Yudas Tsab Ntawv
1 Ntawm no yog Yudas uas yog Yexus Khetos ib tug tub qhe, thiab yog Yakaunpaus tus kwv. Kuv sau tsab ntawv no rau cov uas Vajtswv uas yog Leej Txiv tau hu los, thiab hlub kawg nkaus. Nws tsom kwm lawv rau Yexus Khetos.
2 Thov kom Vajtswv txoj kev khuv leej, kev sib haum xeeb, thiab kev hlub ntws laub lug los ntxiv rau nej.
3 Cov uas kuv hlub’e, kuv twb xav sau tuaj rau nej txog txoj kev cawm dim uas Vajtswv tau pub rau peb sawv daws, tiam sis kuv ho pom tias tsim nyog sau tuaj txhawb nej kom kub siab tiv thaiv txoj kev ntseeg uas tau muab cob rau cov dawb huv* tib zaug xwb. 4 Tos kuv sau li no tuaj rau nej los, twb yog vim muaj ib co tau txeem los rau hauv peb lawm mas Vajtswv Txoj Lus yeej teem txim rau cov uas coj li ntawd puag thaum ub los lawm. Cov ntawd tsis hwm Vajtswv thiab lawv muab txoj kev hlub uas Vajtswv pub dawb* ntxeev mus ua txhaum tsis paub txaj muag li. Cov ntawd ua tsis ncaj rau Yexus Khetos, uas yog peb tib tug Tswv uas txhiv peb los ua nws tug.
5 Nej yeej paub zoo txog tej no lawm, tiam sis kuv rov qhia nej tias, txawm Vajtswv Yehauvas* tau cawm nws haiv neeg tawm hauv teb chaws Iyiv los, tom qab no nws kuj muab cov uas tsis muaj kev ntseeg rhuav tshem lawm. 6 Thiab thaum cov tub txib saum ntuj tso tes hauj lwm Vajtswv xub muab rau lawv, thiab tso lawv qhov chaw nyob saum ntuj tseg, Vajtswv kuj muab tej saw hlau uas tsis txawj tu khi lawv cia nyob tsaus ntuj nti mus txog hnub tseem ceeb uas Vajtswv rau txim rau lawv. 7 Ib yam li ntawd, lub nroog Xaudoos thiab Kaumaulas nrog rau tej nroog nyob ib ncig ntawd, qaug lias rau kev plees kev yi* loj kawg nkaus li. Lawv huas ntshis tej uas neeg cev nqaij daim tawv ntshaw uas neeg ib txwm tsis xav txog.* Vajtswv thiaj tso tej hluav taws* uas tsis txawj tuag los rau txim rau lawv mas tej no ua qauv los ceeb toom peb ntag.
8 Txawm li ntawd los, cov neeg uas txeem los tseem muab tej kev phem xav ntsoov rau nruab siab, ua qias lawv cev nqaij daim tawv, tawm tsam cov uas muaj hwj chim kav,* thiab lawv hais lus thuam cov uas tau koob meej.* 9 Tiam sis thaum Mikhayees uas yog tus thawj tub txib saum ntuj nrog Ntxwg Nyoog sib cam txog Mauxes lub cev, nws twb tsis kav txiav txim rau thiab cem Ntxwg Nyoog. Mikhayees tsuas hais tias, “Cia Vajtswv Yehauvas* mam li ntuas koj.” 10 Cov neeg no thuam txhua yam uas lawv tsis nkag siab. Lawv zoo li tej tsiaj tsis txawj xav es tsuas ua tej uas lawv ib txwm paub xwb. Lawv thiaj ua qees tej yam uas rov ua rau lawv puas ntsoog.
