Inaki Abagaka Bagokonya Ekeombe ki’Omosangererekano?

Buna yarenge korwa abwo omochakano bw’Obokristo, titobwati abapasta gose abasasiroti bagwakanwa ase ekeombe ki’emesangererekano yaito. Ribaga erio, intwe nigo tore n’abarisia bachorire bagwenerete ‘koba abarisia ase emesangererekano ya Omonene.’ (Ogokora 20:28) Abagaka aba n’abakristo naende abarisia abakong’u bakorwa oborai ase emesangererekano y’Egekristo, nigo bakoraa “tari ase okobetererigwa korende ase ogwancha buna Nyasae anchete, tari ase okonyora kw’oborianania, korende ase omoyo bw’okwerwa.” (1 Petero 5:1-3) Meremo kibagokora ase engencho yaito?

Nigo bagotwechandera na gotorenda. Abagaka nigo bakorwa oborai n’ogokonya korenda ekeombe ki’omosangererekano koba ang’e na Yehova. Ase engencho bamanyete ng’a emeremo eye nigo echikire na Nyasae, abagaka abwo tibari gwekora abanene igoro ya abanto baye, nigo bagochangera koreta omogoko n’obuya. (2 Abakorinto 1:24) Buna omorisia bwe chingondi okobeka omokia gochirenda, abagaka nabarabwo nigo bakobeka omokia komanya kera oyomo ase ekeombe ki’omosangererekano.​—Emereng’anio 27:23.

Nigo bagotorokereria enchera y’ogokora ogwancha kwa Nyasae. Kera egwiki, abagaka nigo bakoraa emesangererekano y’Egekristo erio gotokonya gokong’ia okwegena gwaito. (Ogokora 15:32) Abasacha aba beruete nigo naende bare ase omositari obosio ase emeremo y’okorandia, amo naintwe na gotwegeria chinsemo chionsi chiobokoreri bwaito.

Nigo bagotobeka omoyo. Erio batorende ase enchera ya kemoika, abagaka nigo bagototaarera ase chinka chiaito gose gokwana naintwe ase Enyomba y’Oboruoti na gotoremia goetera amariko amachenu.​—Yakobo 5:14, 15.

Goetania emeremo babwate ase omosangererekano bw’Egekristo, abagaka abange nigo bagokora emeremo, erio benyorere ebitoki, nabande mbare ne chinka chiabo chiganetie oborai bwabo. Abakristo aba baminto bagokora emeremo emekong’u nigo tobaete amasikani.​—1 Abatesaloniki 5:12, 13.

• Emeremo y’abagaka b’ekeombe ki’omosangererekano nereri?

• Nase nchera ki abagaka bakoorokia ng’a mbagokirie naintwe?