Pe Hawm Yehauvas Ua Ke

Zoo li koj tau kawm hauv phau ntawv no, phau Vajlugkub muaj tej hauv paus ntsiab lus uas yuav pab tau koj thiab koj tsev neeg. Yehauvas yeej xav kom koj tau lub neej kaj siab lug. Nws cog lus tias yog koj xam pom nws txojkev pe hawm ua ntej hauv koj lub neej, ‘nws yuav muab txhua yam huvsi tsav ntxiv rau koj.’ (Mathai 6:33) Vajtswv xav kom koj nrog nws ntaus phoojywg. Yog li ntawd, koj yuav tau nrhiav kev los nrog nws sib raug zoo. Tsis muaj ib qho koob hmoov zoo tshaj qhov uas koj tau los paub Yehauvas.​—Mathai 22:37, 38.

1 NROG YEHAUVAS SIB RAUG ZOO

PHAU VAJLUGKUB QHIA TIAS: “Kuv yuav ua nej leej txiv thiab nej yuav ua kuv li tub li ntxhais.” (2 Khaulee 6:18) Vajtswv xav kom koj nrog nws sib raug zoo. Yog li ntawd, koj yuav tau thov nws. Yehauvas caw kom koj ‘thov nws tsis tu ncua.’ (1 Thexalaunika 5:17) Yehauvas yeej mloog ntsoov koj tej lus thov. Nws xav kom koj qhia koj tej kev txhawj xeeb rau nws. (Filipi 4:6) Thaum koj thiab koj tsev neeg thov Yehauvas ua ke, lawv yuav pom tias koj muaj kev ntseeg npaum li cas tiag.

Tsis yog koj thov Vajtswv xwb, tiamsis koj yuav tsum mloog nws lus thiab. Thaum koj kawm phau Vajlugkub thiab tej ntaub ntawv Vajlugkub, koj yuav paub coj raws li nws siab nyiam. (Ntawv Nkauj 1:1, 2) Ua tib zoo xav txog tej uas koj kawm seb yuav pab tau koj li cas. (Ntawv Nkauj 77:11, 12) Yog tias koj mloog Vajtswv lus, koj yuav tau mus koom cov Khixatia tej kev sib txoos tsis tu ncua.​—Ntawv Nkauj 122:1-4.

Thaum koj qhia Yehauvas rau lwm leej lwm tus, yuav pab tau koj nrog Vajtswv sib raug zoo. Yog koj yimhuab qhia, koj yimhuab muaj kev hlub rau nws.​—Mathai 28:19, 20.

XYAUM UA LI NO:

• Teem sijhawm los nyeem phau Vajlugkub thiab thov nws txhua hnub

• Koj thiab koj tsev neeg yuav tsum xam pom kev pe hawm Yehauvas ua ntej kev lom zem ua si

2 XYIV FAB HLO PE HAWM YEHAUVAS UA KE

PHAU VAJLUGKUB QHIA TIAS: “Cia li txav los ze Vajtswv mas nws yuav los ze nej.” (Yakaunpau 4:8) Koj thiab koj tsev neeg yuav tau teem caij pe hawm Yehauvas ua ke tsis tseg tsis tu. (Chiv Keeb 18:19) Puas yog tas li ntawd xwb? Tsis yog. Txhua yam uas nej ua, nej yuav tsum nco ntsoov Yehauvas. Phau Vajlugkub qhia tias tsev neeg yuav tsum hais txog Vajtswv tej lus rau ‘thaum nyob hauv tsev, thaum taug kev, thaum pw thiab thaum sawv.’ (Kevcai 6:6, 7) Xyaum coj ib yam li Yausua. Nws tau hais tias: “Kuv thiab kuv tsev neeg, peb yuav ua koom tu [Yehauvas].”​—Yausua 24:15.

XYAUM UA LI NO:

• Cob qhia koj tsev neeg tsis tu ncua. Kawm tej yam uas phim koj tsev neeg tus hlob tus yau tibsi. Tseem ceeb rau koj paub tias txhua tus cheem tsum dabtsi