Yauhas Thawj Tsab Ntawv
5 Txhua tus uas ntseeg tias Yexus yog tus Khetos thiaj yog Vajtswv li me nyuam.* Thiab txhua tus uas hlub leej txiv uas yog Vajtswv, yeej hlub leej txiv cov me nyuam. 2 Qhov uas peb paub tias peb hlub Vajtswv cov me nyuam yog li no, peb yuav tsum hlub Vajtswv thiab ua raws nraim li nws tej kev cai. 3 Qhov uas peb hlub Vajtswv yog qhov uas peb coj raws li nws tej kev cai mas nws tej kev cai yeej tsis ua lub nra hnyav rau peb. 4 Txhua tus uas yog Vajtswv cov me nyuam* twb kov yeej lub qab ntuj lawm. Twb yog peb muaj kev ntseeg, peb thiaj kov yeej lub qab ntuj no ntag.
5 Leej twg thiaj yuav kov yeej lub qab ntuj no? Twb yog tus uas ntseeg tias Yexus yog Vajtswv tus Tub los sad? 6 Thaum Yexus Khetos los, muaj dej thiab muaj ntshav.* Tsis yog dej xwb, tiam sis muaj dej thiab muaj ntshav tib si. Thiab muaj Vajtswv lub hwj huam ua tim khawv txog qhov no, rau qhov lub hwj huam qhia qhov tseeb. 7 Muaj peb yam los ua tim khawv qhia tias Yexus yog Vajtswv tus Tub. 8 Peb yam no yog Vajtswv lub hwj huam, yog dej, thiab yog ntshav mas peb yam no puav leej ua tim khawv qhia tib yam nkaus.
9 Yog peb twb ntseeg thaum neeg ua tim khawv qhia ces tsim nyog peb yim huab ntseeg thaum Vajtswv ua tim khawv qhia. Vajtswv yog tus ua tim khawv qhia tias nws tus Tub yog leej twg. 10 Tus uas ntseeg Vajtswv tus Tub, tus ntawd muab tej uas Vajtswv tau ua tim khawv qhia, khaws rau nruab siab lawm. Tus uas tsis ntseeg Vajtswv, tus ntawd muab Vajtswv ua tus uas dag lawm, rau qhov tus ntawd tsis kam ntseeg tej uas Vajtswv tau ua tim khawv qhia txog nws tus Tub. 11 Vajtswv tau ua tim khawv li no tias, nws pub txoj sia ib txhis tsis kawg rau peb mas peb tau txoj sia no yog vim muaj nws tus Tub. 12 Tus uas lees yuav tus Tub tau txoj sia no, thiab tus uas tsis kam lees yuav Vajtswv tus Tub tsis tau txoj sia no.
13 Kuv sau tej no tuaj rau nej kom nej paub tias nej cov uas muaj kev ntseeg rau Vajtswv tus Tub lub npe, tau txoj sia ib txhis tsis kawg. 14 Peb yeej tso siab plhuav* rau Vajtswv tias, txawm peb thov yam twg los, yog peb thov raws li Vajtswv lub siab nyiam ces nws yeej mloog. 15 Vim peb tso siab plhuav tias nws mloog peb tej lus thov lawm ces peb yeej paub tseeb tias peb yuav tau tej uas peb thov ntawd.
16 Yog leej twg pom nws tus kwv tij ua ib qho txhaum uas tsis tsim nyog raug lub txim tuag es nws thov Vajtswv pab tus ntawd ces Vajtswv yuav pub txoj sia rau tus kwv tij ntawd. Tsuas yog lub txim txhaum tsis tsim nyog tuag, thiaj ua tau li no xwb. Tiam sis kuj muaj ib qho txhaum uas tsim nyog raug lub txim tuag. Kuv tsis tau kom nej thov Vajtswv pab tus uas ua txhaum li ntawd. 17 Txhua yam uas neeg ua tsis ncaj puav leej txhaum, tiam sis muaj ib txhia kev txhaum tsis tsim nyog raug lub txim tuag.
18 Peb yeej paub tias txhua tus uas yog Vajtswv li me nyuam* tsis mus ua txhaum, thiab Vajtswv tus Tub* yeej tsom kwm tus ntawd mas Ntxwg Nyoog* ua tsis tau li cas rau nws. 19 Peb paub tias Vajtswv yeej kav peb, tiam sis Ntxwg Nyoog* yog tus tswj kav tag nrho lub qab ntuj no. 20 Tiam sis peb yeej paub tias Vajtswv tus Tub twb los lawm mas nws tau pub kev thoob tsib to nrog kom peb nkag siab, peb thiaj paub txog tus tseem Vajtswv. Peb nrog nws koom ib lub siab, vim muaj nws tus Tub Yexus Khetos. Nws yeej yog tus tseem Vajtswv uas pub txoj sia ib txhis tsis kawg. 21 Kuv cov me nyuam’e, cia li txav deb ntawm tej dab tej mlom.*