ERESENI 38
Ancha Ekeegwa ki’Obogima
Ase engencho tore moyo nabo togokora na kogokera ebinto ebiya. Nonya ekero togwetera emechando, ebinto binde mbireo ebio tokogokera ase obogima. Inaki toraorokie ng’a nkoiraneria tore mbuya mono ase ekeegwa ki’obogima? Naseki tokore bo?
1. Naseki twanche Obogima?
Nigo twanchete obogima ase engencho bore ekeegwa korwa ase Tata oito otwanchete, Yehova. Nere “ore ensoko y’obogima”—agatonga obogima bwonsi. (Zaburi 36:9) “Nere okobaa [abanto] bonsi obogima na omoika, na ebinto bionsi.” (Ogokora kw’abatomwa 17:25, 28) Yehova nigo agotoa ebio toganetie erio togenderere koba moyo. Kobua mono, nere okogera enyarekane togokere obogima.—Soma Ogokora kw’abatomwa 14:17.
2. Inaki toramworokie Yehova ng’a ntwanchete ekeegwa ki’obogima?
Korwa ekero mama omino abogoretie oborito bwao, Yehova obeire okogwechandera. Ase Ebibilia Daudi oyomo bwa abasasimi ba Nyasae, agateba: “Amaiso ao nigo andoche ekero narenge enche ase enda ya baba ime.” (Zaburi 139:16) Obogima bwao nigo bore bwengencho mono ase Yehova. (Soma Matayo 10:29-31.) Nabo akoigwa bobe mono ekero omonto agwancha gokoora obogima bw’omonto onde nonya obwaye omonyene.a (Okong’anya 20:13) Boigo Yehova nabo akoigwa bobe toise kobeka ase akong’u gose titoimokia egetambokero giokorenda obogima bwa abande. Ekero tokorenda obogima bwaito na gosika amagima y’abande, nigo tokworokia ng’a ntwanchete ekeegwa ekiya mono ki’obogima.
EGERA AMANGE
Rora chinchera chinde echio oraorokie ng’a mbwanchete ekeegwa ki’obogima.
3. Renda afya yao
Ase engencho twarierete Yehova eira ng’a botambe ntokore aria aganetie, nigo togotumea obogima bwaito bwonsi erio komokorera. Nabo ekobwekanigwa n’okorua emebere yaito ekengwanso gochia ase Nyasae. Soma Abarumi 12:1, 2, na mokwanere amaborio aya:
Ninki kebwenerete kogosegeta orende afya yao?
Nase nchera ki chinde oranyare gokora bo?
4. Imokia ebitambokereo bibwenerete erio gotanga okoumia gose amakweri
Ebibilia nigo egotosegeta twetange nechinaro echio chikogosereria obogima. Orokia EVIDIO erio bwegere ebinto bike orakore kwerenda.
Soma Emereng’anio 22:3, na kwanera buna aye amo na abande morerende . . .
ase enka yao.
ase ogokorera emeremo.
ekero okogosoria omochieso.
ekero okorundia gose orinete egari.
5. Sika obogima bw’omwana otaraiborwa
Ase omorabaaro, Daudi agakwanera enchera Yehova akogokigwa n’obogima na ogokina kw’oborito ase enda ya ng’ina. Soma Zaburi 139:13-17, na mokwanere riborio eri:
Korengana nokorora kwa Yehova, obogima bw’omonto nigo bogochaka ekero akoiborwa, gose ekero ng’ina akobogoria oborito bwaye?
Amachiko a Yehova ase Israeli ya kale nigo arendete abakungu n’abana babo bataraiborwa. Soma Okong’anya 21:22, 23, na mokwanere amaborio aya:
Inaki Yehova arenge korora omonto ore goita omwana otaraiborwa ataancheti?
Inaki Yehova are koigwa ase oyorenge goita ase ogwancha?b
Inaki orooche igoro y’ebirengererio ebio bia Nyasae?
Nonya omokungu oy’omanyete engencho y’obogima nabo akorora korusia oborito koba egento keramokoonye. Soma Isaya 41:10, na mokwanere amaborio aya:
Onye omokungu okobetererigwa korusia oborito, naseng’o abwenerete korigia obokoonyi? Naseki?
ABANTO BANDE NIGO BAGOTEBA: “Omokungu nabwate obosibore bw’ogochora korusia oborito—omobere n’oyoye.”
Ninki kegokoenekeria ng’a Yehova nigo akorora obogima bw’omwana otaraiborwa amo nobwa ngi’na koba bwengencho?
ASE OBWENG’E
Ebibilia nigo egotworokereria twanche, tosike na korenda ekeegwa kia Yehova ki’obogima. Nigo ere bo ase obogima bwaito amo na amagima y’abanto abande.
Einyorie
Naseki obogima bwa mwanyabanto bore bwengencho ase Yehova?
Yehova naki akoigwa ekero omonto agokoora obogima bwa mwanyabanto ase ogwancha?
Ninki aye bwanchete igoro y’ekeegwa ki’obogima?
TUKA MONO
Inaki toramoiranerie Yehova mbuya mono ase ekeegwa ki’obogima?
Nyora riiranerio rie riborio, Inee Nyasae namwabere omokungu oyio orusetie oborito?
“Ninki Ebibilia Egoteba Igoro y’Okorusia Oborito?” (Erikire ase omotandao)
Egera buna ebirengererio bia Nyasae ase obogima bigotokoonya gochora chinchera chi’okwegokia echio chitari kobeka obogima bwaito ase akong’u.
“‘Emechieso Ekobeka Obogima ase Akong’u’—Inee, Nere Buya Koyetema?” (Amkeni!, Oktoba 8, 2000)
Naki rende omonto araisa gotwara ebirengererio bi’ogweita? Rora buna Ebibilia eranyare gokoonya.
a Yehova nigo are ang’e nabwo chinkoro chiabo chiabunekire. (Zaburi 34:18) Ere namanyete obororo abanto bakoigwa yagera bagania gweita, na naganetie kobakoonya. Erio korora buna obokoonyi bwaye borae omonto chinguru erio atige ebirengererio bi’okweita soma ensemo “Ntagete Gokwa—Inee, Ebibilia Nenkoonye Ekero Ebirengererio bi’Ogweita Biang’icheire?” ere ase ensemo Tuka Mono ase ereseni eye.
b Baria barusirie oborito tibabwenereti gochandwa nebirengererio ebibe—Yehova nabo akobabera. Erio komanya amange, rora ensemo “Ninki Ebibilia Egoteba Igoro y’Okorusia Oborito?” ere ase ensemo Tuka Mono ase ereseni eye.