Tag Kev Cia Siab Lawm

Anri-ana hais tias: “Kuv nyuaj siab tas hnub tas hmo xwb. Kuv thiaj xav tias ntshe tuag zoo dua.”

ANRI-ANA (Adriana) yog ib tug pojniam nyob tebchaws Nplaxi (Brazil). Nws muaj tus mob nyuaj siab ua rau nws ntxhov siab tas mus li tsis muaj kev cia siab li lawm. Koj puas tau nyuaj siab npaum li nws ib zaug li?

Khai-aulu (Kaoru) yog ib tug txivneej nyob tebchaws Nyiv Pooj. Nws niam nws txiv laus heev thiab muaj mob ntsuav. Nws yog tus uas tu nkawd. Tsis tas li xwb, tom haujlwm los luag ua nyuaj heev rau nws thiab. Nws thiaj hais tias: “Ua rau kuv tsis qab los noj mov thiab pw tsis tsaug zog li. Kuv txawm xav tias ntshe tuag zoo dua, kuv thiaj dim tej kev nyuaj siab no.”

Auyenpaude (Ojebode) yog ib tug txivneej nyob tebchaws Nai Ntsaw Lia (Nigeria). Nws hais tias: “Kuv mas tu siab tas li, ua rau kuv niaj hnub quaj xwb. Kuv thiaj nrhiav kev txov kuv txojsia.” Coob leej ntau tus tau ntsib tej kev nyuaj siab li no. Ib xyoos twg muaj txog li 800,000 leej uas tau txov lawv txojsia. Zoo siab kawg li uas Auyenpaude, Khai-aulu, thiab Anri-ana lawv muaj kev nyuaj siab loj heev tiamsis lawv tsis ua li ntawd.

DABTSI PAB TAU LAWV?

Cov uas txov lawv txojsia feem coob yog txivneej vim lawv txaj muag thov kev pab. Yog koj nyuaj siab npaum li ntawd ces txhob txaj muag nrhiav kev pab. Yexus hais tias cov muaj mob yeej cheem tsum kws kho mob. (Luka 5:31) Cov uas muaj tus mob nyuaj siab, coob tus pom tias thaum lawv mus cuag kws kho mob yeej pab tau lawv thev taus dua thiab kaj siab tuaj. Auyenpaude, Khai-aulu, thiab Anri-ana lawv tau ua li no. Vim lawv nrhiav kev pab ntawm cov kws kho mob lawv thiaj thev taus.

Tej txhia kws kho mob yuav muab tshuaj lossis nrog yus tham txog tej kev nyuaj siab. Tej thaud, yuav tsum ua 2 yam no tibsi. Tej phoojywg nruab ze kuj pab tau tus uas nyuaj siab thiab. Yog lawv ua siab ntev, mob siab, thiab saib xyuas nws zoo, ces yuav txhawb tau nws lub zog heev. Tiamsis tus phoojywg uas zoo tshaj plaws yog Vajtswv Yehauvas. Nws npaj phau Vajlugkub uas yog nws Txojlus los pab peb.

PUAS MUAJ LEEJTWG KHO TAU?

Muaj cov thaj maum uas pab tus mob nyuaj siab. Tus thaj maum nyuaj siab yuav qhia seb yuav tau hloov tej yam uas yus niaj hnub ua li cas. Tej zaum yuav tau mus cuag ntev loo mam daws tau tej teeb meem nyuaj siab. Txawm koj muaj tus mob nyuaj siab los koj tseem muaj vam rau yav tom hauv ntej, ib yam li Auyenpaude. Nws hais tias: “Kuv tos ntsoov lub caij uas yuav muaj tiav raws li Yaxaya 33:24 tau hais. Nqe no hais txog thaum tsis muaj ib tug yuav hais tias, ‘Kuv mob lawm.’” Zoo rau koj vam ntsoov Vajtswv tej lus cog tseg tias hauv “lub ntiajteb tshiab” yuav tsis muaj “kev mob” dua li lawm, tsis hais tej kab mob lossis tej kev nyuaj siab. (Qhia Tshwm 21:1, 4) Koj tej kev ntxhov siab yuav ploj ntais mus. Koj “yuav tsis nco thiab tsis xav txog dua li lawm.”—Yaxaya 65:17.

Tej Nqe Vajlugkub Uas Pab Tswvyim

Vajtswv paub koj tej kev nyuaj siab.

‘Kuv uas yog koj tus Vajtswv Yehauvas tuav rawv koj txhais tes xis cia, kuv yog tus uas hais rau koj tias, Tsis txhob ntshai, kuv yuav pab koj.’—Yaxaya 41:13.

Tsis muaj leejtwg paub peb tej kev nyuaj siab li Yehauvas, nws yeej xav pab peb.

Ua tib zoo xav txog tej nqe Vajlugkub.

Eliya thov Yehauvas cia nws tuag, nws hais tias: “Thov koj rho kuv txojsia mus.”—1 Vajntxwv 19:4.

Auyenpaude hais tias: “Thaum kuv ua tib zoo xav txog tej uas kuv nyeem hauv Vajtswv Txojlus, kuv pom tias Eliya uas cev Vajtswv lus twb xav ib yam li kuv thiab. Qhov no txhawb tau kuv zog heev.”

Xyaum tej qauv hauv phau Vajlugkub.

‘Yexus twb thov Vajtswv pab kom Petus kev ntseeg tsis txhob tu.’—Luka 22:32.

Tom qab Petus tsis lees Yexus 3 zaug, ua rau nws nyuaj siab heev thiab quaj tu siab nrho. Khai-aulu hais tias: “Thaum kuv ua tib zoo xav txog Petus, kuv pom tias txawm Petus ua li ntawd los Yexus tseem khuvleej nws. Kuv xav tias Yehauvas thiab Yexus nkawd yeej paub Petus tej kev ntxhov siab thiab hlub nws heev. Qhov no thiaj txhawb tau kuv lub zog.”

Koj tej kev ntxhov siab yuav ploj ntais mus. Koj “yuav tsis nco thiab tsis xav txog dua li lawm.”—Yaxaya 65:17.