Ƙarin Mutuwa

Mutuwa zance ne da yawancin mutane ba sa so su tattauna. Amma ko badaɗe ko bajima, za ta shafe mu. Ƙari ga haka, mutuwa tana jawo baƙin ciki sosai.

Ba irin shirin da za mu iya yi da zai hana mu baƙin ciki sa’ad da muka rasa iyayenmu ko abokin aurenmu ko kuma ’ya ko ɗanmu. Masifa tana iya auko mana sau da sau ko kuma ta auko ba zato ba tsammani. Ko ta yaya dai, mutuwa tana jawo baƙin ciki sosai kuma ba za mu iya guje wa hakan ba.

Wani mai suna Antonio, wanda mota ta kaɗe mahaifinsa har ya mutu, ya bayyana yadda ya ji game da hakan. Ya ce: “Yanayin na nan kamar wani ya ƙulle gidanka ne kuma ya tafi da maƙullin. Ba yadda za ka iya dawowa ka shiga gida kuma ba. An bar ka da labari kawai. Ko da ka yi ƙoƙarin musanta cewa hakan ya faru, ba abin da za ka iya yi.”

Dorothy, wadda mijinta ya rasu sa’ad da take da shekaru 47, ta ƙudura ta sami amsoshi ga wasu tambayoyi da ke damunta. Ko da yake Dorothy tana koya wa yara a cocinsu cewa mutane suna ci gaba da rayuwa bayan mutuwa, ba ta san ainihin abin da ke faruwa bayan mutuwa ba. Sai wata rana ta tambayi limamin cocinsu na Angilika cewa: “Mene ne yake faruwa da mu sa’ad da muka mutu?” Ya ce mata: “Ba wanda ya san lallai abin da ke faruwa. Namu dai ido ne kawai.”

Shin akwai yadda za mu iya sani ko za mu iya rayuwa bayan mutuwa?