Inaki Ogosanga Gwaito na Abakristo Bande Kogotokonya?

Neba ng’a ntoete ase chinsana ime, gose rituko ribe n’obokendu n’embura, botambe nigo tokoumerana ase emesangererekano yaito y’Egekristo. Inee, omokia noyo ki tokobeka, koumerana n’abaminto nonya tore n’amakong’u na korosa korwa ase emeremo emekong’u y’erituko?

Nase engencho tokonyora obuya. Ekero are gokwana igoro ya baria togosanga nabwo ase emesangererekano yaito, Paulo nigo arigete iga: “Twechanderane intwe ase intwe.” (Abaibirania 10:24) Amang’ana aya nigo aminetie “korengereria buya igoro,” engencho yaye, kobamanya abande buya. Ase igo, amang’ana y’omotomwa nigo agotobeka omokia, kobechandera abande. Ase okomanya chinka chia Abakristo bande, nigo tokonyora ng’a abande baeteire amakong’u buna aria togoetera na koyabua, naende nabo baratokonye naintwe toyabue.

Koagacha obosani oboting’u. Ase emesangererekano yaito, nigo togocha amo, tari buna abanto twaumeranire inchera, korende buna abasani baime. Naende ase chingaki chinde nigo tokoumerana amo gosanga endagera, ekenyugwa gose kogosoria. Inee, ogasanga buna okwo naki kogotokonya? Nigo kogotokora twabarora abaminto koba abengencho, n’obwanchani bwaito ase bare bwating’a. Nekero Abakristo baminto banyorirwe n’amakongu, nigo tokoba ang’e kobakonya ekiagera tore abasani babo. (Emereng’anio 17:17) Ekero togosanga na kera oyomo ase ekeombe ki’emesangererekano yaito, nigo tokoorokia ng’a nigo tore ‘ebimo birendaine.’​—1 Abakorinto 12:25, 26.

Twakobekire omokia obe n’abasani baria bagokora ogwancha kwa Nyasae. N’abasani abwo nigo orabanyore korwa ase Birori ba Yehova. Gaki totiga kende kegotange gosanga naintwe.

• Mbuya ki tokonyora ekero togosanga amo ase emesangererekano?

• Indi oratake gocha ase emesangererekano yaito na komanyana na Abakristo bande?