11 Lawv yuav txom nyem lauj, vim lawv taug txoj kev uas Khayees taug thiab vim lawv ntshaw nqi zog lawv thiaj tau hau ntsoov mus ua yuam kev li Npala-as, thiab lawv raug puas tsuaj vim lawv hais lus tuam mom ib yam li Khaulas! 12 Thaum nej noj sib hlub haus sib ce,* lawv cov ntawd kuj tuaj nrog nej koom tsum tiam sis lawv zoo li tej pob zeb* hauv qab thu dej. Lawv yog cov tswv yug yaj uas huas noj tsis txaj muag li, zoo li tej huab tsis muaj nag es cua ntsawj mus ntsawj los, thiab zoo li tej ntoo uas txog lub caij nplooj ntoo zeeg lawm los tsis txi txiv, thiaj muab dawj hlo cag thiab tuag kiag* lawm. 13 Lawv tes hauj lwm txaj muag ntsuav, zoo li tej npuas dej hauv hiav txwv uas nphau tuaj tim ntug. Lawv zoo li tej hnub qub uas ya tsis tsheej kab mas Vajtswv twb hom qhov chaw tsaus ntuj nti dub nciab rau lawv mus ib txhis lawm.
14 Suav txij Adas los txog rau Enauj muaj xya tiam neeg mas Enauj kuj cev lus txog cov neeg ntawd tias, “Vajtswv Yehauvas* nrog nws cov tub txib saum ntuj uas muaj ntau txhiab ntau vam leej los 15 txiav txim rau txhua tus. Nws yuav suav tias txhua tus uas tsis hwm Vajtswv yeej txhaum lawm tiag vim lawv ua ntau yam kev phem lim hiam thiab vim lawv yog neeg txhaum hais lus tuam mom Vajtswv loj dhau lawm.”
16 Cov neeg no yws taus heev, lawv niaj hnub yws txog lawv lub neej. Lawv tsuas ua raws li lawv lub siab ntshaw xwb. Lawv lub qhov ncauj hais lus khav ntxhias, thiab lawv ua txuj qhuas lwm tus kom lawv tau zoo.
17 Cov uas kuv hlub’e, thov nco ntsoov tej uas peb tus Tswv Yexus Khetos cov tub txib twb qhia tseg rau nej lawm. 18 Lawv ib txwm qhia nej tias, “Tiam kawg* yuav muaj cov uas thuam qhov zoo, thiab lawv tsuas ua raws li tej kev phem uas lawv lub siab ntshaw xwb.” 19 Cov ntawd yog cov uas coj li tej tsiaj txhu, lawv ua rau lub koom txoos cais ua pab ua pawg, thiab tsis cia Vajtswv coj lawv txoj hau kev.* 20 Tiam sis cov uas kuv hlub’e, cia nej txoj kev ntseeg uas dawb huv kawg nkaus txheem nej sawv ruaj khov, thiab cia Vajtswv lub hwj huam pab nej thov nws. 21 Nej yuav tsum ua li no Vajtswv thiaj hlub nej mus li thiab tos ntsoov peb tus Tswv Yexus Khetos txoj kev khuv leej uas yuav qhib kev rau nej tau txoj sia ib txhis tsis kawg. 22 Tsis tas li ntawd nej yuav tsum hlub* cov uas ua xyem xyav,* 23 thiab pab rub lawv tawm hauv cov hluav taws los. Thiab cia li hlub* lwm cov uas tau ua rau lawv lub tsho tsuas qias vim lawv ua raws li lawv cev nqaij daim tawv ntshaw. Tiam sis nej yuav tsum ntxub qhov txhaum uas lawv tau ua ntawd thiab ceev faj tsam ho tsuas tau nej.
24 Vajtswv yog tus tsom kwm nej kom nej txhob qaug rau kev txhaum, thiab kom nej dawb huv tsis tsuas ib qho li los sawv tab meeg ntawm Vajtswv tus muaj hwj chim ci ntsa iab thiab muaj kev xyiv fab kawg nkaus. 25 Nws tib leeg yog Vajtswv, tus uas txib Yexus Khetos uas yog peb tus Tswv los ua tus Cawm Seej. Thov kom Vajtswv tau koob meej, tau meej mom, tau hwj chim, thiab muaj zog loj zog nchav tsis muaj hnub kawg, txij puag thaum ub los, tam sim no, thiab mus ib txhiab ib txhis li. Amees.*