Ninki Oranyore ase Emesangerekano Yaito y’Egekristo?

Abanto abange batigire kogenda chikanisa ase engencho tibari konyora oborai n’okoremigwa goisaine kw’ering’ana richenu. Onye ere igo, nase ki ogende ase emesangerekano y’Egekristo ebangire na Birori ba Yehova? Ninki orarore aroro?

Norore omogoko bw’okoba gati y’abanto bare n’obwanchani na gwechanderana. Nyuma y’ogokwa kwa Yeso, Abakristo nigo babangire ase ebiombe bi’emesangererekano, na nigo baare koumerana komosasima Nyasae, kweorokereria amariko na kobekana omokia. (Abaibirania 10:24, 25) Koumerana ase are n’obwanchani, nigo baare kweigwa bare gati ya abasani b’ekeene​—Abakristo bamwabo. (2 Abatesaloniki 1:3; 3 Yohana 14) Nigo tokobwatia ekiorokererio kiabo na koba n’omogoko oria oria.

Norore obuya bw’okwegera buna oratumie ebirengo bi’Ebibilia. Buna yare abwo kare ase chingaki chi’Ebibilia, abasacha, abakungu, n’abana rero nigo bakoumerana bonsi amo. Aborokia bakorokereria buya batumia Ebibilia gotokonya korora buna ebirengo biaye biratokonye ase obogima bwaito bwa kera rituko. (Okoiranerera 31:12; Nehemia 8:8) Bonsi nkonyora bare ribaga gosanga korua amaereso abo na gotera. Ase enchera eyio nigo tokonyora ribaga rigiya gokwanera igoro y’okwegena gwaito gw’Egekristo.​—Abaibirania 10:23.

Nosesenigwe ekero okwegena kwao ase Nyasae kogokong’igwa. Omotomwa Paulo nigo atebetie ekeombe ki’omosangererekano engaki yaye iga: “nigo inde namaiga kororana nainwe, . . . erinde toremanie inche nainwe, kera omonto ase okwegena kw’oyonde, okwaino na okwane.” (Abarumi 1:11, 12) Ase emesangererekano, na koumerana botambe amo na abakristo baminto nigo kogoting’ia okwegena, n’okwerua gwaito komenya koreng’ana n’ebirengo bi’Ebibilia.

Twakwariganirie osange naintwe ase emesangererekano yaito ekobwatia, bwerorere aye bweka ebinto ebi. Kwaariganigwe ase omogoko. Tori goakanera emesangererekano yaito​—gose korwa esadaka.

• Nkeorokereri ki tokobwatia ase emesangererekano yaito?

• Mbuya ki tokonyora ekero togoikerana ase emesangererekano yaito y’Egekristo?