Oboruoti bwa Nyasae Ninki?

Ring’ana ri’engencho mono ase Ebibilia, igoro y’Oboruoti bwa Nyasae. Yehova natumie Oboruoti obwo goikerania okogania kwaye ase ense. Oboruoti ninki? Inaki tomanyete ng’a bwachakire kogamba bono? Ninki bwanyarire goikerania? Naende ninki borakore ase chingaki chire bosio? Ase ereseni eye amo nechinde ibere chikobwatia nchiiraneri amaborio ayio.

1. Oboruoti bwa Nyasae ninki, naende ning’o ore Omoruoti bw’Oboruoti obwo?

Oboruoti neserekari etenenirie na Yehova Nyasae. Omoruoti bw’Oboruoti obwo, Yeso Kristo, nigo akogamba korwa igoro. (Matayo 4:17; Yohana 18:36) Ebibilia nigo egoteba ng’a Yeso: “[Nagambe] . . . goika kare na kare; nonya noboruoti bwaye tibokoba nomoerio.” (Luka 1:32, 33) Buna Omoruoti bw’Oboruoti bwa Nyasae, Yeso nagambere kera omonto ase ense.

2. Mbarabi baragambe amo na Yeso?

Yeso tarikogamba ere bweka. Abanto korwa “kera eamate, na omonwa, na abanto, na egesaku, . . . barabwo nigo baragambe [buna abaruoti] ase ense.” (Okomaanoka 5:9, 10) Abanto mbarenga baragambe amo na Kristo? Korwa Yeso achete ase ense, Abakristo abange babeire abatunyani baye. Korende abanto 144,000 nabwo boka bakogenda igoro kogamba amo na Yeso. (Soma Okomaanoka 14:1-4.) Abakristo bande bonsi ase ense nigo baragamberwe n’Oboruoti.—Zaburi 37:29.

3. Naseki Oboruoti bwa Nyasae bore obuya mono kobua chiserekari chia mwanyabanto?

Nonya ekero abagambi ba mwanyabanto bagotema gokora ebinto ebiya, tibabwati okobua kw’ogokora kera egento baganetie. Ekero ribaga riabo ri’okogamba riaerire baria bande bakoira ribaga erio nabo barabe abegimeria, naende nabo bataganie kobakoonya abanto. Korende onde tari oraire ribaga ria Yeso, Omogambi bw’Oboruoti bwa Nyasae. Nyasae otenenirie “oboruoti botanyare gosarigwa.” (Danieli 2:44) Yeso nagambe ase ense yonsi, na takworokia ogwanchereria. Nigo are nobwanchani, obuya, na oboronge, na naorokererie abanto gokorera abande ase enchera buna eyio—y’obwanchani, obuya, na oboronge.—Soma Isaya 11:9.

4. Eserekari ere nechinguru negambe ase ense yonsi

Yeso Kristo nare nokobua okonene gw’okogamba kobua mogambi onde bwensi ase historia. Soma Matayo 28:18, na mokwanere riborio eri:

• Inaki obogambi bwa Yeso bore obuya mono kobua obogambi bwa mwanyabanto onde bwensi?

Chiserekari chia mwanyabanto nigo chikonya goonchoka-onchoka kera engaki, na kera eserekari nigo ekogamba ensemo ensinini y’ense. Oboruoti bwa Nyasae borobwo rende? Soma Danieli 7:14, na mokwanere amaborio aya:

• Naseki ere buya ng’a Oboruoti bwa Nyasae “tibokobugwa?”

• Naseki ere buya ng’a mbogambe ase ense yonsi?

5. Obogambi bwa mwanyabanto goika borusigwe aroro pi

Naseki goika Oboruoti bwa Nyasae borusie aroro chiserekari chia mwanyabanto? Orokia EVIDIO, na mokwanere riborio rikobwatia.

EVIDIO: Oboruoti Bwa Nyasae Ninki?—Ekeng’ese (1:41)

• Ninki obogambi bwa mwanyabanto bwaretire?

Soma Omorandia 8:9, na mokwanere amaborio aya:

• Inee, okorengereria Oboruoti bwa Nyasae mbogwenerete korusia chiserekari chia mwanyabanto? Naseki?

6. Oboruoti bwa Nyasae nigo bobwate abagambi abwo bamanyete buya mono obokong’u bwaito

Ase engencho Omoruoti oito, Yeso, namenyete buna mwanyabanto, igo nabo akonyara “gotobogoreria oboreu bwaito.” (Abaibirania 4:15) Abasacha na abakungu 144,000 abegenwa abwo bakogamba na Yeso nigo bachorirwe na Yehova korwa ase “kera eamate, na omonwa, na abanto, na egesaku.”—Okomaanoka 5:9.

• Inee, nkoremigwa ore komanya ng’a Yeso na baria bonsi bakogamba nere mbamanyete buna obogima bwa mwanyabanto bore? Naseki?

7. Amachiko y’Oboruoti bwa Nyasae namaya mono kobua aye chiserekari chinde chionsi chia mwanyabanto

Chiserekari nigo chikoroisia amachiko ayio agwenerete gokoonya na korenda baria chikogambera. Boigo Oboruoti bwa Nyasae mbobwate amachiko ayio baria boragambere bagwenerete kobwatia. Soma 1 Abakorinto 6:9-11, na mokwanere amaborio aya:

• Okorengereria inaki ense erabe ekero kera omonto arabwatie amachiko a Nyasae?a

• Inee, okorengereria nere buya ase Yehova gosemeria baria bakogamberwa n’Oboruoti bwaye basike amachiko aya? Naseki?

• Ninki gekworokia ng’a abanto baria batari koigwera amachiko aya nabo bagoonchoreria?—Rora ekebungo 11.

ASE OBWENG’E

Oboruoti bwa Nyasae n’eserekari ere igoro eyio egocha kogamba ase ense yonsi.

Einyorie

• Abagambi b’Oboruoti bwa Nyasae mbarabi?

• Inaki Oboruoti bwa Nyasae bore obuya mono kobua eserekari ende yonsi ya mwanyabanto?

• Mbinto ki bike Yehova aganetie korwa ase baria baragamberwe n’Oboruoti obwo?

TUKA MONO

Rora ng’ai Yeso atebete Oboruoti boragambe korwa.

“Inee, Oboruoti bwa Nyasae Nase Enkoro Yao Ime Bore?” (Erikire ase omotandao)

Naseki Birori ba Yehova bagochora koba abegenwa ase Oboruoti bwa Nyasae, kobua koba abegenwa ase obogambi bwa mwanyabanto?

Koa Okoboko Oboruoti bwa Nyasae (1:43)

Ringoria ninki Ebibilia yaasioririe igoro ya 144,000 abwo Yehova achorire bagambe na Yeso.

“Mbarabi Bakogenda Igoro?” (Erikire ase omotandao)

Ninki kiamoenekeretie omokungu oyomo orenge echera ng’a Nyasae bweka nere orarente ense ere n’oboronge?

“Buna Nanyorete Riiranerio Igoro y’Ogotakorerwa ase Oboronge” (Amkeni!, Novemba 2011)