Yeso Kristo Ning’o?

1, 2. (a) Onye n’erieta rioka omonyete ri’omonto okumete, inee, igo bori nomomanyete buya? Eresa. (b)  Ninki abanto begenete igoro ya Yeso?

ABANTO nabange bakumete ase ense. Nabo erabe komanyete erieta ri’omonto oyomo omanyekanete mono. Korende ase engencho omanyete erieta riaye, teminetie ng’a nigo omomanyete buya mono. Teminetie ng’a nigo omanyete kera egento igoro y’obogima bwaye amo neki are.

² Nabo erabe kwaigure igoro ya Yeso Kristo, nonya omenyete ase ense emiaka goetania 2,000 yaetire. Korende abanto abange tibamanyeti eki Yeso arenge buna omonto. Abanto bande nigo bagoteba ng’a n’omonto omuya orenge, abande bateba nomobani orenge, n’abande nigo begenete ng’a nere Nyasae. Aye rende?​—Rora Amaereso y’omoerio 12.

3. Nase ki ere egento ki’engencho asore komanya Yehova Nyasae na Yeso Kristo?

³ Negento ki’engencho omanye ekeene igoro ya Yeso. Ase ki? Ebibilia nigo egototebia iga: “Na obogima bwa kare na kare nabwo obo: bakomanye aye Nyasae bw’ekeene bweka, naende Yeso Kristo gwatomete.” (Yohana 17:3) Onye komanyete ekeene igoro ya Yehova na Yeso, nomenye goika kare na kare ase eparadiso ense. (Yohana 14:6) Naende, komanya igoro ya Yeso negokoonye ekiagera nere omobwekano omuya bw’okomenya na kobakorera abanto bande buya. (Yohana 13:34, 35) Ase Egesieri 1, ntweegerete ekeene igoro ya Nyasae. Bono tiga twegere eki Ebibilia ekoorokereria igoro ya Yeso.

TWAMONYORIRE MASIHI!

4. Amang’ana “Masihi” na “Kristo” ninki aminetie?

⁴ Emiaka emenge konyora Yeso ataraiborwa, Yehova nariete eira ase Ebibilia ng’a namotome Masihi, gose Kristo. Ring’ana “Masihi” nigo rikorwa ase omonwa bw’Ekeibirania, na “Kristo” nigo rikorwa ase Ekegiriki. Amarieta y’esiko onsi abere nigo aminetie ng’a Nyasae nachore Masihi orieretwe eira na komoa ekerogo kia beene. Masihi nakore chiira chionsi chia Nyasae goikerana. Nonya ndero Yeso nabo akogokoonya. Korende konyora Yeso ataraiborwa, abanto abange nigo bare kweboria, ‘Ning’o orabe Masihi?’

5. Inee, aborokigwa ba Yeso mbegenete ng’a nere Masihi?

⁵ Aborokigwa ba Yeso tibarenge na tang’u tang’u ng’a Yeso nere Masihi orieretwe eira. (Yohana 1:41) Ase omobwekano, Simioni Petero agatebia Yeso iga: “Aye naye Kristo.” (Matayo 16:16) Inaki torabe nobomaene ng’a Yeso nere Masihi?

6. Inaki Yehova abakoonyete abanto batagete komogokia Nyasae komanya ning’o orenge Masihi?

⁶ Emiaka emenge konyora Yeso ataraiborwa, ababani ba Nyasae mbarigete amang’ana amange are gocha kobakoonya abanto komonyora Masihi. Inee, inaki ayio are gocha gokoonya? Totebe ng’a gwasabirwe ogende esiteni ye chigari ere nabanto abange korotota omonto otana koumera. Omonto aise gokoa amaereso amaya igoro y’omogeni oyio nabo okomonyora ase oboraisi. Ase enchera buna eyio, Yehova nigo atumiete ababani baye gototebia igoro yaria Masihi arakore, amo neki keramonyore. Ogoikeranigwa kw’obobani obwo bwensi nigo bogokoonya abanto batagete komogokia Nyasae komanya ng’a Yeso nere Masihi.

