Koj Puas Ua Koj Feem?
1 Ntau zaus tej uas hais txog hauv phau Vajlugkub, yeej hais meej tias muaj npaum li cas, muaj pes tsawg leej thiab muaj pes tsawg tus tiag. Zoo li, Kide-oo thiab 300 leej tub rog mus txeeb tau lub yeej Midee. (C.Th. 7:7) Yehauvas tus tubtxib tau tua 185,000 leej tub rog Axilia tuag. (2Vntx. 19:35) Hnub Pheethekhoxate xyoo 33 T.Q.Y., muaj li 3,000 leej tau ua kevcai raus dej thiab tsis ntev tom qab ntawd xwb, muaj kwvlam li 5,000 leej los tsav ntxiv. (Ttx. 2:41; 4:4) Raws li tau hais no, peb pom tias Vajtswv cov tubtxib thaum ub yeej ua tib zoo tshuaj thiab sau tej keeb kwm tseg cia kom meej.
2 Yehauvas lub koom haum niaj hnub no yeej hais kom peb sau cov sijhawm qhia Vajlugkub xa mus rau lawv txhua lub hlis. Qhov uas peb ua raws li lub koom haum hais no pab tau lawv paub tias txoj xov zoo ncha deb npaum li cas lawm. Thiab pab tau lawv paub tias cov tshaj tawm cheem tsum dabtsi, thiab thaj chaw twg cheem tsum cov tshaj tawm mus pab. Nyob hauv lub koom txoos los, daim ntawv qhia sijhawm kuj pab tau cov txwj laus paub tias tus twg cheem tsum kev pab es txhawb kom tus ntawd kub siab ua haujlwm. Tsis tas li ntawd xwb, thaum sawvdaws hnov tias txoj xov zoo nrov ncha mus rau txhua qhov chaw thoob ntiajteb lawm, yuav txhawb tau sawvdaws zog heev. Yog li, koj puas kam ua koj feem?
3 Koj Feem: Txhua lub hlis, yog koj tsis muab sau tseg koj puas nco tau txhua yam uas koj ua lawd? Yog koj nco tsis tau, txhua zaus koj mus qhia Vajlugkub zoo rau koj muab txhua yam sau tseg. Ib txhia sau rau hauv daim ntawv qhia hnub qhia hli lossis sau rau ib phau ntawv me. Lwm cov kuj nqa ib daim ntawv qhia sijhawm, xwv lawv thiaj tau sau txhua zaus lawv mus qhia Vajlugkub. Thaum txog caij xa, muab koj daim ntawv qhia sijhawm rau tus saib xyuas koj pawg, tsis txhob tos ntev. Yog koj nyiam los, koj kuj muab tso rau hauv lub thawv uas hom tseg rau cov ntawv qhia sijhawm tom tsev Nceeg Vaj. Yog koj tsis nco qab muab lawm, cia li hu tus saib xyuas koj pawg es muab rau nws, tsis txhob tos nws hu los yog hais koj tso. Nco ntsoov xa koj daim ntawv qhia sijhawm txhua lub hlis. Yog koj ua li no, qhia tau tias koj mloog Yehauvas lus thiab hlub tus kwvtij uas sau tej sijhawm xa mus rau lub koom haum.—Luka 16:10.
4 Tus Saib Xyuas Pawg Mus Qhia Vajlugkub Feem: Txhua lub hlis tus txwj laus uas saib xyuas ib pawg mus qhia Vajlugkub twg, yuav tau tshuaj saib seb nws pawg cheem tsum txojkev pab twg. (P.L. 27:23) Tus saib xyuas yuav tsum paub tias tus twg mus qhia Vajlugkub tus twg tsis mus es yuav tau pab tus uas ncua ib hlis tsis mus lawm. Nws tsis tas yuav hais ntau yam. Cia li caw tus ntawd nrog nws mus qhia Vajlugkub ua ke ces yeej txhawb tau tus ntawd zog lawm.
5 Txhua lub hlis tus saib xyuas yuav tau saib kom txhua tus hauv nws pawg muab lawv daim ntawv qhia sijhawm rau nws, xwv tus ceev ntawv thiaj xa tau txhua yam rau lub koom haum kom meej raws li tau mus qhia Vajlugkub rau lub hli ntawd tsis pub dhau hnub xiab 6 lus hli tom ntej. Ua ntej lub hli xaus, zoo rau tus saib xyuas tshaj tawm rau nws pawg kom nco ntsoov xa lawv daim ntawv qhia sijhawm. Kuj zoo rau nws npaj ib co ntawv qhia sijhawm rau nws pawg tau siv. Yog muaj tej tug uas pheej tsis nco qab muab nws daim ntawv qhia sijhawm, yuav tau txhawb kom nws nco ntsoov.
6 Yog sawvdaws muab daim ntawv qhia sijhawm raws caij nyoog, lub koom haum yuav paub meej tias txoj xov zoo ncha mus deb npaum li cas lawm tiag. Yog li, cia siab tias koj yuav nco ntsoov muab daim ntawv qhia sijhawm rau tus saib xyuas koj pawg txhua lub hlis.