Inaki Torakonye Korenda Enyomba Yaito y’Oboruoti?

Kera Enyomba y’Oboruoti ya Birori ba Yehova nigo eimogetie erieta richenu ria Nyasae. Ase igo, n’ensemo y’engencho y’ogosasima gwaito ogochenu. Nigo ere amasikani amanene koyekorera obochenu, erorekane engiya, naende erendire buya. Twensi nigo tokobwaterana.

Erue gokora obochenu ekero emesangererekano yaerire. Nyuma ya kera omosangererekano, Abaminto nigo bakobwaterana ase omogoko gokora egasi engusu erio gochena Enyomba y’Oboruoti. Rimo kera egwiki, obochenu bonde ngokorwa bore. Omogaka gose omosomba bw’obokoreri nigo agotenenera emeremo eyio, ase okobwatia omoroberio obekire erio koorokia ninki getakeire gokorwa. Koreng’ana nokogania, abaakwerua nigo bakwabusa, gosibia, gotinyia ebuse, kobanga ebirogo, gosibia chichoo, chitirisa, na gosamba eubi. Naende ang’e rimo ase omwaka, rituko nkorigigwa rire ekero obochenu obonene bogokorwa. Ekero abana baito bagotobwatesia ase emeremo y’obochenu nigo tokobegeria gosika enyomba yaito y’ogosasima.​—Omorandia 5:1.

Erue gokonya korosia ase atakeire. Kera omwaka Enyomba y’Oboruoti nigo ekoringorigwa buya ime na isiko. Korwa ase eriboti y’okoringoria okwo, emeremo ya botambe y’okorenda ngokorwa ere, erio enyomba etigare ere buya na gotanga gotumia chibesa chinyinge ekero yasarekire. (2 Amang’ana ’Ebiro 24:13; 34:10) Enyomba y’Oboruoti enchenu naende erendire buya nao ase agwenerete tokomosasimera Nyasae oito. Ekero togosanga ase emeremo eyio, nigo tokoorokia buna tomwanchete Yehova na gosika ase togosasimera. (Zaburi 122:1) Ekio n’egento gekogera eamate etokwane buya.​—2 Abakorinto 6:3.

• Nase ki totari gochwara ase togosasimera?

• Meroberio ki ebekire y’ogochena Enyomba y’Oboruoti?