7. Mabani ki abere akoenekia ng’a Yeso nere Masihi?

⁷ Aya nabere y’amabani ayio. Obotang’ani, emiaka 700 konyora Yeso ataraiborwa, Mika akabana ng’a Masihi naiborwe ase omochie omoke o Bethlehemu. (Mika 5:2) Nabwo nao Yeso aiboretwe! (Matayo 2:1, 3-9) Obwakabere, Danieli akabana ng’a Masihi naoroke omwaka bwe 29 nyuma Kristo ataraiborwa. (Danieli 9:25) Aya na amabani abere oka gati ya amange akoenekia buya ng’a Yeso nere Masihi orieretwe eira.​—Rora Amaereso y’omoerio 13.

8, 9. Ninki kiabete ekero Yeso abatisetwe gekoenekia ng’a nere Masihi?

⁸ Yehova nigo aorogetie buya ng’a Yeso nere Masihi. Nyasae nigo amorierete eira Yohana Omobatisi ng’a namoe ekemanyererio erio amanye Masihi ning’o orenge. Ekero Yeso achiete ase Yohana kobatiswa ase Orooche rwa Yorodani ase omwaka bwe 29 nyuma Kristo ataraiborwa, Yohana naroche ekemanyererio ekio. Ebibilia nigo egototebia ekiabete: “Na Yeso, ekero abatisirwe, erio kegima agatiira korwa ase amache; na rora, igoro akamaanoka, na ere akarora Omoika o Nyasae ogaika buna riruma, ogocha igoro asare. Na rora, eriogi rikorwa igoro rigateba, ‘oyo nere Omwana one omwanchwa, ngokirie nere.’” (Matayo 3:16, 17) Ekero Yohana aroche na koigwa ekemanyererio eke, nigo amanyete ng’a Yeso nere Masihi. (Yohana 1:32-34) Ase rituko erio, ekero Yehova amoitororerete omoika oye, Yeso akaba Masihi. Oyo nere Nyasae achorete koba Omorai na Omoruoti.​—Isaya 55:4.

⁹ Obobani bw’Ebibilia, amang’ana a Yehova omonyene, na ekemanyererio aruete ekero gi’okobatiswa kwa Yeso nigo bikoenekia ng’a Yeso nere Masihi. Korende, ng’ai Yeso arwete, nere monto ki arenge? Tiga torore ay’Ebibilia egoteba.

NG’AI YESO ARWETE?

10. Ninki Ebibilia ekorokereria igoro y’obogima bwa Yeso konyora ataracha ase ense?

¹⁰ Ebibilia nigo ekorokereria ng’a Yeso nigo amenyete igoro ase engaki entambe konyora ataracha ase ense. Mika nigo atebete ng’a Masihi “nao arenge korwa agwo kare.” (Mika 5:2) Yeso omonyene nigo atebete ara aange ng’a namenyete igoro konyora ataraiborwa ase ense buna omonto. (Soma Yohana 3:13; 6:38, 62; 17:4, 5.) Nonya konyora ataracha ase ense, Yeso nigo arenge noboamate bwa beene na Yehova.

11. Nase ki Yeso are bw’engencho mono ase Yehova?

¹¹ Yeso noyo bw’engencho mono ase Yehova. Ase ki? Ase engencho Nyasae amotongete, konyora ataratonga kende gionsi gose onde bwensi. Ase igo Yeso nigo akorokwa “omoiborwa bweritang’ani bw’ebitongwa bionsi.”a (Abakolosai 1:15) Naende Yeso nigo are bw’engencho ase Yehova ekiagera nere bweka Yehova atongete eyemo ase eyemo. Nakio gekogera akorokwa “Omwana oye omomoima.” (Yohana 3:16) Yeso naende nere bweka Yehova atumiete gotonga ebinto binde bionsi. (Abakolosai 1:16) Naende Yeso bweka nere okorokwa “Ring’ana,” egekogera Yehova nigo amotumiete kobaa amageni na kobachika abamalaika amo na mwanyabanto.​—Yohana 1:14.

