Yauhas Tsab Ntawv Peb
1 Kuv yog ib tug laus neeg,* kuv sau ntawv mus rau Ke-as, tus kwv tij uas kuv hlub tshua heev.
2 Tus kwv tij uas kuv hlub’e, thov kom txhua yam uas koj ua tsuas muaj vam meej ntxhias, thiab kom koj noj qab nyob zoo, ib yam li koj lub neej vam meej tam sim no. 3 Thaum cov kwv tij tuaj thiab qhia rau kuv tias koj tseem tuav rawv kev ntseeg ruaj nreeg, thiab tseem coj lub neej raws nraim li qhov tseeb mas ua rau kuv zoo siab kawg nkaus li. 4 Tsis muaj ib yam zoo siab tshaj qhov uas kuv hnov tias kuv tej me nyuam tseem coj lub neej raws nraim li qhov tseeb.
5 Tus kwv tij uas kuv hlub’e, twb yog koj muab siab npuab Vajtswv koj thiaj pab cov kwv tij sawv daws, txawm tus uas koj tsis paub los xij. 6 Lawv ua tim khawv qhia lub koom txoos tias koj hlub lawv heev. Thaum lawv yuav sawv kev mus, thov koj pab xa lawv raws li Vajtswv pom zoo. 7 Tsim nyog ua li no rau qhov lawv tuav Vajtswv lub npe mus tshaj tawm mas lawv yeej tsis tos cov uas tsis ntseeg pab lawv ib yam dab tsi li. 8 Yog li ntawd, peb yuav tsum tos txais lawv cov ntawd, thiaj yog peb nrog lawv ua tes hauj lwm tshaj tawm qhov tseeb thiab.
9 Kuv twb sau ob peb los tuaj rau lub koom txoos tiam sis Di-autefes, tus uas xav ua tus hlob, yeej saib tsis taus tej uas peb qhia li. 10 Vim li ntawd, yog kuv tau tuaj saib nej, kuv yuav nthuav nws lub qe* rau sawv daws, vim nws iab hiam peb rau coob leej ntau tus. Nws ua npaum li no los, twb tsis txaus nws siab, nws kuj tsis kam tos txais cov kwv tij thiab saib tsis taus lawv. Nws tseem tav cov uas xav tos txais cov kwv tij, thiab tseem nrhiav kev muab cov ntawd ntiab tawm hauv lub koom txoos.
11 Tus kwv tij uas kuv hlub’e, tsis txhob xyaum ua phem, tiam sis cia li xyaum qhov zoo. Tus uas ua zoo thiaj yog Vajtswv li me nyuam.* Tus uas ua phem tsis tau los paub Vajtswv. 12 Lawv puav leej qhuas txog tus kwv tij Demethias, thiab qhov uas nws ua lub neej raws nraim li qhov tseeb kuj ua tim khawv txog nws. Peb los kuj qhuas nws thiab mas nej yeej paub tias peb hais tseeb xwb.
13 Muaj ntau yam uas kuv xav hais rau koj, tiam sis kuv tsis xav muab sau rau nruab ntaw. 14 Kuv vam tias tsis ntev saum no kuv yuav tuaj pom koj thiab nrog koj tham tim ntsej tim muag.
Thov kom koj nyob kaj siab lug.
Cov phooj ywg sawv daws xa lus noj qab nyob zoo tuaj rau koj. Thov pab xa lus noj qab nyob zoo rau kuv cov phooj ywg ib tug zuj zus.