Buna Torakore Ogochora Okuya

Twensi ngokora tore ogochora. Ogochora okonge togokora nabo korabe okuya gose okobe asetore nase obosani bwaito amo na Yehova. Ase omobwekano, nabo torachore ng’ai toramenye, buna toranyore chibesa toganetie, gose igoro y’enyuomo. Ekero togokora ogochora okuya, ntotware obogima bw’omogoko na komogokia Yehova.

1. Inaki oratumie Ebibilia egokoonye gokora ogochora okuya?

Otarakora ogochora, saba obokoonyi bwa Yehova na bwegere Ebibilia, erio korora ebirengererio biaye igoro ye ring’ana erio. (Soma Emereng’anio 2:3-6.) Ngaki chinde, Yehova nkorua are ogochika kore maiso marore. Onye nabo, gochora koigwera ogochika okwo nakwo ogochora okuya mono orakore.

Eraba rende ogochika gw’Ebibilia tikoiyo gokogotebia ekio ogwenerete gokora? Yehova nagotang’ane “ase enchera ogwenerete kobwatia.” (Isaya 48:17) Ase nchera ki? Nabo erabe ebirengo mbireo ebio biragotang’ane. Ebirengo bi’Ebibilia, n’ebiene bi’oboroso ebio bikworokia ebirengerereio bia Nyasae na buna akoigwa. Botambe nigo tokwegera buna Yehova akoigwa igoro ye ring’ana ekero togosoma omogano ase Ebibilia. Ekero twamanyire buna Yehova akoigwa, nabo torakore ogochora koramogokie.

2. Ninki ogwenerete korengereria nyuma otarakora ogochora?

Ebibilia nigo egoteba omonto: “Oyomanyete nigo akorigereria aase agochia.” (Emereng’anio 14:15) Engencho yaye neria ng’a nyuma totarakora ogochora, nigo togwenerete koira chingaki korengereria igoro y’ogochora gwaito. Buna okorigereria ogochora ao-ao, eborie: ‘Ebirengo bi’Ebibilia bigotumeka aiga mbiribi? Ngochora ki korang’e omorembe ase ebirengererio biane? Mbuya ki gose mbobe ki ogochora kwane korarentere abande? Egento ki’engencho mono, inee, ogochora okwo nkomogokie Yehova?’—Okoiranerera kw’Amachiko 32:29.

Nyasae nare n’okobua kw’ogototebia ayare amaya na ayare amabe. Ekero tokomanya buya na kobwatia amachiko na ebirengo biaye, enkoro yaito tegotogambia. Okomanya gwe chinkoro chiaito ime oko n’okobua kore ime yaito kogotokoonya komanya ayare amaya na amabe. (Abarumi 2:14, 15) Okomanya gwe chinkoro chiaito ime okwo kwegeirie nigo kogotokoonya gokora ogochora okuya.

EGERA AMANGE

3. Tiga Ebibilia ekorae

EVIDIO: Tiga Ebirengo bi’Ebibilia Bikorae (5:54)

• Ekeegwa ki’engencho mono Yehova atoeire, nkereki?

• Naseki Yehova atoeire okobua kw’ogokora ogochora intwe abanyene?

• Ninki atoeire ekio kegotokoonya gokora ogochora okuya mono?

Erio orore omobwekano bw’ekerengo ki’Ebibilia, soma Abaefeso 5:15, 16. Na mokwanere buna oranyare ‘korenda engaki yao’ gose koyetumea buya . . .

• gosoma Ebibilia botambe.

• koba omosacha, omokungu, omoibori, omomura, gose omoiseke omuya.

• goikerana emesangererekano.

4. Egeria okomanya gw’enkoro yao ime erio okore ogochora okuya

EVIDIO: “Genderera Koba n’Enkoro Etari Gokogambia” (5:13)

• Ase evidio eye, mbitambokero ki mosubati ominto airete kwegeria okomanya gw’enkoro yaye ime na gokora ogochora okwo koramogokie Yehova?

Naseki totabwenereti koboria abande batokorere ogochora okwo togwenerete gokora intwe abanyene? Soma Abaibirania 5:14, na mokwanere amaborio aya:

• Nonya gekororekana koba aororo koboria abande batokorere ogochora, ninki togwenerete gwatanana intwe abanyene?

• Ninki kereo ekio keragokoonye konaria okomanya gw’enkoro yao ime na gokora ogochora okuya?

5. Sika okomanya gwe chinkoro chia abanto bande

Abanto ao-ao nabo bagokora ogochora ao-ao. Inaki toraorokie ogosika ase ogochora gwe chinkoro chia abanto bande? Rora amang’ana abere:

Ring’ana 1: Mosubati ominto onarete gwechabera okong’anya gochia ase omosangererekano aase basubati baminto abange batari kogokigwa ekero bakorora abande bechaberete.

Soma Abarumi 15:1 na 1 Abakorinto 10:23, 24, na mokwanere amaborio aya:

• Koreng’ana na ebibungo ebi, ninki mosubati ominto arachore gokora? Ninki orakore onye kore nomonto oyio okomanya gw’enkoro yaye ime gotari komwanchera gokora ring’ana erio aye okomanya gw’enkoro yao ime gokogwanchera gokora?

Ring’ana 2: Momura ominto namanyete ng’a Ebibilia terigoteba ng’a mbobe konywa amarwa, korende ochorire gotanywa amarwa. Bono bw’ariganigwe ase omoyega abwo ase akorora abaminto bakonywa amarwa.

Soma Omorandia 7:16 na Abarumi 14:1, 10, na mokwanere amaborio aya:

• Koreng’ana nebibungo ebi, ninki momura ominto arachore gokora? Ninki orakore onye kwarorire omonto onde kagokora ring’ana erio okomanya gw’enkoro yao ime gotagwanchereti gokora?

Mbitambokero ki bikoraa ase ogochora okuya?

1. Mosabe Yehova erio agokoonye ochore ekio ogwenerete gokora.—Yakobo 1:5.

2. Kora obotuki ase Ebibilia nebitabu birengete Ebibilia erio konyora ebirengo ebio oratumie. Naende boigo nabo orababorie Abakristo babwate obomanyi.

3. Rora obuya gose obobe ogochora koratware ase okomanya gw’enkoro yao ime na okomanya gwe chinkoro chia abande.

ASE OBWENG’E

Nigo togokora ogochora okuya ekero tokomanya buna Yehova akoigwa igoro yering’ana, naende ekero tokorengereria gose amakora aito nakoonye abande gose nigo akobagechia.

Einyorie

• Inaki orakore ogochora okwo koramogokie Yehova?

• Inaki oraegerie okomanya gw’enkoro yao ime?

• Inaki oraorokie ng’a nosigete okomanya gwe chinkoro chia abanto bande?

TUKA MONO

Inaki orakore ogochora okwo korating’ie obosani bwao amo na Nyasae?

“Kora Ogochora Gokomorentera Nyasae Ogosika” (Mnara wa Mlinzi, Apiri 15, 2011)

Egera amange buna Yehova agotoa obosemia.

Yehova Nigo Akoraa Abanto Baye (9:50)

Egera ekiamokoonyete omosacha oyomo gokora ogochora okwo kwarenge ogokong’u.

Yehova Otoenekeirie Konyora Onsi Ayare Amaya (5:46)

Egera amange buna toramogokie Yehova ekero ataratoa richiko beene igoro ya ninki togwenerete gokora.

“Inee, Botambe Noganetie Richiko ri’Ebibilia?” (Mnara wa Mlinzi, Disemba 1, 2003)