Yauhas Thawj Tsab Ntawv
3 Xav seb Leej Txiv hlub peb npaum li cas diam es nws tseem muab peb hu ua nws* cov me nyuam thiab! Peb yeej yog nws cov me nyuam tiag. Twb yog vim li ntawd, lub qab ntuj neeg thiaj tsis paub peb, rau qhov lub qab ntuj neeg tsis paub Vajtswv. 2 Cov uas kuv hlub’e, nim no peb yeej yog Vajtswv cov me nyuam, tiam sis nws tsis tau qhia tias peb yuav zoo li cas yav tom ntej. Peb yeej paub tias thaum nws qhia nws tus kheej* rau peb mas peb yuav zoo li nws, rau qhov peb yuav pom tias nws zoo li cas tiag. 3 Txhua tus uas vam ntsoov nws li no, twb ntxuav lawv tus kheej dawb huv ib yam li tus ntawd dawb huv lawm.
4 Txhua tus uas pheej ua txhaum, kuj yog nws hla kev cai tas zog, vim kev txhaum yog qhov uas hla kev cai. 5 Nej yeej paub tias thaum nws los* yog nws los ris peb tej kev txhaum mus mas nws yeej tsis muaj kev txhaum. 6 Txhua tus uas nrog nws koom ib lub siab yeej tsis nyiam mus ua txhaum. Thiab tus uas pheej ua txhaum yeej tsis tau los paub nws thiab tsis tau los ntseeg nws. 7 Kuv cov me nyuam’e, tsis txhob cia leej twg ntxias tau nej yuam kev. Tus uas xyaum ua ncaj yeej yog neeg ncaj ncees, ib yam li Yexus ncaj ncees. 8 Tus uas pheej ua txhaum twb yog Ntxwg Nyoog kav nws vim Ntxwg Nyoog yeej ua txhaum puag thaum chiv keeb* los lawm. Twb yog li ntawd, Vajtswv tus Tub thiaj los rhuav Ntxwg Nyoog tes hauj lwm pov tseg.
9 Txhua tus uas yog Vajtswv me nyuam* tsis mus ua txhaum, rau qhov Vajtswv lub hwj huam* yeej nyob rawv hauv nws. Tus ntawd thiaj tsis kam mus ua txhaum rau qhov nws yog Vajtswv tus me nyuam.* 10 Yuav ua li cas peb thiaj paub tias cov twg yog Vajtswv cov me nyuam thiab cov twg yog Ntxwg Nyoog cov? Yog leej twg tsis nyiam ua qhov ncaj thiab tsis hlub nws tus kwv tij ces tus ntawd yeej tsis yog Vajtswv li me nyuam. 11 Thaum nej xub los ntseeg nej twb kawm lawm tias, peb ib leeg yuav tsum hlub ib leeg. 12 Tsis txhob ua li Khayees tus uas yog Ntxwg Nyoog* li me nyuam* es muab nws tus kwv tua pov tseg. Vim li cas nws thiaj tua nws tus kwv? Twb yog Khayees tes hauj lwm phem, tiam sis nws tus kwv tes hauj lwm ncaj ncees.
13 Cov kwv tij’e, tsis txhob cia qhov uas lub qab ntuj neeg ntxub nej ua rau nej tsis pom qab xav. 14 Peb paub tias peb zoo li cov uas tuag lawd, tiam sis vim peb hlub peb cov kwv tij, nim no peb ciaj lawm. Tus uas tsis hlub luag, zoo li tus uas tseem tuag. 15 Txhua tus uas ntxub nws tus kwv tij zoo li tus tua neeg mas nej yeej paub tias tus tua neeg yuav tsis tau txoj sia ib txhis tsis kawg. 16 Twb yog vim li no peb thiaj los paub txoj kev hlub, rau qhov Yexus Khetos yeem tuag theej peb lub txhoj. Nim no peb yuav tsum yeem tuag theej peb cov kwv tij thiab. 17 Tiam sis yog leej twg muaj txaus noj txaus siv hauv lub qab ntuj no, los nws tsis kam pab thiab tsis hlub nws tus kwv tij uas txom nyem ces tus ntawd hais puas tau tias nws hlub Vajtswv tiag? 18 Kuv cov me nyuam’e, peb tsis txhob hlub luag ntawm lub ncauj xwb, tiam sis peb tes hauj lwm yuav tsum qhia tias peb hlub luag tiag tiag.
19 Yog peb ua li no peb thiaj paub tias peb muaj qhov tseeb, thiab peb yuav tso siab plhuav tias Vajtswv yeej hlub peb tiag. 20 Txawm peb lub siab yuav nkaug peb li cas los, Vajtswv loj dua peb lub siab* thiab nws yog tus paub ib puas tsav yam tib si. 21 Cov uas kuv hlub’e, yog peb lub siab tsis nkaug peb ces peb yuav tsis ntshai mus thov Vajtswv. 22 Tsis tas li ntawd, txawm peb thov yam twg los Vajtswv yuav pub rau peb, rau qhov peb ua raws nraim li nws tej kev cai thiab ua tej uas haum nws siab. 23 Vajtswv yeej nkaw lus tias, peb yuav tsum muaj kev ntseeg rau nws tus Tub Yexus Khetos lub npe thiab ib leeg yuav tsum hlub ib leeg, ib yam li nws tau sam hwm tseg. 24 Tsis tas li ntawd, tus uas coj raws li Vajtswv tej kev cai thiaj nrog nws koom ib lub siab, thiab Vajtswv yuav nrog tus ntawd koom ib lub siab. Twb yog nws pub nws lub hwj huam rau peb es peb thiaj paub tias nws nrog peb koom ib lub siab tiag.