?
1 Txhua hli, thaum koj npaj koj Daim Ntawv Qhia Sijhawm mus rau cov kwvtij, tsim nyog koj xyiv fab. (Klt. 6:4, NW) Tej zaum ib txhia ua ib tug tho kev tshwj xeeb uas qhia txog 130 teev txhua hli, ho muaj ib txhia tsuas qhia tau li 15 feeb txhua hli xwb. Txawm peb yuav qhia ntau qhia tsawg los xij, cia li xyiv fab hlo vim koj twb ua haujlwm rau Yehauvas kawg koj lub dag lub zog lawm.—Nt.Nk. 100:2.
2. Vim li cas peb yuav tsum kub siab lug ua Yehauvas tes num?
2 Yehauvas yog tus muaj hwjchim loj kawg nkaus, tsim nyog peb muab yam uas zoo tshaj pub rau nws. (Mlkh. 1:6) Peb yeej hlub Yehauvas, peb thiaj muab peb tus kheej cob rau nws los ua raws li nws lub siab nyiam. Yog tias peb siv sijhawm los ua Yehauvas tes num kawg peb lub dag lub zog thiab lub tswvyim, ces peb yuav muaj kev xyiv fab txhua hli. Peb tes num yuav zoo ib yam li “thawj phaum qoob” uas muab xyeem rau Yehauvas. (P.L. 3:9) Tiamsis yog peb lub siab pheej qhia tias peb ua tsis tau txaus, ces zoo rau peb nrhiav kev los txhawb peb tes num rau Yehauvas.—Loos 2:15.
3. Vim li cas ho tsis zoo rau peb muab peb tus kheej piv rau lwm tus?
3 “Tsis Muab Piv Rau Lwm Tus”: Tsis zoo rau peb muab peb tus kheej piv rau lwm tus, lossis muab peb tes haujlwm yav tas los piv rau tamsim no. Tej zaum yav tas los peb tsis muaj chaw tab kaum thiab peb muaj zog dua tamsim no. Peb nyias muaj nyias peev xwm. Yog peb pheej muab peb tus kheej piv rau lwm tus, yuav muaj chaw sib khib, lossis peb yuav xav tias peb tsis zoo npaum luag. (Klt. 5:26; 6:4) Yexus yeej tsis muab ib tug piv rau ib tug li ntawd. Tiamsis, nws qhuas tibneeg raws li tej uas lawv muaj peevxwm ua tau xwb.—Mk. 14:6-9.
4. Yexus zaj lus piv txwv pab tau peb li cas?
4 Xav rau Yexus zaj lus piv txwv txog tus lospav thiab cov tub qhe. Tus lospav muab tej tala nyiaj rau lawv saib ‘raws li lawv muaj peevxwm.’ (Mth. 25:15) Thaum tus lospav rov los tshuaj seb lawv ua luam tsam li cas lawm, nws pom tias ib txhia nquag thiab kub siab ua luam heev. Nws qhuas thiab caw kom cov ntawd nrog nws zoo siab xyiv fab. (Mth. 25:21, 23) Ib yam li ntawd, yog tias peb kub siab lug tshaj tawm txog lub Nceeg Vaj, Yehauvas yuav txaus siab rau peb thiab peb yuav muaj kev xyiv fab!