12. Inaki tomanyete ng’a Yeso na Nyasae tibari omonto oyomo?

¹² Abanto bande nigo begenete ng’a Yeso na Nyasae n’omonto oyomo. Korende Ebibilia teri korokereria igo. Ebibilia nigo egoteba ng’a Yeso nigo atongetwe, eyio eminetie ng’a Yeso naabwate omochakano. Korende Yehova, oyo otongete ebinto bionsi, taabwate omochakano. (Zaburi 90:2) Buna Omwana o Nyasae, Yeso tana korengereria gotaka koba Nyasae. Ebibilia nigo ekorokereria buya ng’a Tata nomonene kobua Omwana. (Soma Yohana 14:28; 1 Abakorinto 11:3.) Yehova bweka nere “Nyasae Omobui” bionsi. (Omochakano 17:1) Nere omonene mono naende ore ne chinguru mono ase eaanga.​—Rora Amaereso y’omoerio 14.

13. Nase ki Ebibilia egoteba ng’a Yeso nigo are “omogwekano o Nyasae oyotari kororekana”?

¹³ Yehova n’Omwana oye, Yeso, nigo bakorete emeremo ase oboang’e ase chibilioni chi’emiaka konyora igoro n’ense chitaratongwa. Goika banchaine mono! (Yohana 3:35; 14:31) Yeso nigo egete chimbwa chia ise buya mono ekagera Ebibilia ekomoroka “omogwekano o Nyasae oyotari kororekana.”​—Abakolosai 1:15.

14. Inaki Omwana o Yehova bw’engencho araiborwe buna mwanyabanto?

¹⁴ Omwana bw’engencho o Yehova nigo arenge ang’e gotiga igoro na koiborwa ase ense buna mwanyabanto. Inaki erio rianyarekanete? Yehova agakora egekone gi’okong’anyia obogima bw’Omwana oye korwa igoro gochia ase enda y’okoibora y’omwekungi ore korokwa Mariamu gose Maria. Ase enchera eye, Yeso taganetie ise okemwanyabanto. Ase igo Maria akaibora omwana omoikeranu, na komoroka Yeso.​—Luka 1:30-35.

YESO MONTO KI ARENGE?

15. Inaki oramomanye Yehova buya?

¹⁵ Aye nabo oregere amange igoro ya Yeso, obogima bwaye, ne chimbwa chiaye ase ogosoma ebitabu bi’Ebibilia bia Matayo, Mariko, Luka, na Yohana. Ebitabu ebio nigo bikorokwa Enchili. Ase engencho Yeso are buna Ise, eki orasome nigo keragokoonye komomanya Yehova buya. Ekio nakio gekogera Yeso agoteba iga: “Oyondorire inche, ororire na Tata.”​—Yohana 14:9.

16. Ninki Yeso aorokereretie? Ng’ai amaorokererio a Yeso aruete?

¹⁶ Abanto abange nigo barenge komoroka Yeso “Omworokia.” (Yohana 1:38; 13:13) Ekemo ki’ebinto bi’engencho aorogetie nigo kiarenge “amang’ana amaya ay’oboruoti.” Oboruoti obo ninki? Neserekari ya Nyasae erarae ense yonsi korwa igoro na kobasesenia abanto bakomoigwera Nyasae. (Matayo 4:23) Kera egento Yeso aorogetie nigo kiare korwa ase Yehova. Yeso agateba iga: “Okworokereria kwane tari okwane, korende nokwaye ere oyontomete.” (Yohana 7:16) Yeso namanyete ng’a Yehova natagete abanto baigwe amang’ana amaya ng’a, Oboruoti bwa Nyasae mborae ense.

17. Ng’ai Yeso arenge korokereria? Nase ki arenge n’omokia koborokereria abande?

¹⁷ Ng’ai Yeso arenge korokereria? Kera aase arenge konyora abanto. Akorokereria isiko y’omochie amo na ime yemechie, ebichie, chichiro, aase abanto bagosasimera, na ase chinka chi’abanto. Tare koganya abanto bagende asare. Botambe nigo arenge kogenda ase bare. (Mariko 6:56; Luka 19:5, 6) Yeso akabeka omokia na gotumia chingaki ne chinguru chiaye koborokereria abanto. Aseki? Ase engencho amanyete ng’a Nyasae nabo atagete akore igo naende ase engencho botambe arenge komoigwera Ise. (Yohana 8:28, 29) Naende Yeso akarandia ase engencho arenge kobarorera abanto amabebe. (Soma Matayo 9:35, 36.) Naroche ng’a abarai be chidini tibarenge korokereria ekeene igoro Nyasae n’Oboruoti bwaye. Ase igo nigo atagete kobakoonya abanto abange buna ekonyarekana baigwe amang’ana amaya.

