Tshaj Tawm Txoj Xov Txog Lub Nceeg Vaj
1 Yexus hais tias: “Kuv yuav tsum tshaj tawm txoj xov zoo hais txog Vajtswv lub tebchaws [Nceeg Vaj] rau lwm lub moos thiab, rau qhov Vajtswv yeej txib kuv los ua tes haujlwm no.” (Lk. 4:43) Raws li cov lus no, lub ntsiab uas Yexus tshaj tawm yog dabtsi? Yog Vajtswv lub Nceeg Vaj. Txoj xov zoo uas peb niaj hnub tshaj kuj muaj tib lub ntsiab ntawd thiab. Mathai 24:14 qhia tias: “Txoj xov zoo uas hais txog Vajtswv lub tebchaws [Nceeg Vaj] yuav raug muab tshaj tawm thoob plaws lub ntiajteb ua timkhawv rau ib tsoom tebchaws, mas thaum ntawd lub sijhawm kawg yuav los txog.” Tseem ceeb rau sawvdaws hnov txog qhov tseeb ntawm Vajtswv lub Nceeg Vaj. Peb yuav qhia txog dabtsi?
2 Vajtswv lub Nceeg Vaj twb kav saum ntuj lawm. Tshuav tsis ntev tom ntej no, lub Nceeg Vaj ntawd yuav hloov tag nrho tibneeg tej kev nom kev tswv. Dab Ntxwg Nyoog twb raug ntiab tawm saum ntuj los lawm, thiab peb twb nyob tiam kawg rau lub sim ceeb no lawm. (QTsh. 12:10, 12) Xatas lub sim ceeb phem no yuav raug rhuav tshem mus, tiamsis Vajtswv lub Nceeg Vaj yeej yuav sawv ruaj khov mus ib txhiab ib txhis.—Dny. 2:44; Hnpl. 12:28.
3 Lub Nceeg Vaj yuav foom koob hmoov rau cov uas mloog lus, kom lawv tau raws li lawv lub siab ntshaw. Lub Nceeg Vaj yuav tshem tawm kev tsov kev rog, kev tub sab tub nyiag, kev quab yuam caij tsuj, thiab kev txom nyem nyuaj siab. (Nt.Nk. 46:8, 9; 72:12-14) Txhua tus yuav muaj txaus noj txaus haus. (Nt.Nk. 72:16; Yxy. 25:6) Kev mob kev nkeeg tsuas zoo li npau suav lawm xwb. (Yxy. 33:24; 35:5, 6) Tibneeg yuav rov qab zoo tiav log li thaum chiv keeb uas tsis tau ua txhaum. Sawvdaws yuav muab lub ntiajteb no kho ua ib lub vaj kaj siab. Txhua leej txhua tus yuav nyob sib haum xeeb ua npoj ua luag.—Yxy. 11:6-9.
4 Tej yam uas peb ua tamsim no qhia tau tias peb yeej xav zwm rau Vajtswv lub Nceeg Vaj tiag. Txoj xov txog Vajtswv lub Nceeg Vaj yuav tsum ua rau peb txaus siab hloov peb lub neej. Peb yuav tsum npaj tej hom phiaj tshiab uas haum Vajtswv siab. Xws li tes haujlwm yug lub cuab lub yig. Tes haujlwm ntawd tseem ceeb kawg li. Tiamsis thaum peb paub qhov tseeb txog lub Nceeg Vaj lawm, peb yeej tsis pub kev khwv noj khwv haus laum tau peb txojkev ntseeg. (Mth. 13:22; 1Tmt. 5:8) Peb yeej yuav ua raws li Yexus cov lus no: “Nej yuav tsum xub nrhiav Vajtswv lub tebchaws [Nceeg Vaj] thiab nws txojkev ncaj ncees ua ntej, mas yuav muab tej no [uas yog tej yam nej cheem tsum] huvsi tsav ntxiv rau nej.”—Mth. 6:33.
5 Peb yuav tsum maj nroos mus qhia tibneeg txog Vajtswv lub Nceeg Vaj thaum tseem tshuav sijhawm. Cia peb xyaum qhia tiag, peb thiaj “yaum tau lawv los” zwm rau Vajtswv lub Nceeg Vaj.—Ttx. 19:8.