Yadda Za Ka Sa Nazarin Littafi Mai Tsarki Ya Ƙara Daɗi da Kuma Inganci

Yoshuwa yana karanta doka; ganuwar Yariko tana fadowa, amma babu abin da ya sami gidan Rahab: Yoshuwa ya daga hannayensa sama yana addu’a

DA AKWAI wani ƙalubalen da Yoshuwa ya fuskanta. Yana bukatar ya yi wa al’ummar Isra’ila ja-goranci zuwa Ƙasar Alkawari duk da matsalolin da zai fuskanci. Amma Jehobah ya ƙarfafa shi kuma ya tabbatar masa da cewa zai yi nasara. Ya ce: ‘Ka yi ƙarfin zuciya ƙwarai! Ka kiyaye dukan Koyarwar da bawana Musa ya ba ka. Amma za ka yi tunani a kansa dare da rana domin ka tabbata ka aikata duk abin da aka rubuta a ciki. Gama ta haka za ka yi ta albarka cikin hanyarka, ta haka kuma za ka yi nasara.’—Josh. 1:7, 8.

Muna rayuwa a “kwanakin ƙarshe” shi ya sa muke fuskantar matsaloli sosai. (2 Tim. 3:1) Amma kamar Yoshuwa, za mu yi nasara idan muka bi shawarwarin da Jehobah ya ba shi. Mu riƙa karanta Littafi Mai Tsarki kowace rana, kuma mu yi amfani da abubuwan da muka koya don yanke shawarwarin da suka dace.

Amma wasu ’yan’uwa ba su iya nazari ba, ko kuma ba sa jin daɗin yin hakan. Duk da haka, nazarin Littafi Mai Tsarki yana da muhimmanci sosai. Ka yi amfani da akwatin nan “Ka Gwada Bin Waɗannan Shawarwarin” don ka sa nazarinka ya ƙara daɗi da kuma inganci.

Wani marubucin Zabura ya ce: ‘Ka bishe ni cikin hanyar umarnanka, gama suna faranta mini rai.’ (Zab. 119:35) Babu shakka, kai ma za ka yi farin ciki sosai idan kana yin nazarin Kalmar Allah. Akwai abubuwa masu tamani da za ka iya koya idan kana nazarin Littafi Mai Tsarki.

Ba za ka yi wa al’umma ja-goranci kamar yadda Yoshuwa ya yi ba, amma kai ma kana fuskantar wasu matsaloli. Don haka, kamar Yoshuwa, ka riƙa yin nazarin Littafi Mai Tsarki kuma ka lura da abubuwan da aka rubuta da za su amfane ka. Idan ka yi hakan, kai ma za ka yi nasara kuma ka yi hikima.

KA GWADA BIN WAƊANNAN SHAWARWARIN

Ka yi addu’a kafin ka yi nazari. Littafi Mai Tsarki kalmar Allah ce, kuma an rubuta shi ne don ya amfane mu. Saboda haka, idan kana karatu, ka roƙi Jehobah ya taimaka maka ka fahimci abin da kake karantawa, ka tuna abin da ka karanta kuma ka yi amfani da darasin a rayuwarka.—Ezra 7:10.
Ka yi wa kanka tambayoyi sa’ad da kake karanta Littafi Mai Tsarki ko kuma littattafan da ke bayyana shi: ‘Me abin da na karanta ya koya mini game da Jehobah? Yaya ya jitu da saƙon da ke Littafi Mai Tsarki? Ta yaya zan yi amfani da shi don in taimaka wa wasu?’
Ka yi bimbini a kan abin da ka karanta. Ka ɗan dakata kuma ka yi tunani: ‘Yaya na ji sa’ad da na karanta wannan wurin? Me ya sa na ji hakan? Ta yaya labarin ya yi kama da abin da ya taɓa faruwa da ni, abin da ke faruwa da ni yanzu ko kuma abin da zai iya faruwa a nan gaba? Ta yaya zan bi wannan ƙa’idar a rayuwata?’ (Ayu. 23:5; Zab. 49:3) Ka ga ko za ka iya bayyana dalilan da suka sa Jehobah ya hana mutane yin wasu abubuwa. Ko kuma sakamakon ƙin bin dokokinsa.—M. Sha 32:28, 29.
Ka ga yanayin idan kana karatu. Shin za ka iya ganin yanayin sa’ad da ’yan’uwan Yusufu suka sayar da shi ga Ishma’ilawa? (Far. 37:18-28) Me ka gani? Me ka ji? Wane ƙamshi ne ka ji? Ka sa kanka a yanayin mutane da ke labarin. Shin mene ne suke tunani kuma yaya suke ji? Irin wannan tunanin zai sa ka amfana sosai daga nazarinka.
Ka yi amfani da kayan binciken da aka yi mana tanadin su. Ka koyi yin amfani da kayan bincike na yarenku da ke Yanar gizo ko kuma waɗanda aka buga. Kada ka ji kunyar gaya wa wani ya nuna maka yadda ake amfani da kayan binciken. Littafin Bincike Don Shaidun Jehobah zai taimaka maka ka yi nazari game da wasu batu kuma ya taimaka maka da samu bayani game da wani aya a Littafi Mai Tsarki. Ƙasidar nan Taimako don Nazarin Kalmar Allah za ta taimaka maka ka sami bayani game da wurare da lokaci da awo da dai sauran su.
Ka taƙaita ainihin jigon abin da ka nazarta. Yin hakan zai taimaka maka ka tuna abin da ka koya. Mafi muhimmanci, kana iya tattauna abin da ka koya da wasu. Shin akwai abin da ka koya da za ka yi amfani da shi a wa’azi? Ta yin waɗannan abubuwan, za ka tuna jigon abin da ka nazarta kuma wasu ma za su amfana daga nazarin da ka yi.