18. Imbwa ki chia Yeso bwanchete mono?

¹⁸ Yeso nigo arenge omonto obanchete abanto na kobechandera. Nigo arenge omwororo na raisi gokwana nere. Nonya na abana nigo banchete kobera nere. (Mariko 10:13-16) Yeso botambe nigo arenge gokorera ekeene. Nigo agechete riaki amo nogotakorera oboronge. (Matayo 21:12, 13) Nigo amenyete engaki abakungu batabwate obosibore ase amang’ana amange naende batarenge gokorerwa ase amasikani. Korende botambe Yeso nigo arenge kobakorera abakungu ase amasikani na kobasika. (Yohana 4:9, 27) Ekeene naende Yeso nigo arenge omwekeyi. Ase omobwekano, emorogoba eyemo nigo asibetie amagoro y’aborokigwa baye, egento kiarenge gokorwa botambe n’omosomba.​—Yohana 13:2-5, 12-17.

19. Mobwekano ki okoorokia ng’a Yeso namanyete eki abanto baganetie naende ng’a natagete kobakoonya?

¹⁹ Yeso namanyete eki abanto baganetie, na nigo atagete kobakoonya. Ekio nkiarorekanete maiso marore ekero atumiete chinguru chia Nyasae kobagwenia abanto ase ogokora ebikone. (Matayo 14:14) Ase omobwekano, omonto orenge na ukoma agacha ase Yeso na komotebia: “Onye ngwancha, nonyare gonsibia.” Obororo n’emechando y’omonto oyio nigo yamokunete Yeso. Akamoigwera amabera nagotaka komokoonya. Erio Yeso akarambora okoboko kwaye, akamokuna, na akamotebia: “Nanchire; sibeka.” Na omonto oria akagwena! (Mariko 1:40-42) Norengererie buna omonto oria oigwete?

NIGO ARENGE OMWEGENWA BOTAMBE ASE ISE

20, 21. Inaki Yeso are omobwekano omuya bw’okoigwera ase Nyasae?

²⁰ Yeso nere omobwekano omuya bw’okoigwera ase Nyasae. Nakeba ninki kiabete gose ninki ababisa baye bamokorerete, nigo arenge omwegenwa ase Ise. Ase omobwekano, Yeso takoreti bibe ekero Saitani amotemete. (Matayo 4:1-11) Abanto bande b’enka ya Yeso omonyene tibegenete ng’a nere Masihi naende nigo barenge goteba ng’a “obakirwe neosi,” korende Yeso nigo agendererete gokora emeremo ya Nyasae. (Mariko 3:21) Ekero ababisa baye bamotindierete, Yeso nigo atigarete ore omwegenwa ase Nyasae na tatemetie kobakorera bobe.​—1 Petero 2:21-23.

²¹ Nonya nekero Yeso achandegete amakweri amaroro n’amatindi, ere nigo atigarete ore omwegenwa ase Yehova. (Soma Abafilipi 2:8.) Aye rengereria aria Yeso aremereretie ase rituko riria akwete. Ere akabwatwa, birori boborimo bakamong’acha buna omoramire Nyasae, abanachi ebina banchete amaaki bakamokumera, omoganda okamosekerera, abanyanyimbo bakamochanda na komoakerania emesumari ase omote. Ekero arenge gokwa akarera ase eriogi agateba: “Yaikeranire!” (Yohana 19:30) Amatuko atato nyuma yogokwa kwa Yeso, Yehova akamobokia na komoa omobere bw’omoika. (1 Abakorinto 15:42-50) Nyuma ya chigwiki chinke, Yeso akairana gochia igoro na, ‘goikaransa ensemo y’okoboko gw’okorio kwa Nyasae,’ nere akaganya Nyasae amokore Omoruoti.​—Abaibirania 10:12, 13.

22. Ibaga ki bono tobwate ase engencho Yeso arenge omwegenwa ase Ise?

²² Ase engencho Yeso atigarete ore omwegenwa ase Ise, nigo bono tore ne ribaga ri’okomenya goika kare na kare ase eparadiso ense, buna Yehova aganetie. Ase egesieri gekobwatia, ntwegere buna amakweri a Yeso agotoigorera enchera tomenye kare na kare..