ERESENI 10
Inaki Emesangererekano ya Birobi ba Yehova Eragokoonye?
Kwanyagoikerana ase omosangererekano o Birori ba Yehova? Onye tikwanyagoikerana, nabo orabe nobwoba igoro y’ogoikerana ase rituko ritang’ani. Nabo oreborie: ‘Ninki kegokorekana ase emesangererekano eye? Naseki ere yengencho? Naseki inyikerane?’ Ase ereseni eye, mbwegere buna kwomerana nabande koragokoonye omoike Nyasae ang’e, boigo buna koragokoonye aye omonyene.
1. Naseki Birori ba Yehova bagosangererekana amo?
Rora buna omoriki bw’Ebibilia aorogetie esababu enene y’okwomerana amo n’abande: “Nintogie Omonene [“Yehova,” NW] ase egati y’omosangererekano omonene.” (Zaburi 26:12) Boigo, Birori ba Yehova nkonyora bare omogoko omonene ase okoumerana amo. Ase ense yonsi nigo bakoumerana kera egwiki erio komotogia Nyasae, gotera na gosaba. Boigo, nkoumerana bare amo ase emesangererekano emenene erio gosasima kera omwaka.
2. Ninki oregere ase emesangererekano yaito?
Ase emesangererekano nigo tokoorokereria korwa ase Ring’ana ria Nyasae, “bakaorokia engencho y’amang’ana ayio.” (Soma Nehemia 8:8.) Ase ogoikerana, mbwegere igoro ya Yehova nechimbwa chiaye chiogokumia. Buna okogenderera komanya igoro y’obwanchani bwaye gocha asore, nomoike ang’e mono. Boigo nomanye buna aragokoonye erio obe n’obogima bogoisanekia.—Isaya 48:17, 18.
3. Inaki abanto okoumerana nabwo ase emesangererekano yaito baragokoonye?
Yehova nigo agotochika “twechanderane intwe ase intwe, na kobekana chinguru ase obwanchani, na ase ogokora okuya. Titotiga gosangererekana amo.” (Abaibirania 10:24, 25) Ase emesangererekano yaito noumerane na abanto banchaine ase ekeene, na buna aye, bagokirie kwegera amange igoro ya Nyasae. Nobaigwe bakoremania na kobekana chinguru korwa ase Ebibilia. (Soma Abarumi 1:11, 12.) Nonyare komanya abande banyarire goetera amakong’u abo ase enchera endonge. Echi nachio gati yechisababu Yehova aganetie toumerane botambe!
EGERA AMANGE
Egera ninki kegokoreka ase emesangererekano ya Birori ba Yehova naende naseki ere buya gokora omokia goikerana ase emesangererekano eye.
4. Emesangererekano ya Birori ba Yehova
Korwa omochakano bw’Obokristo, Abakristo botambe nigo baare koumerana amo erio komosasima Yehova. (Abarumi 16:3-5) Soma Abakolosai 3:16, na mokwanere riborio eri:
Inaki Abakristo beritang’ani bare komosasima Yehova?
Boigo rero, Birori ba Yehova nkoumerana bare amo botambe ase e Kingdom Hall. Erio korora buna emesangererekano yabo ere, orokia EVIDIO. Naende, origererie ebicha y’omosangererekano, na mokwanere amaborio akobwatia.
Mang’ana ki kwarora abwekaine gati y’aria agokorwa ase e Kingdom Hall naria gwasoma ase Abakolosai 3:16?
Ase evidio gose ebicha, inee, nkwarora kende ase emesangererekano ekio giakogokia?
Soma 2 Abakorinto 9:7, na mokwanere riborio eri:
Naseki Birori ba Yehova batari gosaberera chibesa ase emesangererekano yabo?
Aye amo n’omoorokia oo, rora amang’ana arakwanerwe ase omosangererekano bw’egwiki eye.
Nsemo ki y’emesangererekano yakogokirie gose erabe y’engencho asore?
Inee, nomanyete?
Ase jw.org, nabo okonyora aase na chingaki emesangererekano egokorwa ense engima.
Emesangererekano yaito nigo ebwate, chinkwana, chividio, kwegera buna tokorandia na kworokereria. Emesangererekano nigo egochaka na koera ase ogotera na ogosaba
Ase chinsemo chinde chie eburogiramu, abategereri nkoariganigwa bare erio korua amaereso abo
Abanto bonsi mbaareganirie—abasacha, abakungu, abagaka, abang’ina, abasae na abana
Emesangererekano yaito teri goakanerwa. Birori ba Yehova tibari goakania besa y’ogosoa gose gosangereria esadaka
5. Omokia noganeirie erio goikerana emesangererekano
Rengereria omobwekano bw’enka ya Yeso. Korwa Nazareti goika Yerusalemu nigo bare gotara ang’e amatuko atato erio goikerana emesangererekano ya kera omwaka ase esafari yabo, nigo baare goetera ase ebitunwa na ebitongo. Soma Luka 2:39-42, na mokwanere amaborio aya:
Inee, okorengereria esabari kogenda Yerusalemu omokia noganeirie?
Naseki obwenerete obeke omokia erio goikerana ase emesangererekano?
Inee, okorengereria nere buya goikerana ase emesangererekano neba kere akong’u? Naseki?
Ebibilia nigo egoteba ng’a okuomerana amo erio komosasima Yehova n’okwengencho mono. Soma Abaibirania 10:24, 25, na mokwanere riborio eri:
Naseki tobwenerete goikerana ase emesangererekano botambe?
ABANTO BANDE NIGO BAGOTEBA: “Tebetereretie koumerana n’abande erio komosasima Nyasae. Nigo eisaine gwesomera Ebibilia aye bweka.”
Iriko ki gose mobwekano ki bw’Ebibilia ogototebia ekio Yehova aganetie?
ASE OBWENG’E
Goikerana ase emesangererekano nigo koragokoonye erio kwegera amange igoro ya Yehova, goting’ia obosani bwao amo nere, na boigo komosasima amo n’abande.
Einyorie
Naseki Yehova agotosegeta toumerane amo?
Ninki oregere ase emesangererekano ya Birori ba Yehova?
Inee, okorengerereria enchera ende nere emesangererekano eragokoonye?
TUKA MONO
Inaki onye gokwoboa goikerana ase omosangererekano? Rora buna omosacha oyomo orenge kwoboa buna achagete gwancha mono emesangererekano.
Rora buna omosae oyomo agokerete emesangererekano na ekio akorete erio agenderere goikerana botambe.
Egera buna abande bakoigwa igoro y’ogoika ase emesangererekano.
“Naseki Oikerane Emesangererekano ase e Kingdom Hall?” (Erikire ase omotandao)
Rora buna obogima bw’omosacha oyomo orenge kobwaterana n’abasaria bwaonchoreretie, ekero aikeranete ase omosangererekano o Birori ba Yehova.
“Nigo Narenge Gotara Nebunduki Yane Chingaki Chionsi” (Mnara wa Mlinzi, Julai 1, 2014)