Thaum Muaj Kev Kawm Ua Vajtswv Tes Num Cov Kwvtij Uas Qhia Yuav Npaj Li Cas?
Thaum muaj Kev Kawm Ua Vajtswv Tes Num, cov kwvtij yuav tau npaj qhia li cas? Zaj no yuav pab kom cov kwvtij paub npaj lawv cov lus qhuab qhia.
◼ Lus Qhuab Qhia: Yog tias tus kwvtij tau txais ib zaj uas yog “lus qhuab qhia” ces zaj ntawd yuav tsis muaj lus nug rau sawvdaws teb. Tus kwvtij yuav tsum siv cov ntaub ntawv uas tau teem tseg hauv daim Tes Num, los cev ib zaj lus qhia rau sawvdaws mloog xwb. Tej zaum yuav muaj ntau lub ntsiab, tiamsis yuav tsum siv sijhawm los qhia cov ntsiab lus uas phim lub koom txoos.
◼ Lus Nug Thiab Lus Teb: Yuav npaj tej zaj uas yog “lus nug lus teb” li cas? Ib yam li thaum lub koom txoos kawm phau The Watchtower ua ke, yuav muaj lus nug lus teb rau txhua nqe. Tus kwvtij tsuas tham ob peb los thaum pib thiab thaum xaus xwb. Thaum nws coj, tsis zoo rau nws tham txog ntau yam. Tsis tas npaj ib tug kwvtij los nyeem ib nqes zuj zus rau sawvdaws mloog. Yog tias daim Tes Num qhia kom nyeem li ntawd, ces mam li nyeem xwb. Thiab yog muaj sijhawm ces mam li nyeem tej nqe Vajlugkub uas tseem ceeb.
◼ Lus Qhuab Qhia Thiab Lus Teb: Yuav npaj tej zaj uas yog “lus qhuab qhia thiab lus teb” li cas? Tus kwvtij yuav tsum npaj yam li nws yuav cev ib zaj lus qhuab qhia rau sawvdaws, tiamsis nws yuav tsum npaj lus nug rau sawvdaws teb thiab.
◼ Ua Yeeb Yam Thiab Cov Qauv Zoo: Yog tias zaj lus qhia hais kom ua ib qho yeeb yam, ces tus kwvtij uas coj xaiv tau ib ob tug los ua yeeb yam rau sawvdaws xyaum. Zoo rau tus kwvtij hais ntxov, lawv thiaj npaj yeej. Nws yuav tsum xaiv cov uas txawj qhia thiab coj tus qauv zoo. Tsis txhob maj hais kom cov uas los ntseeg tshiab, thiab cov uas tsis tau tshaj tawm ntev los ua yeeb yam saum sam thiaj. Tej zaum zoo siv cov ntawd los ua tus tswv tsev ua ntej tso. Cov uas los ua yeeb yam yuav tsum tig xubntiag rau sawvdaws. Muaj tej zaj ho muaj lus qhia kom caw ib tug los rau saum sam thiaj, ces tus kwvtij mam li nug nws txog tej yam uas nws tau ntsib. Zoo rau sawvdaws ua tib zoo npaj thiab xyaum ob peb lwm ua ntej lawv mus saum sam thiaj. Yog tias noj sijhawm ntau dhau lawm, tus kwvtij yuav tau txiav nws zaj lus qhia kom luv zog, nws thiaj tsis tau txiav qhov yeeb yam. Ua ntej cov tub leg num yuav xaiv ib tug twg los ua qauv rau nws zaj lus qhia, nws yuav tsum nco ntsoov nug seb tus dhia haujlwm ntawm pab txwj laus puas pom zoo.
Yog muaj tej zaj ho qhia txawv ntawm cov qauv no, ces yuav tsum ua tib zoo npaj raws li tau hais. Yog tias cov kwvtij koom siab npaj raws li tau kom tseg no, ces thaum muaj Kev Kawm Ua Vajtswv Tes Num, lawv yuav “ua txhua yam raws li tsim nyog ua thiab raws li txoj kevcai.”—1Khl. 14:40.