Inaki Eraiburari y’Enyomba y’Oboruoti Eratokonye?

Inee aye noganie gokora obotuki na goitona erio omente obomanyi bwao bw’Ebibilia? Notake komanya igoro ye ririko gete, omonto gete, ase gete, gose egento gete gekwaneire ase Ebibilia? Gose kwana kwebori, inaki Ring’ana ria Nyasae riragokonye ase emechando yao obwate aye omonyene? Rirorio tumia eraiburari y’Enyomba y’Oboruoti.

Nigo ebwate ebinto ebiya bi’ogotuka na goitona. Nabo erabe ng’a tobwati ebitabu bionsi bia Bibilia bia Birori ba Yehova bigotoka ase omonwa oo. Korende ase eraiburari ere ase Enyomba y’Oboruoti nigo ebwate ebitabu ang’e bionsi birikire bwango iga. Nabo naende erabe ere ne Chibibilia chibasiririe ao ao, endabasia engiya, na ebitabu binde biragokonye gokora obotuki na goitona. Nore n’obosibore bw’ogotumia eraiburari emesangererekano etarachaka n’ekero yaerire. Onye ekombiuta ebekire aroro nabo erabe ebwate Watchtower Library. Eye n’eprogramu y’ekeletroniki ebwate ebitabu biaito ebinge mono na nigo ere raisi gotumeka.

Nigo ere y’engencho ase aborokigwa bare ase Omosangererekano bw’Obogima na Obokoreri. Nabo ogotumia eraiburari eyio y’Enyomba y’Oboruoti ekero okwearigania korua ensemo yao. Omoteneneri bw’omosangererekano bw’Obogima na Obokoreri nere otenenerete eraiburari eyio. Nere okorora ng’a ebitabu bia bwango iga biabekirwe ase eraiburari eyio na kobangwa buya. Ere gose omwarimu oo bw’Ebibilia nabo bakogokonya korigia egento otagete komanya korwa ase eraiburari eyio. Korende manya ng’a getabu kende gionsi kere ase eraiburari eyio, nigo kegosomerwa aroro na gotigwa aroro. Naende, ase engencho tokorenda ebitabu buya titori kobeka ekemanyererio gose korika ime y’ebitabu bi’eraiburari eyio.

Ebibilia nigo egoteba ng’a erio “komomanya Nyasae,” goika torigie “buna okorigia chifeta.” (Emereng’anio 2:1-5) Eraiburari y’Enyomba y’Oboruoti nabo ekogokonya gochaka korigia.

• Mbinto ki bi’ogotuka na goitona bire ase eraiburari y’Enyomba y’Oboruoti?

• Ning’o oragokonye erio otumie eraiburari buya?