Pab Cov Kawm Vajlugkub Los Ua Ib Tug Tshaj Tawm Txoj Xov Zoo Txog Lub Nceeg Vaj
1 Txoj haujlwm uas Yexus tau muab cob rau nws cov thwjtim uas hais hauv Mathai 28:19, 20 twb tau muab tshaj mus rau txhua qhov chaw lawm tiag. Yexus Khetos tau hais rau cov raws nws qab kom mus coj tibneeg los ua nws cov thwjtim es los ua txoj haujlwm no ntxiv mus. Qhov no thiaj ua tus qauv rau peb tshaj tawm txoj xov zoo txog Vajtswv lub Nceeg Vaj kom thoob qab ntuj rau lub caij kawg no.—Mth. 24:14.
2 Tej zaum cov uas kawm Vajlugkub kuj yog peb cov menyuam los yog lwm tus uas zoo siab hlo los kawm Vajlugkub. Peb yeej xav pab kom lawv pom tias lawv yuav tau ua txoj haujlwm uas mus coj tibneeg los ua Yexus Khetos li thwjtim.—Lk. 6:40.
3 Pab Kom Lawv Los Qhia Vajlugkub: Txhawb kom cov uas kawm Vajlugkub nrog koj muab tej uas lawv tau kawm qhia lwm tus. Piav tej yam zoo uas peb tau ntsib thaum peb mus qhia Vajlugkub los txhawb lawv. Cob koj cov menyuam thaum lawv tseem yau kom paub ua Vajtswv tes num npaum li lawv muaj peev xwm ua tau. (Nt.Nk. 148:12, 13) Koj tej lus thiab koj tus qauv zoo yuav tsum qhia tias koj txaus siab ua Vajtswv tes num.—1Tmt. 1:12.
4 Yehauvas tsuas siv cov uas txaus siab coj raws li nws tej kevcai ncaj ncees xwb. Cov uas tshaj tawm tshiab yeej tsis tau paub npaum li cov uas twb ua kevcai raus dej ntev lawm, tiamsis lawv yuav tsum ntseeg thiab paub piav tej nqe Vajlugkub uas tseem ceeb. (Mus saib phau Organized, sab 79-82.) Tom qab lawv tso “lub tuam ceeb Npanpiloo” thiab tej kev nom kev tswv tseg lawm, lawv yuav tsum tuaj koom tej kev sib txoos tsis tu ncua.—QTsh. 18:2, 4; Yh. 17:16; Hnpl. 10:24, 25.
5 Thaum koj pom tias tus uas kawm Vajlugkub nrog koj ntxim yuav ua tau ib tug tshaj tawm tsis tau raus dej, hais rau tus dhia haujlwm ntawm pab txwj laus paub. Nws mam li npaj 2 tug txwj laus los nrog neb tham seb tus uas kawm Vajlugkub puas ua tau ib tug tshaj tawm tsis tau raus dej nrog lub koom txoos mus qhia txoj xov zoo txog lub Nceeg Vaj. Tom qab nws ua ib tug tshaj tawm lawm, koj yuav tau cob nws ntxiv thaum nws nrog koj mus qhia Vajlugkub.