Nsukuru ki Abapainia Bakogenda?

Birori ba Yehova nigo bamanyekanete ase engaki entambe goetera chisemi chi’egetiokrasi. Esukuru ya beene, nereo ase baria bakorwa chingaki chiabo chionsi ase egasi y’okorandia Oboruoti, erio ‘goikerania ogokora kw’obosomba bwabo.’​—2 Timotheo 4:5.

Esukuru y’Obokoreri bw’Obopainia. Omoerio bw’omwaka omotang’ani bw’obokoreri bw’omopainia o chachi, nigo akorangerigwa gosoa esukuru ya amatuko atano na rimo, erabe ase Enyomba y’Oboruoti ere ang’e. Eganga y’esukuru eyio nokomokonya omopainia komoika Yehova ang’e, komokonya erio obokoreri bwaye bobe obuya mono, na agenderere koba omwegenwa ase obokoreri.

Esukuru ya Abarandia b’Oboruoti. Esukuru eye y’emetienyi ebere nigo ekobegeria Abapainia b’emiaka emenge bare n’omoyo bw’okorwa sobo kogenda gokorera ase baganeirie. Nigo bagoteba ng’a, “Nao inde aa, ntome.” Ase okomwegia omorandia omonene orandetie ase ense, Yeso Kristo. (Isaya 6:8; Yohana 7:29) Kong’anya aare korwa inka, neganie omenye obogima obore raisi. Enchera abanto bamenyete, embeo ne chindagera nabo chirabe ching’ao korwa ase chiria onarete. Nabo erabetererie kero kende kwegera omonwa omogeni. Esukuru eye nigo egokonya abasae na abare ase enyuomo, bare gati y’emiaka korwa 23 goika 65, koagacha chimbwa chi’Obokristo baraganie ase emeremo barabagerwe, na kwogeigwa erio batumeke ase ekeombe kia Yehova.

Esukuru ya Gileadi. Ase ekeibirania, “Gileadi” nigo eminetie “Etui y’Oborori.” Korwa omwaka o 1943 ekero esukuru eyio yachagete yatomire abamisonari goetania 8,000 korua oborori na gokora amange “kogenda goika chinsinyo chi’ense.” (Ogokora 13:47) Ekero abamisonari abatang’ani baigete ense ya Peru, keombe ki’emesangererekano tikiarengeo nonya nekemo ase ense eyio engima. Rero ebiombe bi’emesangererekano goetania 1,000 mbireo. Ekero abamisonari baito bachagete obokoreri ase ense ya Japan, Birori ba Yehova inse ya ikomi nabwo boka barengeo ase ense eyio engima. Korende rero Birori ba Yehova goetania 200,000 mbareo. Ekosi ya Gileadi y’emetienyi etano nigo ere n’amasomo amarito korwa ase ring’ana ria Nyasae. Baria bare ase obokoreri bw’obopainia bwa beene, gose abamisonari bare ase obokoreri bw’okorandia, na baria bare ase chi’obisi chi’orosagia, gose bare ase emeromo y’omoetanano nigo bakoariganigwa gosoa esukuru eyio ase ogosomigwa buya mono erio gokonya gokong’ia emeremo y’ense yonsi.

• Eganga y’Esukuru y’Obokoreri bwa Omopainia ninki?

• Mbarabi bagochia ase Esukuru ya Abarandia b’Oboruoti?