Yauhas Thawj Tsab Ntawv
1 Peb sau tsab ntawv no tuaj qhia nej txog tus uas nyob puag thaum chiv keeb los lawm, tus uas peb tau hnov txog, thiab peb qhov muag tau pom kiag. Peb saib ntsoov nws tes hauj lwm, thiab peb txhais tes tau tuav kiag nws lawm. Nws yog tus qhia txoj lus uas cawm neeg txoj sia. 2 (Txoj sia ntev dhawv mus ib txhis tau tshwm los rau peb mas peb tau pom thiab ua tim khawv qhia nej txog txoj sia no. Leej Txiv yog tus pub txoj sia no thiab muab qhia tshwm rau peb.) 3 Peb twb qhia nej txog tej uas peb tau pom thiab tau hnov, xwv nej thiaj nrog peb koom ib lub siab, ib yam li peb tau nrog Leej Txiv thiab nws tus Tub Yexus Khetos koom ib lub siab. 4 Peb sau tej no tuaj rau nej kom peb sawv daws thiaj zoo siab xyiv fab txaus nkaus.
5 Txoj xov uas Yexus tau qhia rau peb thiab peb tab tom muab tshaj tawm rau nej yog li no, Vajtswv yog qhov kaj, tsis muaj ib qho tsaus nyob hauv nws li. 6 Yog peb lees tias, “Peb nrog nws koom ib lub siab,” tiam sis peb tseem taug nraim txoj kev tsaus ntuj ces twb yog peb dag xwb, peb yeej tsis xyaum raws li qhov tseeb. 7 Tiam sis Vajtswv yeej nyob hauv qhov kaj. Yog peb taug nraim qhov kaj ces peb sawv daws yeej koom tau ib lub siab, thiab nws tus Tub Yexus cov ntshav twb ntxuav peb tej kev txhaum huv si lawm.
8 Yog peb lees tias, “Peb tsis muaj kev txhaum,” ces twb yog peb rov dag peb xwb, thiab peb tsis muaj qhov tseeb nyob hauv peb lub siab. 9 Tiam sis yog peb lees peb tej kev txhaum ces nws yuav zam peb lub txim thiab muab peb tej kev txhaum ntxuav huv si mus rau qhov Vajtswv yog tus ncaj ncees thiab yeej ua raws li nws tau hais tseg. 10 Yog peb lees tias, “Peb tsis tau ua txhaum li,” ces twb yog peb liam tias Vajtswv yog tus dag, thiab nws txoj lus yeej tsis nyob hauv peb lub siab.